Vande Bharat: ನಾಳೆ ದೇಶದ ಎರಡು ವಂದೇ ಭಾರತ್ ಎಕ್ಸ್​ಪ್ರೆಸ್​ಗಳಿಗೆ ಮೋದಿ ಚಾಲನೆ, ಮಾರ್ಗಗಳ ಬಗ್ಗೆ ತಿಳಿಯಿರಿ

ವಂದೇ ಭಾರತ್ ರೈಲುಗಳು ಈಗಾಗಲೆ ದೇಶದಲ್ಲಿ ಸೆನ್ಸೇಷನ್ ಸೃಷ್ಠಿಸಿವೆ. ಪ್ರಸ್ತುತ 8 ರೈಲುಗಳಯ ಸಂಚಾರ ನಡೆಸುತ್ತಿವೆ. ಇದೀಗ ಶುಕ್ರವಾರ ಮತ್ತೆರಡು ವಂದೇ ಭಾರತ್ (Vande Bharat) ರೈಲುಗಳನ್ನು ಭಾರತೀಯ ರೈಲ್ವೆ ಪ್ರಾರಂಭಿಸುತ್ತಿದೆ. ಮಹಾರಾಷ್ಟ್ರದಲ್ಲಿ ಈ ಎರಡು ಹೊಸ ವಂದೇ ಭಾರತ್​ ರೈಲುಗಳಿಗೆ ಪ್ರಧಾನಿ ನರೇಂದ್ರ ಮೋದಿ (Narendra Modi) ಹಸಿರು ನಿಶಾನೆ ತೋರಲಿದ್ದಾರೆ. ಫೆಬ್ರವರಿ 10 ರಂದು ಕಾರ್ಯಕ್ರಮ ನಡೆಯಲಿದೆ.

ಇಲ್ಲಿಯವರೆಗೆ 8 ವಂದೇ ಭಾರತ್ ರೈಲುಗಳು ಸಂಚಾರ ನಡೆಸುತ್ತಿದ್ದವು. ಇದೀಗ ಮುಂಬೈನಿಂದ ಸೊಲ್ಲಾಪುರ ಮಾರ್ಗದಲ್ಲಿ 9ನೇ ವಂದೇ ಭಾರತ್ ರೈಲು ಆರಂಭಿಸಲಾಗುತ್ತಿದೆ. ಇದರಿಂದ ಮುಂಬೈ ಮತ್ತು ಸೊಲ್ಲಾಪುರ ನಡುವಿನ ಪ್ರಯಾಣದ ಅವಧಿ ಕಡಿಮೆಯಾಗುತ್ತದೆ. ಸೋಲಾಪುರದ ಸಿದ್ದೇಶ್ವರದಿಂದ ಅಕ್ಕಲಕೋಟ, ತುಳಜಾಪುರ, ಪಂದ್ರಾಪುರ, ಆಳಂದಿ ಕಡೆಗೆ ಬರುವ ಜನರಿಗೆ ವಂದೇ ಭಾರತ್ ರೈಲು ಸೇವೆಯನ್ನು ಒದಗಿಸುತ್ತದೆ. 400 ಕಿಮೀ ದೂರವನ್ನು ಇದು 6 ಗಂಟೆ 35 ನಿಮಿಷಗಳಲ್ಲಿ ಕ್ರಮಿಸಲಿದೆ. ಈ ಪ್ರಯಾಣದಲ್ಲಿ ದಾದರ್,ಕಲ್ಯಾಣ್​, ಪಯಣೆ ಹಾಗೂ ಕುರ್ದುವಂಡಿಯಲ್ಲಿ ಮಾತ್ರ ನಿಲ್ಲಿಸಲಿದೆ.

ಮುಂಬೈ-ಸಾಯಿನಗರ ಶಿರಡಿ ಮಾರ್ಗದಲ್ಲಿ ದೇಶದ 10ನೇ ವಂದೇ ಭಾರತ್ ರೈಲು ಸಂಚಾರ ನಡೆಸಲಿದೆ. ಈ ರೈಲು ನಾಸಿಕ್, ತ್ರಯಂಬಕೇಶ್ವರ, ಸಾಯಿನಗರ, ಶಿರಡಿ ಮತ್ತು ಶನಿಶಿಗ್ನಪುರಗಳಿಗೆ ಪ್ರಯಾಣಿಸಲಿದೆ. ಇದು 340 ಕಿಮೀ ದೂರವನ್ನು 5. 24 ಗಂಟೆಗಳಲ್ಲಿ ಕ್ರಮಿಸಲಿದೆ. ಒಟ್ಟು ಮೂರು ನಿಲ್ದಾಣಗಳಲ್ಲಿ ಮಾತ್ರ ನಿಲ್ಲಿಸಲಿದೆ.

