Cheetah Cub Dies: ಕುನೋ ರಾಷ್ಟ್ರೀಯ ಉದ್ಯಾನದಲ್ಲಿ ಮರಿ ಚೀತಾ ನಿಧನ! 2 ತಿಂಗಳಲ್ಲಿ ನಾಲ್ಕನೇ ಸಾವು

ನಿನ್ನೆ (ಮೇ 23) ಮರಿ ಚಿರತೆ ಸಾವನ್ನಪ್ಪಿದ್ದು, ಕಳೆದ ಮಾರ್ಚ್ ತಿಂಗಳ ಕೊನೆಯ ವಾರ ಜ್ವಾಲಾ ಹೆಸರಿನ ಹೆಣ್ಣು ಚೀತಾ ಭಾರತಕ್ಕೆ ಕರೆತಂದ ಬಳಿಕ ನಾಲ್ಕು ಮರಿಗಳಿಗೆ ಜನ್ಮ ನೀಡಿತ್ತು.

ಈವರೆಗೆ 2 ತಿಂಗಳ ಅವಧಿಯಲ್ಲಿ ಮೂರು ಚೀತಾಗಳು ಸಾವನ್ನಪ್ಪಿದ್ದವು. ಆದರೆ ಇದೇ ಮೊದಲ ಬಾರಿಗೆ ಮರಿ ಚಿರತೆಯೊಂದು ಸಾವನ್ನಪ್ಪಿರೋದು ಅಧಿಕಾರಿಗಳಿಗೆ ಮತ್ತಷ್ಟು ಆತಂಕವನ್ನು ಉಂಟು ಮಾಡಿದೆ.

ಕುನೋ ರಾಷ್ಟ್ರೀಯ ಉದ್ಯಾನವನದಲ್ಲಿ ಸದ್ಯ 17 ವಯಸ್ಕ ಮತ್ತು ಅರೆ ವಯಸ್ಕ ನಮೀಬಿಯನ್ ಮತ್ತು ದಕ್ಷಿಣ ಆಫ್ರಿಕಾದ ಚೀತಾಗಳು ಇವೆ. ಜೊತೆಗೆ ಭಾರತದಲ್ಲೇ ಜನಿಸಿದ ಮೂರು ಮರಿಗಳು ಕೂಡ ಇವೆ.

ಮರಿ ಚಿರತೆ ಸಾವನ್ನಪ್ಪಲು ಕಾರಣ ಏನು ಅನ್ನೋದನ್ನು ತಿಳಿಯಲು ಅರಣ್ಯ ಅಧಿಕಾರಿಗಳು ಮತ್ತು ಕುನೋ ರಾಷ್ಟ್ರೀಯ ಉದ್ಯಾನವನದ ಅಧಿಕಾರಿಗಳು ನಿರಂತರ ಪ್ರಯತ್ನದಲ್ಲಿ ತೊಡಗಿದ್ದಾರೆ. ಮರಣೋತ್ತರ ಪರೀಕ್ಷೆಯ ರಿಪೋರ್ಟ್ ಇನ್ನಷ್ಟೇ ಬರಬೇಕಿದೆ.

ಅಧಿಕಾರಿಗಳು ಹೇಳುವ ಪ್ರಕಾರ ಈ ಮರಿ ಚೀತಾ ನಾಲ್ಕು ಮರಿಗಳ ಪೈಕಿ ಚಿಕ್ಕದಾಗಿದೆ. ಕಡಿಮೆ ಸಕ್ರಿಯ ಮತ್ತು ಆರೋಗ್ಯದಲ್ಲೂ ಅಷ್ಟೇನೂ ಸದೃಢವಾಗಿರಲಿಲ್ಲ. ಕಳೆದ ಕೆಲ ದಿನಗಳಿಂದ ಈ ಮರಿಯನ್ನು ಅಧಿಕಾರಿಗಳು ನಿಗಾದಲ್ಲಿರಿಸಿದ್ದರು. ಪ್ರಾಥಮಿಕ ಸಂಶೋಧನೆಗಳ ಪ್ರಕಾರ ದೌರ್ಬಲ್ಯದಿಂದ ಸಾವನ್ನಪ್ಪಿದೆ ಎಂದು ಹೇಳಲಾಗಿದೆ.

ಕೆಲ ದಿನಗಳ ಹಿಂದಷ್ಟೇ ದಕ್ಷಾ ಎಂಬ ಚೀತಾ ಅಸುನೀಗಿತ್ತು. ಅದಕ್ಕೂ ಮೊದಲು ಎರಡು ಚೀತಾ ಸಾವನ್ನಪ್ಪಿತ್ತು. ಇದೀಗ ಮರಿ ಚೀತಾ ಸೇರಿ ಒಟ್ಟು 4 ಚೀತಾಗಳು ಅಸುನೀಗಿದಂತಾಗಿದೆ.

ಪ್ರಧಾನಿ ನರೇಂದ್ರ ಮೋದಿ ಅವರ ಮಹತ್ವಕಾಂಕ್ಷೆಯ ದೃಷ್ಟಿಯಿಂದ ನಮೀಬಿಯಾ ಮತ್ತು ದಕ್ಷಿಣಾ ಆಫ್ರಿಕಾದಿಂದ ಈ ವರ್ಷದ ಆರಂಭದಲ್ಲಿ ಅಳಿವನಂಚಿನಲ್ಲಿರುವ ಅಪರೂಪದ ಚೀತಾಗಳನ್ನು ಕರೆತರಲಾಗಿತ್ತು.