Vande Bharat: ದೇಶದ 16ನೇ ವಂದೇ ಭಾರತ್ ರೈಲಿಗೆ ಮುಂದಿನ ವಾರ ಚಾಲನೆ! ಎಲ್ಲಿಂದ ಎಲ್ಲಿಗೆ? ದರದ ಮಾಹಿತಿ ಇಲ್ಲಿದೆ​

ದೇಶದಲ್ಲಿ ಒಂದರ ನಂತರ ಒಂದು ವಂದೇ ಭಾರತ್​ ರೈಲು ವಿವಿದ ರಾಜ್ಯಗಳಲ್ಲಿ ಸಂಚಾರ ಆರಂಭಿಸುತ್ತಿದೆ. ವಂದೇ ಭಾರತ್​ ದೇಶದಲ್ಲಿ ವೇಗವಾಗಿ ವಿಸ್ತರಣೆಯಾಗುತ್ತಿರುವ ಭಾರತೀಯ ರೈಲಾಗಿದೆ.

ರಾಜಸ್ಥಾನ, ಕರ್ನಾಟಕ, ತಮಿಳುನಾಡು, ಆಂದ್ರ-ತೆಲಂಗಾಣ, ಕೇರಳ ಉತ್ತರ ಪ್ರದೇಶ ಹಾಗೂ ಮಹಾರಾಷ್ಟ್ರ ಸೇರಿದಂತೆ ಹಲವು ರಾಜ್ಯಗಳಲ್ಲಿ ವಂದೇ ಭಾರತ್ ಸಂಚಾರ ಆರಂಭಿಸಿದೆ. ಒಟ್ಟು 15 ಸೆಮಿ ಹೈ ಸ್ಪೀಡ್​ ರೈಲುಗಳು ಪ್ರಸ್ತುತ ಕಾರ್ಯಾಚಾರಣೆಯಲ್ಲಿವೆ.

ಜೂನ್ ಅಂತ್ಯದ ವೇಳೆಗೆ ಇನ್ನೂ 5 ಹೊಸ ವಂದೇ ಭಾರತ್​ ರೈಲುಗಳು ಸಂಚಾರ ಆರಂಭಿಸಲಿದೆ ಎಂದು ಭಾರತೀಯ ರೈಲ್ವೆ ತಿಳಿಸಿದೆ. ಮೇ ತಿಂಗಳೇ ಎರಡು ರೈಲುಗಳು ಉದ್ಘಾಟನೆಯಾಗಲಿದೆ. ಮೇ 18ರಂದು  ದೇಶದ 16ನೇ ವಂದೇ ಭಾರತ್​ ರೈಲಿಗೆ ಪಿಎಂ ಮೋದಿ ಚಾಲನೆ ನೀಡಲಿದ್ದಾರೆ.​ ಒಡಿಶಾದ ಭಗವಾನ್ ಜಗನ್ನಾಥ ಪುರಿಯ ದೇವಸ್ಥಾನ ಮತ್ತು ಪಶ್ಚಿಮ ಬಂಗಾಳದ ಕೋಲ್ಕತ್ತಾದ ಕಾಳಿಜಿ ದೇವಸ್ಥಾನಕ್ಕೆ ಭಕ್ತರಿಗೆ ಈ ವಂದೇ ಭಾರತ್ ಎಕ್ಸ್​ಪ್ರೆಸ್​ ನೆರವಾಗಲಿದೆ.