ಮಹಾರಾಷ್ಟ್ರದಲ್ಲಿ ಈಗಾಗಲೇ ಒಂದು ವಂದೇ ಭಾರತ್ ರೈಲುಗಳು ಪ್ರಯಾಣವನ್ನು ಆರಂಭಿಸಿದೆ. ಗಾಂಧಿನಗರ ಹಾಗೂ ಮುಂಬೈ ಸೆಂಟ್ರಲ್​ ಮಾರ್ಗದಲ್ಲಿ ಅದು ಸಂಚಾರ ನಡೆಸುತ್ತಿದೆ. ಇದೀಗ ಹೊಸ ವಂದೇ ಭಾರತ್ ರೈಲುಗಳಿಗೆ ಛತ್ರಪತಿ ಶಿವಾಜಿ ಮಹಾರಾಜ್ ಟರ್ಮಿನಸ್‌ನಲ್ಲಿ ಶುಕ್ರವಾರ ಮಧ್ಯಾಹ್ನ 2.45 ಕ್ಕೆ ಚಾಲನೆ ನೀಡಲಾಗುತ್ತದೆ.

ಈ ಎರಡೂ ಸೆಮಿ-ಹೈ ಸ್ಪೀಡ್ ರೈಲುಗಳು ದೇಶದ ಅತ್ಯಂತ ಕಠಿಣ ರೈಲ್ವೆ ಘಾಟ್​ಗಳಾದ ಭೋರ್ ಘಾಟ್ ಮತ್ತು ಥಾಲ್ ಘಾಟ್ ವಿಭಾಗಗಳ ಮೂಲಕ ಹಾದು ಹೋಗುತ್ತವೆ. ಆದರೆ ಟ್ರಯಲ್​ ರನ್​ ಸಮಯದಲ್ಲಿ, ರೈಲುಗಳು ಘಾಟ್‌ಗಳಲ್ಲಿ ಯಾವುದೇ ಬೆಂಬಲವಿದಲ್ಲದೆ ಯಶಸ್ವಿಯಾಗಿ ದಾಟಿದವು. ರೈಲು ರೋಲ್​ಬ್ಯಾಕ್​ ಆಗುವ ಘಟನೆಗಳನ್ನು ತಪ್ಪಿಸುವುದಕ್ಕಾಗಿ ರೈಲ್ವೆ ಮುಂಬೈ ಕಡೆಯಿಂದ ಎಲ್ಲಾ ರೈಲುಗಳಲ್ಲಿ ಬ್ಯಾಂಕರ್‌ಗಳನ್ನು ಬಳಸುತ್ತದೆ.

ಪ್ರಸ್ತುತ 8 ವಂದೇ ಭಾರತ್ ರೈಲುಗಳು ವಿವಿಧ ಮಾರ್ಗಗಳಲ್ಲಿ ಸಂಚರಿಸುತ್ತಿವೆ. ವಂದೇ ಭಾರತ್ ರೈಲುಗಳು ನವದೆಹಲಿ-ವಾರಣಾಸಿ, ನವದೆಹಲಿ-ಕತ್ರಾ, ಗಾಂಧಿನಗರ-ಮುಂಬೈ ಸೆಂಟ್ರಲ್, ನವದೆಹಲಿ-ಅಂಬ ಅಂಡೌರಾ, ಚೆನ್ನೈ-ಮೈಸೂರು, ಬಿಲಾಸ್‌ಪುರ-ನಾಗ್ಪುರ, ಹೌರಾ-ಹೊಸ ಜಲ್ಪೈಗುರಿ ಜಂಕ್ಷನ್, ಸಿಕಂದರಾಬಾದ್-ವಿಶಾಖಪಟ್ಟಣಂ ಮಾರ್ಗಗಳಲ್ಲಿ ಸಂಚರಿಸುತ್ತಿವೆ.

ಶೀಘ್ರದಲ್ಲೇ ಇನ್ನೂ ಹಲವು ಮಾರ್ಗಗಳಲ್ಲಿ ವಂದೇ ಭಾರತ್ ರೈಲುಗಳು ಪ್ರಾರಂಭವಾಗಲಿವೆ. ಪುರಿ-ಹೌರಾ, ಸಿಕಂದರಾಬಾದ್-ತಿರುಪತಿ, ಸಿಕಂದರಾಬಾದ್-ಬೆಂಗಳೂರು ಮತ್ತು ಸಿಕಂದರಾಬಾದ್-ಪುಣೆ ಮಾರ್ಗಗಳಲ್ಲಿ ವಂದೇ ಭಾರತ್ ರೈಲುಗಳು ಪ್ರಾರಂಭವಾಗುವ ಸಾಧ್ಯತೆಯಿದೆ.