Rahul Gandhi: ಲಾರಿ ಹತ್ತಿ ಚಾಲಕರ ಕಷ್ಟ ವಿಚಾರಿಸಿದ ರಾಹುಲ್ ಗಾಂಧಿ! ಭದ್ರತೆ ಇಲ್ಲದೇ ಕೈ ನಾಯಕನ ಪ್ರಯಾಣ

ರಾಹುಲ್ ಗಾಂಧಿ ಇತ್ತೀಚಿನ ದಿನಗಳಲ್ಲಿ ಅತ್ಯಂತ ಸರಳತೆ ಪ್ರದರ್ಶಿಸುತ್ತಿದ್ದಾರೆ ಮತ್ತು ನೇರವಾಗಿ ಜನರ ಬಳಿಗೆ ಬರುತ್ತಿದ್ದಾರೆ. ರಾಷ್ಟ್ರೀಯ ಪಕ್ಷದ ಪ್ರಮುಖ ನಾಯಕರಾಗಿದ್ದರೂ ಯಾವುದೇ ಭದ್ರತೆ ಇಲ್ಲದೇ ಜನರ ಮಧ್ಯೆ ಬಂದು ಮಾತನಾಡುತ್ತಿದ್ದಾರೆ.

ಕಾಂಗ್ರೆಸ್ ಪಕ್ಷದ ರಾಷ್ಟ್ರೀಯ ನಾಯಕ ರಾಹುಲ್ ಗಾಂಧಿ ಯಾವುದೇ ಭದ್ರತೆ ಇಲ್ಲದೆ ಲಾರಿಯಲ್ಲಿ ಪ್ರಯಾಣಿಸಿರುವುದು ಇದೀಗ ಸಂಚಲನ ಮೂಡಿಸಿದೆ. ಸೋಮವಾರ ರಾತ್ರಿ ಅವರು ಲಾರಿ ಕ್ಯಾಬಿನ್‌ನಲ್ಲಿ ಕುಳಿತು ದೆಹಲಿಯಿಂದ ಚಂಡೀಗಢಕ್ಕೆ ಪ್ರಯಾಣಿಸಿರುವುದು ಸಂಚಲನ ಮೂಡಿಸುತ್ತಿದೆ.

ದೆಹಲಿಯ ಲಾರಿ ಕ್ಯಾಬಿನ್​ನಲ್ಲಿ ಕೂರುವ ಮುನ್ನ ಎಲ್ಲರಿಗೂ ನಮಸ್ಕರಿಸಿ ಕೈ ಬೀಸಿ ಅದೇ ಲಾರಿಯಲ್ಲಿ ಅಂಬಾಲಕ್ಕೆ ಪ್ರಯಾಣ ಬೆಳೆಸಿದರು. ಅಲ್ಲಿನ ಗುರುದ್ವಾರದಲ್ಲಿ ಪೂಜೆ ಸಲ್ಲಿಸಿದರು. ನಂತರ ಅವರು ಅಂಬಾಲಾದಿಂದ ಶಿಮ್ಲಾಗೆ ತೆರಳಿದರು. ಇದೀಗ ರಾಹುಲ್ ಗಾಂಧಿ ಶಿಮ್ಲಾ ತಲುಪಿದ್ದಾರೆ.

ಕಾಂಗ್ರೆಸ್​ ನಾಯಕ ಲಾರಿಯಲ್ಲಿ ಪ್ರಯಾಣಿಸುವ ಮೂಲಕ ಗೂಡ್ಸ್ ಲಾರಿ ಚಾಲಕರ ಸಮಸ್ಯೆಗಳನ್ನು ಅರಿಯಲು ಮತ್ತು ಅವರ ಪ್ರಯಾಣದಲ್ಲಿ ಚಾಲಕರು ಎದುರಿಸುವ ತೊಂದರೆ, ಸಂಕಷ್ಟಗಳನ್ನು ಸ್ವಯಂ ತಿಳಿದುಕೊಳ್ಳಲು ಈ ರೀತಿ ವಿನೂತನವಾಗಿ ಪ್ರಯತ್ನ ಮಾಡಿದ್ದಾರೆ.

ದೇಶಾದ್ಯಂತ ಒಟ್ಟು ಒಂಬತ್ತು ಮಿಲಿಯನ್ ಟ್ರಕ್ ಚಾಲಕರಿದ್ದಾರೆ. ರಾಹುಲ್ ಗಾಂಧಿ ಅವರ ವೃತ್ತಿಜೀವನದ ಜೊತೆಗೆ ಅವರ ವೈಯಕ್ತಿಕ ಸಮಸ್ಯೆಗಳೇನು ಎಂಬುದನ್ನು ತಿಳಿದುಕೊಳ್ಳಲು ಅಂಬಾಲಾದಿಂದ ಚಂಡೀಗಢಕ್ಕೆ ಲಾರಿಯಲ್ಲಿ ಪ್ರಯಾಣಿಸಿದ್ದಾರೆ.

ರಾಹುಲ್ ಗಾಂಧಿಯಂತಹ ದೊಡ್ಡ ನಾಯಕರೊಬ್ಬರು ಯಾವುದೇ ಭದ್ರತೆಯಿಲ್ಲದೆ ಟ್ರಕ್‌ನಲ್ಲಿ ಪ್ರಯಾಣಿಸುವ ವಿಡಿಯೋ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ಈ ವಿಡಿಯೋವನ್ನು ರಾಹುಲ್ ಗಾಂಧಿ ತಮ್ಮ ಟ್ವಿಟರ್ ಖಾತೆಯಲ್ಲಿ ಹಂಚಿಕೊಂಡಿದ್ದಾರೆ.

ಆದರೆ ರಾಹುಲ್ ಗಾಂಧಿ ಭದ್ರತೆಯಿಲ್ಲದೆ ಲಾರಿಯಲ್ಲಿ ಪ್ರಯಾಣಿಸಿರುವುದು ಪ್ರಶಂಸೆಯ ಜೊತೆಗೆ ಟೀಕೆಗೂ ಒಳಗಾಗಿದೆ. ಇಷ್ಟು ದೊಡ್ಡ ನಾಯಕ ಭದ್ರತೆ ಇಲ್ಲದೇ ಹೇಗೆ ಓಡಾಡುತ್ತಾರೆ? ಎಂದು ಪ್ರಶಂಸಿಸಿದ್ದಾರೆ.

ಕರ್ನಾಟಕದ ರಾಜಕೀಯ ಬಿಸಿಯಿಂದ ರಾಹುಲ್ ಗಾಂಧಿ ದಣಿದಿದ್ದು, ಹಿಮಾಚಲ ಪ್ರದೇಶದ ರಾಜಧಾನಿ ಶಿಮ್ಲಾಗೆ ರಿಲ್ಯಾಕ್ಸ್ ಆಗಲು ತೆರಳಿದ್ದಾರೆ ಎಂದು ತೋರುತ್ತಿದೆ. ಇಲ್ಲಿ ಅವರು ತಮ್ಮ ಸಹೋದರಿ ಪ್ರಿಯಾಂಕಾ ಗಾಂಧಿ ವಾದ್ರಾ ಅವರ ಮನೆಯಲ್ಲಿ ತಂಗಿದ್ದಾರೆ. ಪ್ರಿಯಾಂಕಾ ಗಾಂಧಿ ಶಿಮ್ಲಾದ ಛರಾಬ್ರಾದಲ್ಲಿ ಮನೆ ಕಟ್ಟಿಸಿದ್ದಾರೆ.