Narendra Modi: ಪ್ಲಾಸ್ಟಿಕ್ ಬಾಟೆಲ್​ಗಳ ಮರುಬಳಕೆಯಿಂದ ಸಿದ್ಧವಾದ ಜಾಕೆಟ್ ಧರಿಸಿ ಸಂಸತ್​ಗೆ ಬಂದ ಪ್ರಧಾನಿ ಮೋದಿ

ಪ್ರಧಾನಿ ನರೇಂದ್ರ ಮೋದಿ ಬುಧವಾರ ವಿಶೇಷ ಜಾಕೆಟ್​ ಧರಿಸಿ ಸಂಸತ್ತಿನಲ್ಲಿ ಕಾಣಿಸಿಕೊಂಡಿದ್ದಾರೆ. ಪ್ಲಾಸ್ಟಿಕ್‌ ಬಾಟಲಿ ಮರುಬಳಕೆ ಮಾಡಿ ಸಿದ್ಧಪಡಿಸಿದ ನೀಲಿ ಬಣ್ಣದ ಸ್ಲೀವ್​ಲೆಸ್​ ಸದ್ರಿ ಜಾಕೆಟ್‌ ಧರಿಸಿ ರಾಜ್ಯಸಭೆಯಲ್ಲಿ ಭಾಗವಹಿಸಿದ್ದಾರೆ. ಬೆಂಗಳೂರಿನಲ್ಲಿ ಸೋಮವಾರ ನಡೆದಿದ್ದ ಇಂಡಿಯಾ ಎನರ್ಜಿ ವೀಕ್‌ನಲ್ಲಿ ಇಂಡಿಯನ್ ಆಯಿಲ್ ಕಾರ್ಪೊರೇಷನ್ ಲಿಮಿಟೆಡ್ (ಐಒಸಿಎಲ್) ಈ ಜಾಕೆಟ್ ಅನ್ನು ಪ್ರಧಾನಿಯವರಿಗೆ ಉಡುಗೊರೆಯಾಗಿ ನೀಡಿತ್ತು.

ಪರಿಸರ ಸಂರಕ್ಷಣೆಗೆ ಮುಂದಾಗದಿದ್ದರೆ ಖಂಡಿತ ಮುಂದೊಂದು ದಿನ ಅಪಾಯ ಖಚಿತ. ಜೊತೆಗೆ ಪರಿಸರಕ್ಕೆ ಹಾನಿಯನ್ನುಂಟು ಮಾಡುವ ವಸ್ತುಗಳ ಬಳಕೆಯನ್ನ ತಪ್ಪಿಸುವುದು ಹಾಗೂ ಅದರ ಮರುಬಳಕೆ ಮಾಡುವುದು ಅತ್ಯಾವಶ್ಯಕವಾಗಿದೆ. ಹೀಗೆ ಮರುಬಳಕೆ ಮಾಡುವ ವಸ್ತುವಿನ ಜಾಕೆಟ್ ಧರಿಸುವ ಮೂಲಕ ಪ್ರಧಾನಿ ನರೇಂದ್ರ ಮೋದಿ ಇತರರಿಗೆ ಮಾದರಿಯಾಗಿದ್ದಾರೆ.

ಐಒಸಿಎಲ್ ತ್ಯಾಜ್ಯದ ಬಾಟಲಿಗಳಿಂದ ಬಟ್ಟೆಯನ್ನು ತಯಾರಿಸುತ್ತಿದೆ. ಸಂಗ್ರಹಿಸಿದ ಬಾಟಲಿಗಳನ್ನು ಸಣ್ಣ ತುಣುಕುಗಳಾಗಿ ಪುಡಿ ಮಾಡುವುದನ್ನು ಒಳಗೊಂಡಿರುತ್ತದೆ. ಐಒಸಿಎಲ್ ವಾರ್ಷಿಕವಾಗಿ 10 ಕೋಟಿ ಪ್ಲಾಸ್ಟಿಕ್‌ ಬಾಟಲಿಗಳನ್ನು ಬಟ್ಟೆಯಾಗಿ ಮರುಬಳಕೆ ಮಾಡುತ್ತದೆ.

ಇಂಡಿಯನ್ ಆಯಿಲ್ ಕಾರ್ಪೊರೇಶನ್​ ಪ್ಲಾಸ್ಟಿಕ್​ ಬಾಟಲಿಗಳ ಮರು ಬಳಕೆ ಮಾಡಿ ಸಾಕಷ್ಟು ಜಾಕೆಟ್​ಗಳನ್ನು ತಯಾರಿಸಿದೆ. ಫೆ.6ರಂದು ಇಂಡಿಯಾ ಎನರ್ಜಿ ವೀಕ್‌ನಲ್ಲಿ ಪ್ರಧಾನಿ ಅವರಿಗೆ ಈ ಜಾಕೆಟ್​ ಉಡುಗೊರೆಯಾಗಿ ನೀಡಲಾಗಿತ್ತು. ಈ ಇಂಧನ ಸಪ್ತಾಹವು ಇಂಧನ ಕ್ಷೇತ್ರದಲ್ಲಿ ಭಾರತದಲ್ಲಾಗುತ್ತಿರುವ ಗಮನಾರ್ಹ ಬದಲಾವಣೆಯನ್ನು ಜಗತ್ತಿಗೆ ತೋರಿಸುವ ಗುರಿ ಹೊಂದಿದೆ.

