ಕೇರಳ - ತಮಿಳುನಾಡು ಗಡಿಯ ಸೇತುವೆ ಮೇಲೆ ದಾಂಪತ್ಯ ಸೇತುವೆ ನಿರ್ಮಿಸಿದ ನವಜೋಡಿ

ಮದುವೆ ಸ್ವರ್ಗದಲ್ಲೇ ನಿಶ್ಚಯವಾಗಿರುತ್ತದೆ ಎಂಬ ಮಾತಿದೆ. ಆದರೆ ಮದುವೆ ನ್ಯಾಷನಲ್ ಹೈವೇನಲ್ಲಿ ಕೂಡ ನಿಶ್ಚಯವಾಗಲು ಸಾಧ್ಯವಿದೆ ಎಂದು ತೋರಿಸಿಕೊಟ್ಟಿದ್ದಾರೆ ಕೇರಳ-ತಮಿಳುನಾಡಿನ ಈ ಜೋಡಿ.

ಲಾಕ್​ಡೌನ್​ನಿಂದಾಗಿ ಸಾಕಷ್ಟು ಮದುವೆಗಳು ಮುಂದಕ್ಕೆ ಹೋಗಿವೆ, ಎಲ್ಲ ಸಿದ್ಧತೆಗಳೂ ಆಗಿದ್ದ ಮದುವೆಗಳು ತಾತ್ಕಾಲಿಕವಾಗಿ ನಿಂತುಹೋಗಿವೆ. ಕೊರೋನಾದಿಂದಾಗಿ ಒಂದು ರಾಜ್ಯದಿಂದ ಮತ್ತೊಂದು ರಾಜ್ಯಕ್ಕೆ ಹೋಗಲು ಕೂಡ ಕಷ್ಟಪಡುವಂತಾಗಿದೆ. ಇದೇ ಕಾರಣಕ್ಕೆ ಕೇರಳ- ತಮಿಳುನಾಡಿನ ನವಜೋಡಿ ಗಡಿಯಲ್ಲಿನ ಸೇತುವೆ ಮೇಲೆ ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದಾರೆ.

ಕೇರಳ- ತಮಿಳುನಾಡು ಗಡಿಯಾಗಿರುವ ಇಡುಕ್ಕಿ ಜಿಲ್ಲೆಯ ಚಿನ್ನಾರ್​ನಲ್ಲಿ ಸೇತುವೆಯ ಮೇಲೆ ಎರಡೂ ರಾಜ್ಯಗಳ ವಧುವರರ ಕುಟುಂಬಸ್ಥರು ಸೇರಿ ರಸ್ತೆಯಲ್ಲೇ ಮದುವೆ ಮಾಡಿಸಿದ್ದಾರೆ. ಎರಡೂ ರಾಜ್ಯಗಳ ಅಧಿಕಾರಿಗಳ ಒಪ್ಪಿಗೆ ಪಡೆದು ಈ ಮದುವೆ ಮಾಡಿಸಲಾಗಿದೆ.

ಕೇರಳದ ಗಡಿಯಲ್ಲಿರುವ ಸೇತುವೆ ಈ ಅಪರೂಪದ ಮದುವೆಗೆ ಸಾಕ್ಷಿಯಾಯಿತು. ಚಿನ್ನಾರ್​ ವನ್ಯಜೀವಿ ಅಭಯಾರಣ್ಯದ ಸೇತುವೆಯಲ್ಲಿ ಯಾವುದೇ ಪುರೋಹಿತರಿಲ್ಲದೆ, ಕುಟುಂಬಸ್ಥರು ಹಾಗೂ ಪೊಲೀಸರು, ಆರೋಗ್ಯಾಧಿಕಾರಿಗಳ ಸಮ್ಮುಖದಲ್ಲಿ ಮದುವೆ ನಡೆಯಿತು.

ಕೇರಳದ ಮಟ್ಟುಪೆಟ್ಟಿಯ ಶೇಖರ್-ಶಾಂತಲಾ ಅವರ ಮಗಳು ಪ್ರಿಯಾಂಕಾ, ತಮಿಳುನಾಡಿನ ಕೊಯಮತ್ತೂರಿನ ಮೂರ್ತಿ-ಭಾಗ್ಯಲಕ್ಷ್ಮೀ ಅವರ ಮಗ ರಾಬಿನ್ಸನ್​ ಇಬ್ಬರೂ ನಡುರಸ್ತೆಯಲ್ಲಿ ಮದುವೆ ಆಗಿದ್ದಾರೆ.

ಮಾರ್ಚ್ 22ರಂದು ಇವರಿಬ್ಬರ ಮದುವೆ ನಡೆಯಬೇಕಿತ್ತು. ಆದರೆ, ಲಾಕ್​ಡೌನ್​ನಿಂದಾಗಿ ಆ ಮದುವೆಯನ್ನು ಮುಂದೂಡಲಾಗಿತ್ತು.

ಹೀಗಾಗಿ, ಸೋಮವಾರ ಈ ಮದುವೆಗೆ ಉತ್ತಮವಾದ ಮುಹೂರ್ತ ಇರುವುದಾಗಿ ಹೇಳಿದ್ದರಿಂದ ಸರಳವಾಗಿ ಮದುವೆ ಮಾಡಲು ಕುಟುಂಬಸ್ಥರು ನಿರ್ಧರಿಸಿದ್ದರು.

ಯಾವುದೇ ವೇದಿಕೆಯಿಲ್ಲದೆ, ಮಂತ್ರೋಚ್ಛಾರವಿಲ್ಲದೆ, ಪುರೋಹಿತರಿಲ್ಲದೆ ಕೆಲವೇ ಕೆಲವು ಆಪ್ತರ ಸಮ್ಮುಖದಲ್ಲಿ ವಧು-ವರರ ಹಾರ ಬದಲಾಯಿಸಿಕೊಂಡು ಮದುವೆಯಾದರು.

ಮದುವೆ ವೇಳೆ ಹೆಚ್ಚು ಜನರು ಸೇರಬಾರದು ಎಂಬ ನಿಯಮವಿರುವ ಕಾರಣ ಆರೋಗ್ಯ ಅಧಿಕಾರಿಗಳು, ಪೊಲೀಸರ ಸಮ್ಮುಖದಲ್ಲೇ ಮದುವೆ ಮಾಡಲಾಯಿತು.

ವರನ ಕಡೆಯ 2, ವಧುವಿನ ಕಡೆಯ 12 ಜನರು ಮದುವೆಯಲ್ಲಿ ಪಾಲ್ಗೊಂಡಿದ್ದರು

ಕೇರಳದ ವಧುವಿನ ಮನೆಯವರು ಮದುವೆಗೆ ತಮಿಳುನಾಡಿನ ಬಾರ್ಡರ್ ದಾಟಿ ಹೋಗಲು ಅನುಮತಿ ಸಿಗದ ಕಾರಣ ಗಡಿಯಲ್ಲೇ ಮದುವೆ ಮಾಡಲಾಯಿತು. ಕೊನೆಗೆ, ಮದುಮಗಳು ಪಾಸ್​ ಪಡೆದು, ಕೊಯಮತ್ತೂರಿನಲ್ಲಿರುವ ಗಂಡನ ಮನೆಗೆ ತೆರಳಿದಳು.