Exam Results: ಹತ್ತು ವರ್ಷಕ್ಕೆ 10ನೇ ತರಗತಿ ಪಾಸ್ ಮಾಡಿದ ಬಾಲಕ! ಈತ ಶಾಲೆಯಲ್ಲಿ ಓದಿದ್ದು ಒಂದನೇ ಕ್ಲಾಸ್ ಮಾತ್ರ!

ಉತ್ತರ ಪ್ರದೇಶದಲ್ಲಿ ಬುಧವಾರ 10ನೇ ತರಗತಿ ಫಲಿತಾಂಶ ಪ್ರಕಟವಾಗಿತ್ತು 10 ವರ್ಷದ ಅಯಾನ್ ಗೋಯಲ್ ಎಂಬ ಬಾಲಕ 10 ನೇ ತರಗತಿ ಪರೀಕ್ಷೆಯಲ್ಲಿ ಪ್ರಥಮ ದರ್ಜೆಯಲ್ಲಿ ಉತ್ತೀರ್ಣನಾಗುವ ಮೂಲಕ ಇತಿಹಾಸ ಬರೆದಿದ್ದಾನೆ.

ಉತ್ತರ ಪ್ರದೇಶದ ಬುಲಂದ್​ಶಹರ್​ ಜಹಾಂಗೀರಾಬಾದ್​ನ ಶಿವಕುಮಾರ್​ ಅಗರ್ವಾಲ್​ ಜನತಾ ಇಂಟರ್​ ಕಾಲೇಜಿನಲ್ಲಿ 10ನೇ ತರಗತಿ ಪರೀಕ್ಷೆ ತೆಗೆದುಕೊಂಡು 76.67% ಗಳಿಸಿದ್ದಾರೆ.

ಅಯಾನ್​ ಪ್ರಾಂಶುಪಾಲರ ವಿಶೇಷ ಅನುಮತಿ ಮೇರೆಗೆ 10ನೇ ತರಗತಿ ಪರೀಕ್ಷೆಯಲ್ಲಿ 600 ಅಂಕಗಳಿಗೆ 460 ಅಂಕಗಳಿಸಿದ್ದಾರೆ.

ಅಯಾನ್ ಗೋಯೆಲ್ 10 ನೇ ತರಗತಿ ಪರೀಕ್ಷೆಯಲ್ಲಿ ಹಿಂದಿಯಲ್ಲಿ 73, ಇಂಗ್ಲಿಷ್‌ನಲ್ಲಿ 74, ಗಣಿತದಲ್ಲಿ 82, ವಿಜ್ಞಾನದಲ್ಲಿ 83, ಸಾಮಾಜ ವಿಜ್ಞಾನದಲ್ಲಿ 78, ಹಾಗೂ ಕಂಪ್ಯೂಟರ್​ ಸೈನ್ಸ್​ನಲ್ಲಿ 70 ಅಂಕ ಗಳಿಸಿದ್ದಾರೆ.

ವಿಶೇಷವೆಂದರೆ ಅಯಾನ್ 8ನೇ ತರಗತಿವರೆಗೆ ಮನೆಯಲ್ಲಿಯೇ ಓದಿದ್ದಾನೆ. ಆತನ ತಂದೆ ಮನೋಜ್ ಗುಪ್ತಾ ವೃತ್ತಿಯಲ್ಲಿ ಚಾರ್ಟೆಡ್ ಅಕೌಂಟೆಂಟ್ ಅಗಿದ್ದಾರೆ. ಅವರು ತಮ್ಮ ಮಗನನ್ನು ಒಂದನೇ ತರಗತಿಗೆ ಮಾತ್ರ ಶಾಲೆಗೆ ಕಳುಹಿಸಿದ್ದರು. ಶಾಲೆಯ ಪರಿಸರದ ಬಗ್ಗೆ ಇಷ್ಟವಾಗದ ಕಾರಣ ಮನೆಯಲ್ಲಿಯೇ ಮಗನನ್ನು ಓದಿಸಲು ನಿರ್ಧರಿಸಿದ್ದಾರೆ. ಅವರು ಶಿಕ್ಷಕರು, ಯೂಟ್ಯೂಬ್​ ಹಾಗೂ ವಿವಿಧ ಅಪ್ಲಿಕೇಶನ್​ ಮೂಲಕ ಮನೆಯಲ್ಲಿಯೇ ಮಗನಿಗೆ 8ನೇ ತರಗತಿವರೆಗೆ ಪಾಠ ಹೇಳಿಕೊಟ್ಟಿದ್ದಾರೆ.

ಆದರೆ ಮುಂದಿನ ವಿದ್ಯಾಭ್ಯಾಸಕ್ಕೆ 10ನೇ ತರಗತಿ ಪ್ರಮಾಣ ಪತ್ರ ಅವಶ್ಯಕತೆ ಇದ್ದಿದ್ದರಿಂದ ನಗರದಲ್ಲಿ ವಿವಿಧ ಶಾಲೆಗೆ ಸೇರಿಸಲು ಪ್ರಯತ್ನಿಸಿದ್ದರು. ಆದರೆ ವಯಸ್ಸಿನ ಕಾರಣ ಯಾರು ಸೇರಿಸಿಕೊಳ್ಳಲು ಒಪ್ಪಲಿಲ್ಲ. ಕೊನೆಗೆ ಬುಲಂದ್​ಶಹರ್​ನಲ್ಲಿರುವ ಶಾಲೆಯನ್ನು ಸಂಪರ್ಕಿಸಿದಾಗ, ವಿದ್ಯಾರ್ಥಿಯ ಐಕ್ಯೂ ಮಟ್ಟವನ್ನು ಪರಿಶೀಲಿಸಿ 9ನೇ ತರಗತಿಗೆ ಸೇರಿಸಿಕೊಂಡಿದ್ದಾರೆ.

ಇದೀಗ ಪ್ರಸಕ್ತ ವರ್ಷ ಅಯಾನ್​ 10ನೇ ತರಗತಿ ಪರೀಕ್ಷೆ ಬರೆದಿದ್ದ. ಮಂಗಳವಾರ ಫಲಿತಾಂಶ ಬಂದಿದ್ದು, ಅಯಾನ್ 600ಕ್ಕೆ 460 ಅಂಕ ಪಡೆದು ಪಾಸ್​ ಆಗಿರುವುದು ಕುಟುಂಬದಲ್ಲಿ ಸಂತಸದ ವಾತಾವರಣ ನಿರ್ಮಾಣವಾಗಿದೆ.