ತೈಲ ಕಂಪನಿಯು ಮುಂಚೂಣಿಯ ಕಾರ್ಮಿಕರಿಗೆ ಸಮವಸ್ತ್ರಗಳನ್ನು ತಯಾರಿಸಲು 20 ಮಿಲಿಯನ್ ಹಳೆ ಪಿಇಟಿ ಬಾಟಲಿಗಳನ್ನು ಮರುಬಳಕೆ ಮಾಡಲು ನಿರ್ಧರಿಸಿದೆ. ಕಳೆದ ನವೆಂಬರ್‌ನಲ್ಲಿ 'ಅನ್‌ಬಾಟಲ್ಡ್ - ಟುವರ್ಡ್ಸ್ ಎ ಗ್ರೀನರ್ ಫ್ಯೂಚರ್ ಎಂಬ ಕಾರ್ಯಕ್ರಮ ಆರಂಭಿಸಲಾಗಿದ್ದು, ಸುಮಾರು 3 ಲಕ್ಷ ಇಂಡಿಯನ್​ ಆಯಿಲ್​​ ಪೆಟ್ರೋಲ್​ ಮತ್ತು ಡೀಸೆಲ್​ ಪಂಪ್​ಗಳ ಅಟೆಂಡೆಂಟ್‌ಗಳು ಮತ್ತು ಇಂಡೇನ್ ಎಲ್‌ಪಿಜಿ ಗ್ಯಾಸ್ ವಿತರಣಾ ಸಿಬ್ಬಂದಿಗೆ ಪ್ರತ್ಯೇಕವಾಗಿ ಸಮವಸ್ತ್ರವನ್ನು ವಿನ್ಯಾಸಗೊಳಿಸಲು ನಿರ್ಧರಿಸಿದೆ.

ಉಪಯೋಗಿಸಿದ ಮತ್ತು ಹಳೆ ಪಿಇಟಿ ಬಾಟಲಿಗಳಿಂದ ಉಡುಗೆಗಳನ್ನು ಸಿದ್ಧಪಡಿಸಲಾಗುತ್ತಿದೆ. ಇದರಿಂದ ಸುಮಾರು 405 ಟನ್‌ಗಳಷ್ಟು ಬಾಟಲಿಗಳನ್ನು ಮರುಬಳಕೆ ಮಾಡಿದಂತಾಗಲಿದೆ. ಜೊತೆಗೆ ಇದು ವಾರ್ಷಿಕವಾಗಿ 20 ಮಿಲಿಯನ್ ಬಾಟಲಿಗಳನ್ನು ಸರಿದೂಗಿಸಲು ಸಮಾನವಾಗಿದೆ. ಈ ನಿಟ್ಟಿನಲ್ಲಿ ಪ್ರಧಾನಿ ಈ ಜಾಕೆಟ್ ಧರಿಸಿರುವುದು ಸಾಕಷ್ಟು ಮಹತ್ವ ಪಡೆದಿದೆ ಎಂದು ಇಂಡಿಯನ್ ಆಯಿಲ್ ಅಧಿಕಾರಿಗಳು ಹೇಳಿದ್ದಾರೆ.

ಮತ್ತೊಂದೆಡೆ, ಸರ್ಕಾರವು ಗ್ರೀನ್​ ಎನರ್ಜಿಯನ್ನು ಸಾಕಷ್ಟು ಉತ್ತೇಜಿಸುತ್ತಿದೆ. ಈ ವರ್ಷದ ಬಜೆಟ್‌ನಲ್ಲಿ 19,700 ಕೋಟಿ ರೂ ವೆಚ್ಚದಲ್ಲಿ ರಾಷ್ಟ್ರೀಯ ಹಸಿರು ಹೈಡ್ರೋಜನ್ ಮಿಷನ್ ಪ್ರಾರಂಭಿಸಿದೆ. ಇದರಿಂದ ಕಡಿಮೆ ಇಂಗಾಲದ ತೀವ್ರತೆ ಸುಗಮಗೊಳಿಸುತ್ತದೆ. ಇಂಧನ ಆಮದು ಮೇಲಿನ ಅವಲಂಬನೆ ಕಡಿಮೆ ಮಾಡುತ್ತದೆ ಎಂದು ತಿಳಿಸಿದ್ದಾರೆ.

2023ರ ಬಜೆಟ್‌ನಲ್ಲಿ, ವಿತ್ತ ಸಚಿವೆ ನಿರ್ಮಲಾ ಸೀತಾರಾಮನ್ ಇಂಧನ ಪರಿವರ್ತನೆ ಕ್ಷೇತ್ರಕ್ಕೆ 35,000 ಕೋಟಿ ಅನುದಾನ ಘೋಷಿಸಿದ್ದರು ಮತ್ತು ಪರಿಸರ ಸ್ನೇಹಿ ಹಸಿರು ಉತ್ತೇಜನವನ್ನು ಸರ್ಕಾರದ ಏಳು ಆದ್ಯತೆಗಳಲ್ಲಿ ಸೇರಿಸಿದ್ದಾರೆ.