Birthday Party: ವಾವ್​! ಸ್ವಚ್ಛತಾ ಕಾರ್ಯಕರ್ತರಿಗೆ ಫೈವ್​ ಸ್ಟಾರ್ ಹೋಟೆಲ್​ನಲ್ಲಿ ಬರ್ತ್​ ಡೇ ಪಾರ್ಟಿ ಕೊಟ್ಟ ಹೃದಯವಂತ ಶಾಸಕ

ಪುದುಚೇರಿ ಮುದಲಿಯಾರ್‌ ಪೇಟ್ ಕ್ಷೇತ್ರದ ಡಿಎಂಕೆ ಶಾಸಕ ಸಂಪತ್ ತಮ್ಮ ಹುಟ್ಟುಹಬ್ಬದಂದು ಸ್ಟಾರ್ ಹೋಟೆಲ್‌ನಲ್ಲಿ ಸ್ವಚ್ಛತಾ ಕಾರ್ಯಕರ್ತರಿಗೆ ಭರ್ಜರಿ ಪಾರ್ಟಿ ನೀಡಿದ್ದಾರೆ. ದಿನ ನಿತ್ಯ ನಗರವನ್ನು ಸ್ವಚ್ಛ ಮಾಡುದ ಪೌರ ಕಾರ್ಮಿಕರಿಗೆ ತಮ್ಮ ಜನ್ಮದಿನದಂದು ನೀಡಿರುವ ಔತಣಕೂಟ ಸಾಮಾಜಿಕ ಜಾಲಾತಣಾದಲ್ಲಿ ಗಮನ ಸೆಳೆಯುತ್ತಿದೆ.

ಈ ಬರ್ತಡೇ ಪಾರ್ಟಿಯಲ್ಲಿ ದ್ರಾವಿಡ ಮುನ್ನೇತರ ಕಳಗಂ ಪಕ್ಷದ ಶಾಸಕರು ಭಾಗವಹಿಸಿದ್ದರು. ಇದೇ ಕಾರ್ಯಕ್ರಮದಲ್ಲಿ ಶಾಸಕ ಸಂಪತ್​ ನೈರ್ಮಲ್ಯ ಕಾರ್ಯಕರ್ತರಿಗೂ ಆಹ್ವಾನ ನೀಡಿದ್ದಾರೆ. ಬಫೆ ಶೈಲಿಯಲ್ಲಿದ್ದ ಔತಣಕೂಟದಲ್ಲಿ ಕಾರ್ಮಿಕರಿಗೆ ತಮಗೆ ಏನು ಬೇಕೋ ಅದನ್ನು ಆರಾಮವಾಗಿ ಹಾಕಿಸಿಕೊಂಡು ತಿನ್ನುವಂತೆ ಸೂಚಿಸಿದ್ದಾರೆ.

ಸಂಪತ್ ಅವರು ಪುದುಚೇರಿಯ ಮುದಲಿಯಾರ್‌ಪೇಟ್ ಕ್ಷೇತ್ರದ ಡಿಎಂಕೆ ಶಾಸಕ. ಅವರು ಪುದುಚೇರಿ ರಾಜಕೀಯ ಮತ್ತು ಪುದುಚೇರಿ ಡಿಎಂಕೆಯಲ್ಲಿ ಉದಯೋನ್ಮುಖ ನಾಯಕನಾಗಿ ಗುರುತಿಸಿಕೊಂಡಿದ್ದಾರೆ. ಇತ್ತೀಚೆಗೆ ಹುಟ್ಟುಹಬ್ಬ ಆಚರಿಸಿಕೊಂಡ ಶಾಸಕ ಸಂಪತ್, ತಮ್ಮ ಕ್ಷೇತ್ರದಲ್ಲಿ ಸ್ವಚ್ಛತಾ ಕಾರ್ಯದಲ್ಲಿ ತೊಡಗಿರುವ ಕಾರ್ಯಕರ್ತರಿಗೆ ಸ್ಪೆಷಲ್ ಪಾರ್ಟಿ ನೀಡಿದ್ದಾರೆ.

