Liquor Seller: ಬಿಯರ್‌ ಬಾಟಲ್‌ಗೆ 10 ರೂಪಾಯಿ ಹೆಚ್ಚುವರಿ ವಸೂಲಿ ಮಾಡುತ್ತಿದ್ದ ಬಾರ್ ಮಾಲೀಕ ಅಂದರ್; 75000 ದಂಡ!

ಉತ್ತರ ಪ್ರದೇಶದ ಬಿಸ್ರಾಖ್‌ನ ರೋಜಾ ಜಲಾಲ್‌ಪುರ ಪ್ರದೇಶದ ಮದ್ಯದ ಅಂಗಡಿಯಲ್ಲಿ ಈ ಘಟನೆ ನಡೆದಿದ್ದು, ಕಳೆದ ಅನೇಕ ಮದ್ಯದಂಗಡಿ ಮಾಲೀಕ ರವಿ ಸಿಂಗ್‌, ಗ್ರಾಹಕರು ಖರೀದಿಸುವ ಮದ್ಯಕ್ಕೆ 10ರಿಂದ 20 ರೂಪಾಯಿ ತನಕ ಹೆಚ್ಚುವರಿ ವಸೂಲಿ ಮಾಡುತ್ತಿದ್ದ.

ಮದ್ಯ ಮಾರಾಟಗಾರ ರವಿ ಸಿಂಗ್, 120 ರೂಪಾಯಿಯ 500 ಎಂಎಲ್‌ನ ಕಿಂಗ್‌ಫಿಶರ್ ಸ್ಟ್ರಾಂಗ್ ಬಿಯರ್ ಅನ್ನು ಗ್ರಾಹಕರಿಗೆ 130 ರೂ.ಗೆ ಮಾರಾಟ ಮಾಡುತ್ತಿದ್ದ. ಈ ಬಗ್ಗೆ ಯಾರೋ ಬೇಸತ್ತು ಅಬಕಾರಿ ಇಲಾಖೆಯ ಅಧಿಕಾರಿಗಳಿಗೆ ದೂರು ನೀಡಿದ್ದರು.

ಅಷ್ಟೇ ಅಲ್ಲದೆ, ಈ ಮದ್ಯದ ಅಂಗಡಿಯಲ್ಲಿ ಇತರೆ ಬ್ರ್ಯಾಂಡ್‌ನ ಮದ್ಯಗಳ ಮೇಲೂ ಹೆಚ್ಚುವರಿಯಾಗಿ 10 ರಿಂದ 20 ರೂಪಾಯಿ ಶುಲ್ಕ ವಿಧಿಸುತ್ತಿದ್ದರು ಎಂದು ದೂರು ಬಂದಿತ್ತು. ಹೀಗಾಗಿ ಈ ಅಕ್ರಮದ ವಿರುದ್ಧ ಕ್ರಮ ಕೈಗೊಳ್ಳಲು ಅಧಿಕಾರಿಗಳು ಕಾಯುತ್ತಿದ್ದರು.

ಅದರನ್ವಯ, ಅಬಕಾರಿ ಇಲಾಖೆ ಅಧಿಕಾರಿಗಳು ಗ್ರಾಹಕರ ಸೋಗಿನಲ್ಲಿ ವ್ಯಕ್ತಿಯೊಬ್ಬನನ್ನು ಕಳುಹಿಸಿ ಬಿಯರ್ ತರಲು ಕಳುಹಿಸಿದ್ದಾರೆ. ಆಗ ಅಂಗಡಿ ಮಾಲೀಕ ಹತ್ತು ರೂಪಾಯಿ ಹೆಚ್ಚುವರಿ ಶುಲ್ಕ ವಿಧಿಸುತ್ತಿದ್ದಂತೆ ರೆಡ್‌ ಹ್ಯಾಂಡ್ ಆಗಿ ಆತನನ್ನು ಹಿಡಿದಿದ್ದಾರೆ.

ಸದ್ಯ ಆರೋಪಿ ರವಿ ಸಿಂಗ್‌ನನ್ನು ಬಂಧಿಸಿರುವ ಪೊಲೀಸರು, ಆತನನ್ನು ನ್ಯಾಯಾಲಯದ ಮುಂದೆ ಹಾಜರು ಪಡಿಸಿದ ಬಳಿಕ ಜೈಲಿಗೆ ಕಳಿಸಿದ್ದಾರೆ. ಅಲ್ಲದೇ, ಬಾರ್ ಲೈಸೆನ್ಸ್ ಹೊಂದಿದ ಮಾಲೀಕನಿಗೆ 75000 ರೂಪಾಯಿ ದಂಡ ವಿಧಿಸಲಾಗಿದೆ.

ಇಷ್ಟೇ ಅಲ್ಲದೇ, ಆತನಿಗೆ ಎಚ್ಚರಿಕೆಯೂ ನೀಡಿರುವ ಅಧಿಕಾರಿಗಳು, ಮೊದಲ ಬಾರಿ ತಪ್ಪು ಮಾಡಿದ್ದಕ್ಕೆ ಈ ದಂಡ ವಿಧಿಸಲಾಗಿಎದ. ಇದು ಪುನರಾವರ್ತನೆಯಾದರೆ ಒಂದೂವರೆ ಲಕ್ಷ ದಂಡ ವಿಧಿಸಿ ಶಾಶ್ವತವಾಗಿ ಬಾರ್ ಲೈಸೆನ್ಸ್‌ ಅನ್ನು ರದ್ದುಗೊಳಿಸುವುದಾಗಿ ಎಚ್ಚರಿಕೆ ನೀಡಿದ್ದಾರೆ.

ಅಬಕಾರಿ ನಿಯಮಗಳನ್ನು ಉಲ್ಲಂಘಿಸುತ್ತಿರುವ ಮದ್ಯದಂಗಡಿ ಮಾಲೀಕರು ಅಥವಾ ಮಳಿಗೆಗಳ ವಿರುದ್ಧ ಕಠಿಣ ಕ್ರಮವನ್ನು ನಾವು ಕೈಗೊಳ್ಳುತ್ತೇವೆ. ಇದು ಮದ್ಯದ ಪರವಾನಗಿಯನ್ನು ರದ್ದುಗೊಳಿಸುವುದಕ್ಕೆ ಕಾರಣವಾಗಬಹುದು ಎಂದು ಡಿಇಒ ಹೇಳಿದ್ದಾರೆ.