Naegleria Fowleri: ನಲ್ಲಿ ನೀರು ಬಳಸೋ ಮುನ್ನ ಎಚ್ಚರ! ಮೆದುಳು ತಿನ್ನೋ ಕಾಯಿಲೆ ಬಂದಿದೆ! ಯಾಮಾರಿದ್ರೆ ಸಾವು ಗ್ಯಾರಂಟಿ!

ಮೂಗಿನ ಮೂಲಕ ದೇಹ ಪ್ರವೇಶಿಸುವ ಅಮೀಬಾ ನಂತರ ಮೆದುಳಿನ ಕಡೆಗೆ ಚಲಿಸುತ್ತದೆ. ಬಳಿಕ ಹಂತಹಂತವಾಗಿ ಮೆದುಳಿನ ಅಂಗಾಂಶವನ್ನು ನಾಶಪಡಿಸುತ್ತದೆ. ಆಗ ಇದು ನೆಗ್ಲೇರಿಯಾ ಫೌಲೆರಿ ಕಾಯಿಲೆಯ ಪ್ರಾಥಮಿಕ ಹಂತವಾದ ಅಮೀಬಿಕ್ ಮೆನಿಂಗೊಯೆನ್ಸೆಫಾಲಿಟಿಸ್ ಎಂಬ ಹಾನಿಕಾರಕ ಸೋಂಕನ್ನು ಉಂಟು ಮಾಡುತ್ತದೆ. ಈ ಸೋಂಕು ಪ್ರಾಣಕ್ಕೆ ಹಾನಿಯನ್ನುಂಟು ಮಾಡುವ ಸಾಧ್ಯತೆ ಹೆಚ್ಚಿದೆ.

ಈ ಸೋಂಕಿನ ಆರಂಭಿಕ ಲಕ್ಷಣಗಳು ತಲೆನೋವು, ಜ್ವರ, ವಾಕರಿಕೆ, ವಾಂತಿ, ದೇಹದಲ್ಲಿ ಬ್ಯಾಲೆನ್ಸ್ ತಪ್ಪುವುದು, ದಿಗ್ಭ್ರಮೆ, ಪದೇ ಪದೇ ಹುಷಾರಿಲ್ಲದೇ ಆಗುವುದು, ಕತ್ತು ಬಿಗಿಯಾಗುವುದು ಈ ಲಕ್ಷಣಗಳು ಕಾಣಿಸಿಕೊಳ್ಳುತ್ತದೆ. ರೋಗ ಗಂಭೀರ ಹಂತಕ್ಕೆ ತಲುಪಿದರೆ ಮಾನಸಿಕ ಸ್ಥಿತಿ ಹದಗೆಡುವುದು, ಭ್ರಮೆಯಲ್ಲಿ ಇರುವುದು ಮತ್ತು ಕೋಮಾಗೆ ಜಾರುವ ಸನ್ನಿವೇಶವೂ ಉಂಟಾಗಬಹುದು.

ಅಂದಹಾಗೆ ಈ ರೋಗಕ್ಕೆ ತುತ್ತಾದವರ ಪೈಕಿ 97% ಜನರು ಸಾವನ್ನಪ್ಪಿದ್ದಾರೆ ಎಂದು ವರದಿ ಹೇಳುತ್ತಿದ್ದು, 1962-2021ರ ತನಕ ಅಮೆರಿಕಾದಲ್ಲಿ ಒಟ್ಟು 154 ಮಂದಿ ಈ ರೋಗಕ್ಕೆ ಗುರಿಯಾಗಿದ್ದರು. ಆ ಪೈಕಿ ಕೇವಲ ನಾಲ್ಕು ರೋಗಿಗಳು ಮಾತ್ರ ಬದುಕುಳಿದಿದ್ದಾರೆ ಎಂದು ದಾಖಲೆಗಳು ಹೇಳುತ್ತಿವೆ. ಮಾಧ್ಯಮಗಳ ವರದಿ ಪ್ರಕಾರ, ಈಗ ಈ ಕಾಯಿಲೆಯಿಂದ ಸತ್ತಿರುವ ಫ್ಲೋರಿಡಾದ ವ್ಯಕ್ತಿಯ ಪ್ರಕರಣವು ಅಮೆರಿಕಾದಲ್ಲಿ ಚಳಿಗಾಲಕ್ಕೆ ಮೊದಲು ಸಂಭವಿಸಿದ ಮೊದಲ ಪ್ರಕರಣ ಆಗಿದೆ ಎಂದು ತಿಳಿದು ಬಂದಿದೆ.

ಇನ್ನು ನೆಗ್ಲೆರಿಯಾ ಫೌಲೆರಿ ಕಾಯಿಲೆಯಿಂದ ವ್ಯಕ್ತಿಯೊಬ್ಬ ಮೃತಪಟ್ಟ ನಂತರ ಷಾರ್ಲೆಟ್‌ ಕೌಂಟಿ ನಿವಾಸಿಗಳಿಗೆ ಟ್ಯಾಪ್ ನಿರಿನಲ್ಲಿ ಮುಖ ಮತ್ತು ಮೂಗು ತೊಳೆಯುವುದನ್ನು ನಿಲ್ಲಿಸುವಂತೆ ಖ್ಯಾತ ವೈದ್ಯ ಡಾ.ಮೊಬೀನ್ ರಾಥೋರ್ ಅವರು ಸಲಹೆ ನೀಡಿದ್ದಾರೆ. ಅನಿವಾರ್ಯ ಸಂದರ್ಭಗಳಲ್ಲಿ ನೀರನ್ನು ಕುದಿಸಿ ನಂತರ ಬಳಸುವಂತೆ ಅವರು ಸಲಹೆ ನೀಡಿದ್ದಾರೆ.