ಕಡಲೂರು ರಸ್ತೆಯಲ್ಲಿರುವ ಫೈವ್​ ಸ್ಟಾರ್ ಹೋಟೆಲ್‌ನಲ್ಲಿ 127 ನೈರ್ಮಲ್ಯ ಕಾರ್ಮಿಕರಿಗೆ ಹುಟ್ಟುಹಬ್ಬದ  ಪ್ರಯುಕ್ತ ಔತಣಕೂಟ  ಆಯೋಜಿಸಿದ್ದರು. ಅಲ್ಲದೆ, ಸ್ವಚ್ಛತಾ ಸಿಬ್ಬಂದಿಗೂ ಗಣ್ಯರಿಗೆ ನೀಡುವಂತಹ ಗುಣಮಟ್ಟದ ಊಟ ನೀಡಬೇಕು ಎಂದು ಹೋಟೆಲ್ ಆಡಳಿತ ಮಂಡಳಿಗೆ ಶಾಸಕ ಸೂಚನೆ ನೀಡಿದ್ದರು ಎಂದು ತಿಳಿದುಬಂದಿದೆ.

ಕೋವಿಡ್ -19 ಸಂಕಷ್ಟದ ಸಮಯದಲ್ಲಿ ನೈರ್ಮಲ್ಯ ಕಾರ್ಯಕರ್ತರು ನೀಡಿದ ಕೊಡುಗೆಯನ್ನು ಗುರುತಿಸಲು ಡಿಎಂಕೆ ಶಾಸಕ ಈ ಪಾರ್ಟಿಯನ್ನು ಆಯೋಜಿಸಿರುವುದಾಗಿ ಸುದ್ದಿಗಾರರಿಗೆ ತಿಳಿಸಿದರು. ಇದೇ ವೇಳೆ ಶಾಸಕರು ಸ್ವಚ್ಛತಾ ಕಾರ್ಯಕರ್ತರಿಗೆ ಔತಣಕೂಟ ಏರ್ಪಡಿಸಿದ್ದಕ್ಕಾಗಿ ಕಾರ್ಮಿಕರಿಂದ ಹೃತ್ಪೂರ್ವಕ ಧನ್ಯವಾದಗಳನ್ನು ಸ್ವೀಕರಿಸಿದ್ದಾರೆ. ನಮ್ಮ ಜೀವನದಲ್ಲಿ ನಾವು ಸ್ಟಾರ್ ಹೋಟೆಲ್‌ ಹೇಗಿರಲಿದೆ ಎಂದು ನೋಡಿರಲಿಲ್ಲ. ಶಾಸಕರ ಈ ಪ್ರಯತ್ನವನ್ನು ನಾವು ಪ್ರಶಂಸಿಸುತ್ತೇವೆ ಎಂದು ಸ್ವಚ್ಛತಾ ಕಾರ್ಯಕರ್ತರೊಬ್ಬರು ಹೇಳಿದ್ದಾರೆ.

ಈ ಭರ್ಜರಿ ಔತಣಕೂಟದ ಮೆನುವಿನಲ್ಲಿ ಬಿರಿಯಾನಿ, ಪನೀರ್ ಬಟರ್ ಮಸಾಲಾ, ಇತ್ಯಾದಿ ಸೇರಿದಂತೆ ವಿವಿಧ ರೀತಿಯ ಸಸ್ಯಾಹಾರಿ ಮತ್ತು ಮಾಂಸಾಹಾರಿ ಗ್ರೇವಿಗಳನ್ನು ಒಳಗೊಂಡಿತ್ತು.

ಡಿಎಂಕೆ ಶಾಸಕ ನೈರ್ಮಲ್ಯ ಕಾರ್ಯಕರ್ತರಿಗೆ ತಾವೇ ಊಟ ಬಡಿಸಿ ಅವರ ಜೊತೆಯಲ್ಲಿಯೇ ಕುಳಿತು ಊಟ ಮಾಡಿದರು. ಅಂತೆಯೇ ಪಾರ್ಟಿ ಮುಗಿದ ನಂತರ ಸ್ವಚ್ಛತಾ ಸಿಬ್ಬಂದಿಗೆ ಸೀರೆಯನ್ನು ಉಡುಗೊರೆಯಾಗಿ ನೀಡಿ ಮನೆಗೆ ಬೀಳ್ಕೊಟ್ಟರು.