Weird Village: ಚಳಿಗಾಲದಲ್ಲಿ ಪ್ರವಾಸಿಗರ ಬೀಡು, ಬೇಸಿಗೆಯಲ್ಲಿ ಪಕ್ಕಾ ಸುಡುಗಾಡು! 3 ತಿಂಗಳು ಇಡೀ ಊರೇ ಖಾಲಿ ಖಾಲಿ!

ಚಳಿಗಾಲದಲ್ಲಿ ಗುಜರಾತಿನ ಕಚ್​​ ಜಿಲ್ಲೆಯ ಬನ್ನಿ ಪ್ರದೇಶ ರಣ್ ಉತ್ಸವದ ವೇಳೆ ನವ ವಧುವಿನಂತೆ ಅಲಂಕರಿಸಲ್ಟಟ್ಟಿರುತ್ತದೆ. ಆದರೆ ಉತ್ಸವ ಮುಗಿದು ಬೇಸಿಗೆ ಆರಂಭವಾಗುತ್ತಿದ್ದಂತೆ ಈ ಪ್ರದೇಶ ಸ್ಮಶಾನದಂತಾಗುತ್ತದೆ.

ಬನ್ನಿ ಪ್ರದೇಶವು ರಣ್ ಉತ್ಸವವನ್ನು ಆಯೋಜಿಸಿದಾಗ ಲಕ್ಷಾಂತರ ಪ್ರವಾಸಿಗರನ್ನು ಸ್ವಾಗತಿಸುತ್ತದೆ . ಆದರೆ ಬೇಸಿಗೆ ಶುರುವಾದರೆ ಇತ್ತ ಯಾರೊಬ್ಬರು ಕಣ್ಣು ಹಾಯಿಸುವುದಿಲ್ಲ. ಪ್ರತಿ ವರ್ಷದಂತೆ ಬೇಸಿಗೆ ವೇಳೆ ಇಲ್ಲಿ ನೀರಿಗಾಗಿ ಹಾಹಾಕಾರ ಶುರುವಾಗಿದೆ. ಅದರಿಂದಾಗಿ ಪ್ರತಿ ವರ್ಷದಂತೆ ಈ ವರ್ಷವೂ ಈ ಭಾಗದ ಹಳ್ಳಿಗಳ ಜನರು ವಲಸೆ ಹೋಗಲು ಶುರು ಮಾಡಿದ್ದಾರೆ.

ಹಳ್ಳಿಯ ಜನರು ತಮ್ಮ ಕಷ್ಟವನ್ನಾದರೂ ಸಹಿಸಿಕೊಳ್ಳುತ್ತಾರೆ, ಆದರೆ ತಾವು ಸಾಕುವ ದನಕರುಗಳ ವಿಚಾರದಲ್ಲಿ ತುಂಬಾ ಕಾಳಜಿ ವಹಿಸುತ್ತಾರೆ. ಇದೀಗ ಕಚ್​ ಭಾಗದ ರೈತರು ಜಾನುವಾರಗಳಿಗೆ ಅಹಾರ-ನೀರು ಒದಗಿಸಿಕೊಡುವ ಸಲುವಾಗಿ ಮೂರು ತಿಂಗಳುಗಳ ಕಾಲ ದೊಡ್ಡ ದೊಡ್ಡ ಊರುಗಳಿಗೆ ವಲಸೆ ಹೋಗುತ್ತಾರೆ. ಸಾಮಾನ್ಯ ಕುಟುಂಬವು ತಮ್ಮ ಮಕ್ಕಳ ಉಜ್ವಲ ಭವಿಷ್ಯಕ್ಕಾಗಿ ದೊಡ್ಡ ನಗರಕ್ಕೆ ವಲಸೆ ಹೋಗುವಂತೆ, ಈ ಬನ್ನಿ ಪ್ರಾಂತ್ಯದ ಜಾನುವಾರು ಮಾಲೀಕರು ತಮ್ಮ ದನಕರುಗಳನ್ನು ಬದುಕಿಸಿಕೊಳ್ಳಲು ಮೂರು ತಿಂಗಳ ಕಾಲ ಬೇರೆ ಕೆಲವು ಸ್ಥಳಗಳಿಗೆ ವಲಸೆ ಹೋಗುತ್ತಾರೆ.