ಮೆದುಳು ತಿನ್ನುವ ಅಮೀಬಾ ಎಂದರೇನು?: ಮೆದುಳನ್ನು ತಿನ್ನುವ ಅಮೀಬಾ ಎಂದು ಕರೆಯಲ್ಪಡುವ ನೆಗ್ಲೇರಿಯಾ ಫೌಲೆರಿ ಎನ್ನುವ ಸೂಕ್ಷ್ಮಾಣು ಜೀವಿ ಏಕಕೋಶಿಯಾ ಜೀವಿಯಾಗಿದ್ದು, ಇದು ಸೂಕ್ಷ್ಮದರ್ಶಕಗಳನ್ನು ಬಳಸಿದರೆ ಮಾತ್ರ ಗೋಚರಿಸುತ್ತದೆ. ಈ ವೈರಾಣು ಸರೋವರಗಳು, ನದಿ ಮತ್ತು ಮಣ್ಣನಲ್ಲೂ ಬದುಕುತ್ತವೆ.

ಸೋಂಕು ಹೇಗೆ ತಗುಲುತ್ತದೆ?: ಸರೋವರಗಳು ಮತ್ತು ನದಿಗಳಲ್ಲಿ ಈಜಾಡುವಾಗ ಅಥವಾ ಡೈವಿಂಗ್‌ ಮಾಡುವಾಗ ದೇಹ ಪ್ರವೇಶಿಸುವ ಸೋಂಕು, ಮನುಷ್ಯರನ್ನು ಸಂಪರ್ಕ ಮಾಡಿದಾಗ ವ್ಯಕ್ತಿಯಿಂದ ವ್ಯಕ್ತಿಗೆ ಹರಡುತ್ತದೆ. ನಲ್ಲಿ ನೀರಿನಲ್ಲಿ ಮುಖ, ಮೂಗು ತೊಳೆಯುವುದರಿಂದಲೂ ಈ ಸೋಂಕು ದೇಹ ಪ್ರವೇಶಿಸುವ ಸಾಧ್ಯತೆ ಹೆಚ್ಚಿರುತ್ತದೆ.

ನೆಗ್ಲೇರಿಯಾ ಫೌಲೆರಿ ಸೋಂಕು ಅತ್ಯಂತ ಅಪರೂಪವಾಗಿದ್ದು, ಇದು ಕಲುಷಿತಗೊಂಡ ನೀರನ್ನು ಬಳಸುವುದರಿಂದ ಅದರಲ್ಲಿದ್ದ ಅಮೀಬಾ ಮೂಗಿನ ಮೂಲಕ ದೇಹವನ್ನು ಪ್ರವೇಶಿಸಿದಾಗ ಮಾತ್ರ ಸಂಭವಿಸುತ್ತದೆ ಎಂದು ಫ್ಲೋರಿಡಾ ಆರೋಗ್ಯ ಇಲಾಖೆ ಟ್ವೀಟ್ ಮೂಲಕ ತಿಳಿಸಿದೆ. ಅಚ್ಚರಿಯ ವಿಷಯ ಅಂದ್ರೆ ಕಲುಷಿತ ನೀರು ಕುಡಿಯುವುದರಿಂದ ವ್ಯಕ್ತಿಗೆ ಸೋಂಕು ತಗುಲುವುದಿಲ್ಲ, ಆದರೆ ಆ ನೀರು ಮೂಗಿಗೆ ಪ್ರವೇಶಿಸಿದಾಗ ಮಾತ್ರ ಸೋಂಕು ದೇಹ ಪ್ರವೇಶಿಸುತ್ತದೆ. ಇನ್ನು ಇದು ಉಪ್ಪು ನೀರಿನಲ್ಲಿ ಕಂಡುಬರುವುದಿಲ್ಲ ಎಂದು ಅಮೆರಿಕಾದ ಸೆಂಟರ್ಸ್ ಫಾರ್ ಡಿಸೀಸ್ ಕಂಟ್ರೋಲ್ ಅಂಡ್ ಪ್ರಿವೆನ್ಷನ್ ತಿಳಿಸಿದೆ.

ನೆಗ್ಲೇರಿಯಾ ಫೌಲೆರಿಗೆ ಕಾಯಿಲೆಗೆ ಔಷಧ ಇದೆಯೇ?: ಇನ್ನು ಈ ಕಾಯಿಲೆಯನ್ನು ತಡೆಗಟ್ಟಲು ಕೆಲವು ಚಿಕಿತ್ಸೆ, ಔಷಧಗಳನ್ನು ನೀಡಿ ನಿಯಂತ್ರಿಸಬಹುದಾದರೂ, ದೀರ್ಘಕಾಲೀನ ಪರಿಣಾಮಕಾರಿ ಚಿಕಿತ್ಸೆಯನ್ನು ಇನ್ನೂ ಕಂಡುಹುಡುಕಿಲ್ಲ. ಸದ್ಯ, PAM ಅನ್ನು ಆಂಫೋಟೆರಿಸಿನ್ ಬಿ, ಅಜಿಥ್ರೊಮೈಸಿನ್, ಫ್ಲುಕೋನಜೋಲ್, ರಿಫಾಂಪಿನ್, ಮಿಲ್ಟೆಫೋಸಿನ್ ಮತ್ತು ಡೆಕ್ಸಾಮೆಥಾಸೊನ್ ಸೇರಿದಂತೆ ಇತರ ಔಷಧಿಗಳನ್ನು ನೀಡಲಾಗುತ್ತಿದೆ ಎಂದು ಆರೋಗ್ಯ ಇಲಾಖೆ ತಿಳಿಸಿದೆ.