20 ಕಾಲ್ಬೆರಳು, 12 ಕೈಬೆರಳು; ಗಿನ್ನೀಸ್​ ರೆಕಾರ್ಡ್​​ ಸೇರಿದ ಅಜ್ಜಿ

ಹುಟ್ಟುವ ಮನುಷ್ಯರೆಲ್ಲರಿಗೂ ಸಾಮಾನ್ಯವಾಗಿ 10 ಕೈಬೆರಳು, 10 ಕಾಲ್ಬೆರಳು ಇರುವುದು ಸಹಜ. ಅಂದರೆ ಒಟ್ಟು 20 ಬೆರಳುಗಳಿರುತ್ತವೆ. ಆದರೆ ಒಡಿಶಾದಲ್ಲಿ ಒಬ್ಬ ಅಜ್ಜಿಗೆ ಎಷ್ಟು ಬರೋಬ್ಬರಿ 32 ಬೆರಳುಗಳಿದ್ದು, ಅವರು ಈಗ ಗಿನ್ನೀಸ್​ ವಿಶ್ವ ದಾಖಲೆ ಪುಸ್ತಕ ಸೇರಿದ್ದಾರೆ.

63 ವರ್ಷದ ಒಡಿಶಾದ ನಿವಾಸಿ ಕುಮಾರಿ ನಾಯಕ್​ ವಿಶ್ವ ದಾಖಲೆ ಸೇರಿದ ವೃದ್ಧೆ.ಇವರು 47 ವರ್ಷದ ದೇವೇಂದ್ರ ಸುತಾರ್​​​ ದಾಖಲೆಯನ್ನು ಮುರಿದಿದ್ದಾರೆ. ಸುತಾರ್​ 14 ಕಾಲ್ಬೆರಳು ಮತ್ತು 14 ಕೈಬೆರಳುಗಳನ್ನು ಹೊಂದಿ 2014ರಲ್ಲಿ ಗಿನ್ನೀಸ್​ ರೆಕಾರ್ಡ್​ ಸೇರಿದ್ದರು.

ಕುಮಾರಿ ಹುಟ್ಟಿದಾಗಲೇ 32 ಬೆರಳುಗಳನ್ನು ಹೊಂದಿದ್ದರು. ಅವರ ಕೈ ಕಾಲುಗಳನ್ನು ನೋಡಿ ಅಕ್ಕ-ಪಕ್ಕದ ಜನರು ಮೂಢನಂಬಿಕೆಯಿಂದ ಕುಮಾರಿಯನ್ನು 'ಮಾಟಗಾತಿ' ಎಂದು ಜರಿಯುತ್ತಿದ್ದರು. ಅವರನ್ನು ಹತ್ತಿರವೂ ಸೇರಿಸಿಕೊಳ್ಳುತ್ತಿರಲಿಲ್ಲ.

ಕುಮಾರಿ ಒಡಿಶಾದ ಗಂಜಾಂ ಜಿಲ್ಲೆಯ ಕಡಪಾದ ಗ್ರಾಮದವರು. ಇವರಿಗೆ 20 ಕಾಳ್ಬೆರಳು ಇದ್ದು, 12 ಕೈಬೆರಳುಗಳಿವೆ.

ಆರು ಅಥವಾ ಏಳು ವಾರಗಳ ಅವಧಿಯಲ್ಲೇ ಅಂದರೆ ಭ್ರೂಣದಲ್ಲಿದ್ದಾಲೇ ಕುಮಾರಿ ಕೈ ಕಾಲು ಬೆರಳುಗಳು ಹೆಚ್ಚಾಗಿ ಬೆಳೆದಿರುವುದು ಗೊತ್ತಾಗಿತ್ತು.

ಇದನ್ನು ವೈದ್ಯಕೀಯ ಭಾಷೆಯಲ್ಲಿ ಪಾಲಿಡೆಕ್ಟಿಲಿಸಂ ಎಂದು ಕರೆಯಲಾಗುತ್ತದೆ. ವಿಶ್ವದ್ಯಾಂತ ಹುಟ್ಟುವ 1000 ಮಕ್ಕಳ ಪೈಕಿ ಒಂದು ಮಗುವಿಗೆ ಈ ರೀತಿ ಕಂಡುಬರುತ್ತದೆ.

ಶಸ್ತ್ರ ಚಿಕಿತ್ಸೆ ಮಾಡುವ ಮೂಲಕ ಹೆಚ್ಚಿನ ಬೆರಳುಗಳನ್ನು ತೆಗೆದುಹಾಕಿ ಸರಿಮಾಡಬಹುದಾಗಿದೆ.20 ಕಾಳ್ಬೆರಳು ಮತ್ತು 12 ಕೈಬೆರಳುಗಳನ್ನು ಹೊಂದುವುದು ತುಂಬಾ ವಿರಳ ಎಂದು ಡಾ.ಪಿನಾಕಿ ಮೋಹತಿ ಅಭಿಪ್ರಾಯಪಟ್ಟಿದ್ದಾರೆ. ಇದು ವಂಶಪಾರಂಪರ್ಯವಾಗಿ ಬರುತ್ತದೆ.

ಈ ಕುರಿತು ಮಾತನಾಡಿರುವ ಕುಮಾರಿ, "ನಾನು ಬೆರಳುಗಳ ದೋಷದಿಂದ ಹುಟ್ಟಿದೆ. ಹುಟ್ಟಿದ ವೇಳೆ ನನಗೆ ಸರಿಯಾಗಿ ಚಿಕಿತ್ಸೆ ನೀಡಿರಲಿಲ್ಲ. ಯಾಕೆಂದರೆ ನಾನು ಬಡಕುಟುಂಬದಲ್ಲಿ ಹುಟ್ಟಿ ಬೆಳೆದೆ. ಮೂಢನಂಬಿಕೆಯ ಜನರು ನನ್ನನ್ನು ಮಾಟಗಾತಿ ಎಂದು ಕರೆಯುತ್ತಿದ್ದರು. ಅವರ ಹತ್ತಿರವೂ ಸೇರಿಸಿಕೊಳ್ಳುತ್ತಿರಲಿಲ್ಲ," ಎಂದು ದುಃಖಿತರಾದರು.

ನೆರೆಹೊರೆಯ ಜನರ ಕೊಂಕು ಮಾತುಗಳಿಂದ ಮನನೊಂದು ಕುಮಾರಿ ಮನೆ ಬಿಟ್ಟು ಹೊರಗೆ ಬರುತ್ತಿರಲಿಲ್ಲ. ಯಾವಾಗಲು ಸಹ ಮನೆಯೊಳಗೆ ಇರುತ್ತಿದ್ದರು.