Millets Food Festival: ಇಂದು ಪಾರ್ಲಿಮೆಂಟ್​ನಲ್ಲಿ ಸಂಸದರಿಗೆ ಸಿರಿಧಾನ್ಯ ಭೋಜನ- ಏನೆಲ್ಲಾ ಮೆನು ಇದೆ ಗೊತ್ತೇ?

ಅಂತರಾಷ್ಟ್ರೀಯ ಸಿರಿಧಾನ್ಯಗಳ ವರ್ಷ-2023ರ ಆಚರಣೆಗಾಗಿ ಕೇಂದ್ರ ಸರ್ಕಾರವು ಇಂದು ಸಂಸತ್​ನಲ್ಲಿ ವಿಶೇಷ ಕಾರ್ಯಕ್ರಮವೊಂದನ್ನು ಆಯೋಜಿಸಿದೆ. ಅದೇ ಸಿರಿಧಾನ್ಯ ಆಹಾರ ಉತ್ಸವ.

ಈ ಕಾರ್ಯಕ್ರಮದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಭಾಗಿಯಾಗಲಿದ್ದು, ಉತ್ಸವಕ್ಕೆ ಹೆಚ್ಚಿನ ಮೆರಗು ಬರಲಿದೆ.

ಕೇಂದ್ರ ಕೃಷಿ ಸಚಿವ ನರೇಂದ್ರ ಸಿಂಗ್ ಥೋಮರ್ ಅವರು ಲೋಕಸಭೆ ಮತ್ತು ರಾಜ್ಯಸಭೆ ಸದಸ್ಯರಿಗೆ ಈ ವಿಶೇಷ ಸಿರಿಧಾನ್ಯ ಭೋಜನವನ್ನು ಆಯೋಜಿಸಿದ್ದಾರೆ.

ಸಂಸತ್​ನ ಆವರಣದಲ್ಲಿ ಈ ವಿಶೇಷ ಭೋಜನ ಕೂಟವನ್ನು ಏರ್ಪಡಿಸಲಾಗಿದ್ದು, ದೇಶದ ಎಲ್ಲಾ ಸಂಸತ್​ ಸಂಸದರೂ ಈ ಕಾರ್ಯಕ್ರಮದಲ್ಲಿ ಭಾಗಿಯಾಗಲಿದ್ದಾರೆ.

ಈ ಸಿರಿಧಾನ್ಯ ಭೋಜನ ಕಾರ್ಯಕ್ರಮದಲ್ಲಿ ವಿಶೇಷವಾಗಿ ಕರ್ನಾಟಕದ ರಾಗಿ ಭೋಜನವನ್ನು ಉಣಬಡಿಸಲಾಗುತ್ತದೆ. ಹೀಗಾಗಿ ಕರ್ನಾಟಕದ ಬಾಣಸಿಗರು ಈಗಾಗಲೇ ದೆಹಲಿಗೆ ತೆರಳಿದ್ದಾರೆ. ಅಲ್ಲಿ ಅವರು ರಾಗಿ ಇಡ್ಲಿ, ರಾಗಿ ದೋಸೆ ಸೇರಿದಂತೆ, ಸಿರಿಧಾನ್ಯಗಳ ವಿಶೇಷ ಖಾದ್ಯಗಳನ್ನು ತಯಾರಿಸಲಿದ್ದಾರೆ.

ಇಷ್ಟೇ ಅಲ್ಲದೇ, ಉತ್ತರ ಕರ್ನಾಟಕದ ಫೇಮಸ್ ಜೋಳದ ರೊಟ್ಟಿ, ದಕ್ಷಿಣ ಕರ್ನಾಟಕದ ರಾಗಿ ರೊಟ್ಟಿ, ಸಜ್ಜೆ ಕಿಚಡಿ, ಜೋಳದ ಕಿಚಡಿ, ಸಜ್ಜೆ ಪಾಯಸ.. ಹೀಗೆ ಸಿರಿಧಾನ್ಯಗಳಿಂದಲೇ ಅನೇಕ ಖಾದ್ಯಗಳನ್ನು ರುಚಿಯಾಗಿ ಉಣಬಡಿಸಲಿದ್ದಾರೆ.

ಈ ಕಾರ್ಯಕ್ರಮವನ್ನು ಸಿರಿಧಾನ್ಯ ಸೇವನೆಯ ಸಂಸ್ಕೃತಿಗೆ ಉತ್ತೇಜನ ನೀಡುವ ಸಲುವಾಗಿ ಆಯೋಜಿಸಲಾಗಿದೆ. ಪ್ರಧಾನಿ ಮೋದಿ ಸೇರಿದಂತೆ, ಎಲ್ಲಾ ಸಂಸತ್ ಸದಸ್ಯರು ಈ ಸಿರಿಧಾನ್ಯ ಭೋಜನ ಕಾರ್ಯಕ್ರಮದಲ್ಲಿ ಭಾಗವಹಿಸಿ ಕರುನಾಡಿನ ಊಟ ಸವಿಯಲಿದ್ದಾರೆ.