Relationship: ಪ್ರಿಯತಮೆಯನ್ನು ಗಂಡನಿಂದ ಬೇರ್ಪಡಿಸಿ ತನಗೆ ಒಪ್ಪಿಸುವಂತೆ ನ್ಯಾಯಾಲಯದ ಮೊರೆ ಹೋದ ಪ್ರಿಯತಮ! ಕೋರ್ಟ್​ ಕೊಟ್ಟ ತೀರ್ಪು ಹೀಗಿದೆ?

ಭಾರತೀಯ ಸಂಪ್ರದಾಯ ಬಹಳ ಶ್ರೀಮಂತವಾಗಿದೆ. ಆದರೆ ಜಾಗತೀಕರಣದ ಹಿನ್ನೆಲೆಯಲ್ಲಿ ಇಲ್ಲಿ ವಿದೇಶಿ ಸಂಸ್ಕೃತಿಯ ಪ್ರಭಾವ ಇಲ್ಲಿನ ಜನರ ಮೇಲೆ ಹೆಚ್ಚುತ್ತಿದೆ. ಇತ್ತೀಚಿನ ದಿನಗಳಲ್ಲಿ ಮೆಟ್ರೋ ಸಿಟಿಗಳಲ್ಲಿ ಲಿವ್ ಇನ್ ರಿಲೇಶನ್ ಶಿಪ್ ಸಂಸ್ಕೃತಿ ಹೆಚ್ಚಾಗಿ ಕಾಣುತ್ತಿದೆ. ಈ ಪ್ರವೃತ್ತಿ ಬೆಳೆದಂತೆ, ಇದು ಹೊಸ ಸಮಸ್ಯೆಗಳನ್ನು ಹುಟ್ಟುಹಾಕುತ್ತಿದೆ.

ತನ್ನೊಂದಿಗೆ ರಿಲೇಷನ್​ಶಿಪ್​ನಲ್ಲಿದ್ದ ಮಹಿಳೆಯನ್ನು ಆಕೆಯ ಪತಿ ಮತ್ತು ಕುಟುಂಬಸ್ಥರು ಕರೆದುಕೊಂಡು ಹೋಗಿದ್ದಾರೆ ಎಂದು ವ್ಯಕ್ತಿಯೊಬ್ಬ ನ್ಯಾಯಾಲಯದಲ್ಲಿ ಪ್ರಕರಣ ದಾಖಲಿಸಿದ್ದಾನೆ. ಈ ಸಂಬಂಧ ಹೇಗೆ ಸಾಧ್ಯ ಎಂದು ಕೇಳಿದರೆ, ನಾವಿಬ್ಬರು ಸಹಜೀವನ ಹೊಂದಿದ್ದು, ಅಗ್ರಿಮೆಂಟ್​ ಮಾಡಿಕೊಂಡಿದ್ದೇವೆ ಎಂದು ಉತ್ತರಿಸಿದ್ದಾನೆ. ಈ ವಿಚಿತ್ರ ಪ್ರಕರಣಕ್ಕೆ ಕೋರ್ಟ್ ಮಹತ್ವ ತೀರ್ಪು ನೀಡಿದೆ.

ಗುಜರಾತ್ ರಾಜ್ಯದ ಬನಸ್ಕಂತ ಜಿಲ್ಲೆಯ ವ್ಯಕ್ತಿಯೊಬ್ಬ ಮಹಿಳೆಯೊಂದಿಗೆ ಲಿವ್ ಇನ್ ರಿಲೇಶನ್​ಶಿಪ್ ನಲ್ಲಿದ್ದ. ಆ ಮಹಿಳೆ ಈ ಹಿಂದೆ ಬೇರೊಬ್ಬ ವ್ಯಕ್ತಿಯೊಂದಿಗೆ ಮದುವೆಯಾಗಿದ್ದಳು. ಆದರೆ ಪತಿಯೊಂದಿಗಿನ ಭಿನ್ನಾಭಿಪ್ರಾಯದಿಂದಾ ಕುಟುಂಬದಿಂದ ದೂರವಾಗಿದ್ದಳು. ನಂತರ ಅರ್ಜಿದಾರನ ಜೊತೆ ಸಹಬಾಳ್ವೆಗೆ ಸಂಬಂಧಿಸಿದಂತೆ ಒಪ್ಪಂದ ಮಾಡಿಕೊಂಡು ವಾಸಮಾಡುತ್ತಿದ್ದಳು. ಹೀಗಿರುವಾಗ ಕೆಲವು ದಿನಗಳ ನಂತರ ಮಹಿಳೆಯ ಕುಟುಂಬಸ್ಥರು ಬಂದು ಆಕೆಯನ್ನು ಕರೆದುಕೊಂಡು ಹೋಗಿದ್ದಾರೆ. ನಂತರ ಆಕೆಯ ಗೆಳೆಯ ಗುಜರಾತ್ ಹೈಕೋರ್ಟ್‌ನಲ್ಲಿ ಹೇಬಿಯಸ್ ಕಾರ್ಪಸ್ ಅರ್ಜಿ ಸಲ್ಲಿಸಿದ್ದಾರೆ.