ಬಹುಶಃ ಮೇ 18 ರಂದು ಪುರಿ-ಹೌರಾ ನಡುವಿನ ವಂದೇ ಭಾರತ್ ರೈಲಿನ ಪಿಎಂ ಮೋದಿ ಚಾಲನೆ ನೀಡಲಿದ್ದಾರೆ. ಇದರ ನಂತರ ಇದೇ ತಿಂಗಳು ಕೊನೆಯ ವಾರದಲ್ಲಿ ನ್ಯೂ ಜಲ್ಪೈಗುರಿ-ಗುವಾಹಟಿ ರೈಲಿಗೆ ಚಾಲನೆ ಸಿಗಲಿದೆ.  ಇದು ಈಶಾನ್ಯ ಭಾರತದ ಮೊದಲ ವಂದೇ ಭಾರತ್ ರೈಲು ಆಗಿರುತ್ತದೆ. ಜೂನ್​ನಲ್ಲಿ ನಂತರ ಪಾಟ್ನಾ-ರಾಂಚಿ ಮಾರ್ಗದಲ್ಲಿ ಮತ್ತೊಂದು ವಂದೇ ಭಾರತ್ ರೈಲು ಸಂಚಾರ ಆರಂಭಿಸುವ ನಿರೀಕ್ಷೆಯಿದೆ.

ವರದಿಗಳ ಪ್ರಕಾರ, ಪುರಿ-ಹೌರಾ ವಂದೇ ಭಾರತ್ ಎಕ್ಸ್‌ಪ್ರೆಸ್ ಪಶ್ಚಿಮ ಬಂಗಾಳದ ಹೌರಾದಿಂದ ಬೆಳಿಗ್ಗೆ 5:50 ಕ್ಕೆ ಹೊರಟು ಒಡಿಶಾದ ಪುರಿಗೆ 11:50 ಕ್ಕೆ ತಲುಪುತ್ತದೆ. ಮತ್ತೆ ಮಧ್ಯಾಹ್ನ 2 ಗಂಟೆಗೆ ಪುರಿಯಿಂದ ಹೊರಟು ರಾತ್ರಿ 7:30 ಕ್ಕೆ ಮತ್ತೆ ಹೌರಾ ತಲುಪಲಿದೆ. ಇದು ಒಡಿಶಾದ ಮೊದಲ ವಂದೇ ಭಾರತ್​ ರೈಲಾಗಿದೆ.

ವರದಿಗಳ ಪ್ರಕಾರ ಚೇರ್ ಕಾರ್‌ನ ಟಿಕೆಟ್​ ದರವು 1,590 ( ಊಟದ 308 ರೂ ಸೇರಿದಂತೆ) ಮತ್ತು ಎಕ್ಸಿಕ್ಯುಟಿವ್ ಕ್ಲಾಸ್‌ ಟಿಕೆಟ್​ನ ದರ  2,815 ರೂಪಾಯಿ (ಊಟದ 369 ರೂ ಸೇರಿದಂತೆ) ಇರಲಿದೆ ಎಂದು ನಿರೀಕ್ಷಿಸಲಾಗಿದೆ. ಒಂದು ವೇಳೆ ಊಟ ಬೇಡ ಎಂದರೆ ಅದರ ಮೊತ್ತವನ್ನು ಕಡಿತಗೊಳಿಸಿ ಟಿಕೆಟ್​ ಬೆಲೆ ನಿಗದಿ ಮಾಡಲಾಗುತ್ತದೆ.

ಇನ್ನೂ ಹೌರಾ-ಪುರಿ ಮಾರ್ಗದಲ್ಲಿ ವಂದೇ ಭಾರತ್ ಎಕ್ಸ್‌ಪ್ರೆಸ್ ರೈಲಿನ ಯಶಸ್ವಿ ಟ್ರಯಲ್ಸ್ ನಂತರ, ಒಡಿಶಾ ಸರ್ಕಾರವು ಭುವನೇಶ್ವರ-ಹೈದರಾಬಾದ್, ಪುರಿ-ರಾಯಪುರ ಮತ್ತು ಪುರಿ-ಹೌರಾ ಮಾರ್ಗಗಳಲ್ಲಿ ಹೆಚ್ಚಿನ ಸೆಮಿ ಹೈ ಸ್ಪೀಡ್​ ರೈಲುಗಳ ಸೇವೆಗೆ ಬೇಡಿಕೆ ಇಟ್ಟಿದೆ ಎಂದು ತಿಳಿದುಬಂದಿದೆ