ಕಚ್‌ನ ಬನ್ನಿ ಪ್ರದೇಶದಲ್ಲಿ ಪ್ರತಿವರ್ಷವೂ ಬೇಸಿಗೆಯ ಮೂರು ತಿಂಗಳು ನೀರು ಸಿಗುವುದಿಲ್ಲ. ದಿನಕ್ಕೆ ಒಂದೇ ಗಂಟೆ ಮಾತ್ರ ನೀರು ಬಿಡಲಾಗುತ್ತದೆ. ಈ ನೀರು ಜನರಿಗೆ ಸಾಲುವುದು ಕಷ್ಟ. ಇಲ್ಲಿನ ಜನರಿಗಿಂತ ನಾಲ್ಕು ಪಟ್ಟು ಜಾನುವಾರುಗಳಿವೆ. ಹಾಗಾಗಿ ಜನರು ವಲಸೆ ಹೋಗುವುದು ಅನಿವಾರ್ಯವಾಗಿದೆ.

ಇಂತಹ ಕಷ್ಟದ ಪರಿಸ್ಥಿತಿಯಲ್ಲೂ ಇಲ್ಲಿನ ಜನರು ತಮ್ಮ ಊರನ್ನು ದೂಷಿಸುವುದಿಲ್ಲ. ಇದು ಪ್ರಕೃತಿ ಸಹಜ ಎಂದು ಮುಂದೆ ಹೋಗುತ್ತಾರೆ. ಅಲ್ಲದೆ ಈ ವಲಸೆ ಪ್ರತಿ ವರ್ಷ ನಡೆಯುವ ಪ್ರಕ್ರಿಯೆಯಾಗಿದ್ದು, ಜನರು ಈ ಜೀವನಕ್ಕೆ ಒಗ್ಗಿಕೊಂಡಿದ್ದಾರೆ.

ನಾನಾ ಸರದೊ ಗ್ರಾಮ ಪಂಚಾಯಿತಿಯ ಉಪಾಧ್ಯಕ್ಷ ಗುಲಾಂ ಮಿತಾ ಖಾನ್ ನ್ಯೂಸ್ 18 ಜೊತೆ ಮಾತನಾಡಿ, ಗ್ರಾಮದ ಹೊರವಲಯದಲ್ಲಿರುವ ಹುಲ್ಲಿಗೆ ಬೆಂಕಿ ತಗುಲಿ ಇದೀಗ ಹುಲ್ಲಿನ ಕೊರತೆ ಉಂಟಾಗಿದೆ. ಜೊತೆಗೆ ಊರಿನ ಬಾವಿಗಳು ಖಾಲಿಯಾಗಿದ್ದು, ನೀರು ಅನಿಯಮಿತವಾಗಿದೆ. ಹಾಗಾಗಿ ಮೂರು ತಿಂಗಳು ನಮ್ಮ ಜಾನುವಾರುಗಳಿಗೆ ನೀರು ಸಿಗುವುದಿಲ್ಲ ಎಂದು ತಿಳಿಸಿದ್ದಾರೆ.  

ಪಂಚಾಯಿತಿ ಮಾಜಿ ಅಧ್ಯಕ್ಷ ಫಕೀರಮದ್ ಜಾತ್ ಮಾತನಾಡಿ, ಗ್ರಾಮದಲ್ಲಿರುವ ಕೆರೆಗಳಲ್ಲಿ ನೀರಿನ ಮಟ್ಟ ಈಗ ಅತ್ಯಂತ ಕಡಿಮೆ ಮಟ್ಟದಲ್ಲಿದ್ದು, ಮಲಿನವಾಗಿದೆ. ಬಾವಿಯಲ್ಲಿ ಸಾಕಷ್ಟು ನೀರು ಸಿಗುತ್ತಿಲ್ಲ. ಆದರೂ ಕುಡಿಯಲು ಸಾಧ್ಯವಾಗದ ಈ ನೀರನ್ನು ಪ್ರಾಣಿಗಳಿಗೆ ಅನಿವಾರ್ಯವಾಗಿ ಕುಡಿಯಲು ಒತ್ತಾಯಿಸಲಾಗುತ್ತದೆ. ಇದರಿಂದ ಅವುಗಳು ಅನಾರೋಗ್ಯಕ್ಕೆ ಒಳಗಾಗುತ್ತವೆ. ಇದರಿಂದ ಹಾಲಿನ ಉತ್ಪಾದನೆ ಕಡಿಮೆಯಾಗುತ್ತದೆ. ನೀರಿನ ಕೊರತೆಯಿಂದಾಗಿ ಐದರಿಂದ ಆರು ತಿಂಗಳವರೆಗೆ ತೆನೆಯಾಗಿರುವ ಅನೇಕ ಎಮ್ಮೆಗಳು ಗರ್ಭಪಾತಕ್ಕೆ ಒಳಗಾಗುತ್ತವೆ ಎಂದು ಬೇಸರ ವ್ಯಕ್ತಪಡಿಸಿದ್ದಾರೆ.