ಈ ಅರ್ಜಿಯಲ್ಲಿ, ಮಹಿಳೆಯ ಪ್ರಿಯಕರ, ತನ್ನ ಪ್ರಿಯತಮೆಯ ಇಚ್ಛೆಗೆ ವಿರುದ್ಧವಾಗಿ ಆಕೆಯ ಮದುವೆ ಮಾಡಲಾಗಿದೆ.  ಅವರಿಬ್ಬರ ಮಧ್ಯೆ ಸಂಬಂಧ ಸರಿಯಿಲ್ಲದ ಕಾರಣ  ಒಟ್ಟಿಗೆ ವಾಸಿಸಲು ಸಾಧ್ಯವಿಲ್ಲ. ಹಾಗಾಗಿಯೇ ಆಕೆ ತನ್ನೊಂದಿಗೆ ಇದ್ದಳು. ನಾವಿಬ್ಬರು ಒಟ್ಟಿಗೆ ಇರಲು ಅಗ್ರಿಮೆಂಟ್​ ಮಾಡಿಕೊಂಡಿದ್ದೇವೆ ಎಂದು ನ್ಯಾಯಾಲಯಕ್ಕೆ ವಿವರಿಸಿದ್ದಾನೆ.

ಆದರೆ ಈಗ ಆಕೆಯನ್ನು ಬಲವಂತವಾಗಿ ಕರೆದೊಯ್ದು ಪತಿಯೊಂದಿಗೆ ಇರಿಸಲಾಗಿದೆ. ಅವಳನ್ನು ಅಲ್ಲಿಂದ ಬಿಡಿಸಬೇಕೆಂದು ಕೇಳಿಕೊಂಡಿದ್ದಾನೆ. ಗೆಳತಿಯೊಂದಿಗೆ ತಾನು ಮಾಡಿಕೊಂಡಿರುವ ಸಹಜೀವನದ​ ಒಪ್ಪಂದದ ಪಕ್ರಾರ ಆಕೆಯನ್ನು ತನಗೆ ಒಪ್ಪಿಸಬೇಕು ಎಂದು ವಾದಿಸಿದ್ದಾನೆ.

ಗುಜರಾತ್ ಹೈಕೋರ್ಟ್‌ನಲ್ಲಿ ದಾಖಲಾಗಿರುವ ಈ ಪ್ರಕರಣವನ್ನು ನ್ಯಾಯಮೂರ್ತಿ ವಿಎಂ ಪಾಂಚೋಲಿ ಮತ್ತು ನ್ಯಾಯಮೂರ್ತಿ ಪ್ರಚಕ್ ಅವರನ್ನೊಳಗೊಂಡ ಪೀಠವು ವಿಚಾರಣೆ ನಡೆಸಿತು. ಈ ಅರ್ಜಿ ಸಲ್ಲಿಸಲು ಅರ್ಜಿದಾರರಿಗೆ ಯಾವುದೇ ಹಕ್ಕಿಲ್ಲ ಎಂದು ನ್ಯಾಯಾಲಯ ಹೇಳಿದೆ. ಪತ್ನಿ ಪತಿಯೊಂದಿಗೆ ಇರುವುದು ಅಕ್ರಮ ಬಂಧನಕ್ಕೆ ಬರುವುದಿಲ್ಲ ಎಂದು ತೀರ್ಪು ನೀಡಿದೆ. ಪತಿ-ಪತ್ನಿಯರ ನಡುವಿನ ಭಿನ್ನಾಭಿಪ್ರಾಯಗಳ ಹೊರತಾಗಿ ಇಬ್ಬರೂ ವಿಚ್ಛೇದನ ಪಡೆದಿಲ್ಲ ಎಂದು ಕೋರ್ಟ್​ ಹೇಳಿದೆ.

ಅರ್ಜಿದಾರ ಮಹಿಳೆ ಜೊತೆ ಮದುವೆಯಾಗಿಲ್ಲ, ಹಾಗಾದರೆ ಮಹಿಳೆ ಮೇಲೆ ಆತನಿಗೆ ಯಾವ ಹಕ್ಕಿಲ್ಲ ಎಂದು ಕೋರ್ಟ್​ ಪ್ರಶ್ನಿಸಿದೆ. ಅಲ್ಲದೆ ಅವರಿಬ್ಬರು ಮಾಡಿಕೊಂಡಿರುವ ಒಪ್ಪಂದವು ಅಮಾನ್ಯವಾಗಿದೆ ತಿಳಿಸಿದೆ. ಜತೆಗೆ ಪ್ರಕರಣ ದಾಖಲಿಸಿದ ಅರ್ಜಿದಾರನಿಗೆ  5 ಸಾವಿರ ರೂ. ಮೊತ್ತವನ್ನು ರಾಜ್ಯ ಕಾನೂನು ಸೇವೆಗಳ ಪ್ರಾಧಿಕಾರದಲ್ಲಿ ಠೇವಣಿ ಇಡುವಂತೆ ತೀರ್ಪುನೀಡಿದೆ.