Threaten: ಅನೈತಿಕ ಸಂಬಂಧ ಹೊಂದಿದ್ದ ಮಹಿಳೆಯ ಮನೆಗೆ ನುಗ್ಗಿ ಗಂಡನಿಗೆ ಬೆದರಿಕೆ; ಪಿಎಸ್‌ಐ ಅಮಾನತು

ಹೌದು.. ಪೊಲೀಸ್‌ ಸಬ್‌ ಇನ್‌ಸ್‌ಪೆಕ್ಟರ್‌ವೊಬ್ಬ ಮಹಿಳೆಯ ಮನೆಗೆ ನುಗ್ಗಿ ಆಕೆಯ ಪತಿಗೆ ಪಿಸ್ತೂಲ್ ತೋರಿಸಿ ಬೆದರಿಕೆ ಹಾಕಿರುವ ಆತಂಕಕಾರಿ ಘಟನೆ ಪುಣೆಯಲ್ಲಿ ನಡೆದಿದೆ.

ಫೆಬ್ರವರಿ 19 ರಂದು ಬೆಳಿಗ್ಗೆ 10 ಗಂಟೆಗೆ ಪುಣೆಯ ಕೊತ್ರೂಡ್‌ನ ಶಾಸ್ತ್ರಿ ನಗರದ ಸೊಸೈಟಿಯಲ್ಲಿ ಈ ಘಟನೆ ನಡೆದಿದ್ದು, ಪಿಎಸ್‌ಐ ವರ್ತನೆಯಿಂದ ಸ್ಥಳೀಯರು ಬೆಚ್ಚಿ ಬಿದ್ದಿದ್ದಾರೆ.

ಮೂಲಗಳ ಪ್ರಕಾರ, ಆರೋಪಿ ಪೊಲೀಸ್‌ ಎಸ್‌ಐ ಮಹಿಳೆಯೊಂದಿಗೆ ಅನೈತಿಕ ಸಂಬಂಧ ಹೊಂದಿದ್ದ ಎನ್ನಲಾಗಿದೆ. ಇತ್ತೀಚೆಗೆ ಗಂಡನ ಭಯದಿಂದ ಆಕೆ ಆತನನ್ನು ನಿರ್ಲಕ್ಷ್ಯ ಮಾಡುತ್ತಿದ್ದರಿಂದ ಇಂತಹ ದುಷ್ಕೃತ್ಯಕ್ಕೆ ಮುಂದಾಗಿದ್ದಾನೆ ಎಂದು ತಿಳಿದು ಬಂದಿದೆ.

ಆರೋಪಿ ಪಿಎಸ್‌ಐ ಅನ್ನು ನಾಗೇಶ ಜಾರ್ಡೆ ಎಂದು ಗುರುತಿಸಲಾಗಿದ್ದು, ಈತನ ವಿರುದ್ಧ ಕೊತ್ತೂರು ಪೊಲೀಸರು ಎಫ್‌ಐಆರ್‌ ದಾಖಲಿಸಿಕೊಂಡಿದ್ದಾರೆ.

ಮಹಿಳೆಯ ಗಂಡ 43 ವರ್ಷದ ವ್ಯಕ್ತಿ ಪಿಎಸ್‌ಐ ವಿರುದ್ಧ ದೂರು ನೀಡಿದ್ದು, ಮಹಿಳೆಯೊಂದಿಗೆ ಅನೈತಿಕ ಸಂಬಂಧ ಹೊಂದಿದ್ದರಿಂದ ಅದನ್ನು ಕೊನೆಗಾಣಿಸುವಂತೆ ಆತ ಪಿಎಸ್‌ಐಗೆ ತಿಳಿಸಿದ್ದ. ಇದರಿಂದ ಆತ ಮನೆಗೆ ನುಗ್ಗಿ ಬೆದರಿಕೆ ಹಾಕಿದ್ದಾನೆ.

ಪೊಲೀಸ್‌ ಸಬ್‌ ಇನ್‌ಸ್‌ಪೆಕ್ಟರ್‌ ಮಹಿಳೆಯ ಮನೆಗೆ ನುಗ್ಗಿ ದೂರುದಾರ (ಗಂಡ), ಆತನ ತಾಯಿ ಮತ್ತು ಮಕ್ಕಳನ್ನು ನಿಂದಿಸಿ ಕೊಲೆ ಬೆದರಿಕೆ ಹಾಕಿದ್ದಾನೆ. ಪತ್ನಿಗೆ ಏನಾದರೂ ಹೇಳಿದರೆ ತಕ್ಕ ಪಾಠ ಕಲಿಸುವುದಾಗಿ ಬೆದರಿಸಿದ್ದಾನೆ ಎಂದು ದೂರಲಾಗಿದೆ.

ಪ್ರಕರಣ ಸಂಬಂಧ ಹೆಚ್ಚುವರಿ ಸಿಪಿ ಡಾ.ಜಲೀಂದರ್ ಸುಪೇಕರ್ ಅವರು ಆರೋಪಿ ನಾಗೇಶ್‌ ಜಾರ್ಡೆಯನ್ನು ಪೊಲೀಸ್ ಇಲಾಖೆಯಿಂದ ಅಮಾನತುಗೊಳಿಸಿದ್ದಾರೆ.