ಸರದೋ ಸಮೂಹ್ ಗ್ರಾಮ ಪಂಚಾಯತ್ ಇಡೀ ಬನ್ನಿ ಪ್ರದೇಶ ಅತಿ ಹೆಚ್ಚು ಪ್ರಾಣಿಗಳನ್ನು ಹೊಂದಿದೆ. ಇಲ್ಲಿ ಹತ್ತು ಸಾವಿರ ಜನರಿದ್ದರೆ, ಸುಮಾರು 30 ಸಾವಿರಕ್ಕೂ ಹೆಚ್ಚು ಜಾನುವಾರುಗಳನ್ನು ಹೊಂದಿದ್ದಾರೆ.

ಬನ್ನಿ ವ್ಯಾಪ್ತಿಯ ನಾನಾ ಸರದೋ ಸಮೂಹ್ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ನಾನಾ ಸರದೊ, ಬಡಾ ಸರದೊ, ರಾಭು ವಂದ್, ಸಂವಲ್ಪುರ ವಂದ್ ಗ್ರಾಮಗಳ ಜನರಿಗೆ ಕುಡಿಯಲು ನೀರಿಲ್ಲ. ಈ ಗ್ರಾಮಗಳಿಗೆ ಟ್ಯಾಂಕ್‌ಗಳ ಮೂಲಕ ದಿನಕ್ಕೆ ಒಮ್ಮೆ ಒಂದು ಗಂಟೆಯವರೆಗೆ ನೀರನ್ನು ಬಿಡಲಾಗುತ್ತದೆ. ಇದು ಸಾಕಾಗದೆ ಮಹಿಳೆಯರು ಹೂಜಿ ಮತ್ತು ಬಕೆಟ್‌ಗಳಲ್ಲಿ ನೀರು ತರಲು ಹೋಗುತ್ತಾರೆ.

ಕಳೆದ ವರ್ಷ ಕಚ್​ನಲ್ಲಿ ಆಸ್ಪತ್ರೆಯೊಂದರ ಉದ್ಘಾಟನೆ ವೇಳೆ ಪ್ರಧಾನಿ ನರೇಂದ್ರ ಮೋದಿ ಬನ್ನಿ ಪ್ರದೇಶದ ಜಾನುವಾರು ಮಾಲೀಕರ ಸಂಕಷ್ಟಗಳ ಬಗ್ಗೆ ಕಳವಳ ವ್ಯಕ್ತಪಡಿಸಿದ್ದಲ್ಲದೆ, ತಮ್ಮ ಗ್ರಾಮವನ್ನು ತೊರೆಯದಂತೆ ಮನವಿ ಮಾಡಿದ್ದರು. ಆದರೆ ಈ ಜನರು ಊರು ಬಿಡುವುದು ಅನಿವಾರ್ಯವಾಗಿದೆ. ನಮಗಾಗಿ ಅಲ್ಲದಿದ್ದರೂ ನಮ್ಮ ದನಕರುಗಳಿಗಾಗಿ ಊರು ಬಿಡಲೇಬೇಕು ಎಂದು ಜನರು ಅಳಲು ತೋಡಿಕೊಳ್ಳುತ್ತಾರೆ.