Gautam Gambhir: ಗೌತಮ್​ ಗಂಭೀರ್​ಗೆ ಜೀವ ಬೆದರಿಕೆ ಹಾಕಿದ್ದು ಪಾಕ್ ವಿದ್ಯಾರ್ಥಿ; ತನಿಖೆಯಲ್ಲಿ ಬಹಿರಂಗ

ದೆಹಲಿ ಪೂರ್ವ ಬಿಜೆಪಿ ಸಂಸದ ಗೌತಮ್​ ಗಂಭೀರ್​ ಮತ್ತು ಅವರ ಕುಟುಂಬಕ್ಕೆ ಕಾಶ್ಮೀರ ಐಸಿಸ್​ ಉಗ್ರರು ಬೆದರಿಕೆ ಹಾಕಿದ್ದರೆ ಎಂದು ನಿನ್ನೆ ದೆಹಲಿ ಠಾಣೆಯಲ್ಲಿ ದೂರು ಸಲ್ಲಿಸಲಾಗಿತ್ತು. 

ನಿಮ್ಮನ್ನು ಮತ್ತು ನಿಮ್ಮ ಕುಟುಂಬದ ಸದಸ್ಯರನ್ನು ಹತ್ಯೆ ಮಾಡಲಾಗುವುದು ಎಂಬ ಸಂದೇಶವನ್ನು ಮೇಲ್​ ಮೂಲಕ ರವಾನಿಸಲಾಗಿತ್ತು. ಈ ಸಂಬಂಧ ಪ್ರಕರಣ ದಾಖಲಿಸಿ ಪೊಲೀಸರು ತನಿಖೆ ಆರಂಭಿಸಿದ್ದರು.

ಇನ್ನು ಮತ್ತೊಂದು ಸಂದೇಶದಲ್ಲಿ ಗಂಭೀರ ಮನೆಯ ವಿಡಿಯೋವನ್ನು ಅಟ್ಯಾಚ್​ ಮಾಡಿ ಕಳುಹಿಸಿದ್ದ ಉಗ್ರರು, ನಿಮ್ಮನ್ನು ನಿನ್ನೆ ಕೊಲ್ಲಲು ಸಕಲ ಸಿದ್ಧತೆ ನಡೆಸಿದ್ದೇವು. ಆದರೆ, ಅದೃಷ್ಟವಶಾತ್​ ಬದುಕಿದೆ. ನಿನ್ನ ಕುಟುಂಬವನ್ನು ಪ್ರೀತಿಸುವುದಾದರೆ, ರಾಜಕೀಯ ಮತ್ತು ಕಾಶ್ಮೀರದ ವಿಷಯದಿಂದ ದೂರವಿರುವಂತೆ ಎಚ್ಚರಿಕೆ ರವಾನಿಸಿದ್ದರು.

ಅಲ್ಲದೇ ಬಿಜೆಪಿ ನಾಯಕರ ಮನೆಗೆ ಬಿಗಿ ಭದ್ರತೆ ಒದಗಿಸಲಾಗಿತ್ತು. ಈ ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿದ ಸೈಬರ್ ಪೊಲೀಸರು ಕಡೆಗೂ ಮೇಲ್​ ಸಂದೇಶ ರವಾನೆಯಾಗಿರುವ ಮೂಲವನ್ನು ಪತ್ತೆ ಹಚ್ಚಿದ್ದಾರೆ.

ಈ ಮೇಲ್​ ಸಂದೇಶದ ಮೂಲ ಪಾಕಿಸ್ತಾನದ ಕರಾಚಿಯಾಗಿದೆ ಎಂಬುದು ತಿಳಿದು ಬಂದಿದೆ. 20 ರಿಂದ 25 ವರ್ಷದ ಶಹೀದ್ ಹಮೀದ್​ ಎಂಬ ಯುವಕನ ಹೆಸರಲ್ಲಿ ಈ ಮೇಲ್​ ಸೃಷ್ಟಿಯಾಗಿದೆ. ಅಲ್ಲದೇ ಈತ ಸಿಂಧ್ ವಿಶ್ವವಿದ್ಯಾಲಯದಲ್ಲಿ ಅಭ್ಯಾಸ ಮಾಡುತ್ತಿರುವುದು ತನಿಖೆಯಲ್ಲಿ ಬಯಲಾಗಿದೆ.

ಇನ್ನು ಈ ಪ್ರಕರಣ ಕುರಿತು ಮಾತನಾಡಿರುವ ಪೊಲೀಸರು ಈ ಬೆದರಿಕೆ ಹಿಂದೆ ಯಾವುದೇ ಪ್ರಮುಖ ಉದ್ದೇಶ ಕಂಡು ಬಂದಿಲ್ಲ. ಪ್ರಕರಣದ ಕುರಿತು ತನಿಖೆ ನಡೆಯುತ್ತಿದ್ದು, ಕೇಂದ್ರ ಗುಪ್ತಚರ ದಳ ಹೆಚ್ಚಿನ ಮಾಹಿತಿ ನೀಡಲಿದೆ ಎಂದಿದ್ದಾರೆ.

ಪಾಕಿಸ್ತಾನದ ಗಡಿಯಾಚೆಗಿನ ಭಯೋತ್ಪಾದನೆಯನ್ನು ಕುರಿತು ಗಂಭೀರ್​​ ತೀವ್ರವಾಗಿ ಟೀಕಿಸಿದ್ದಾರೆ. ಫೆಬ್ರವರಿಯಲ್ಲಿ ನಡೆದ ಗಡಿಯಾಚೆಗಿನ ಭಯೋತ್ಪಾದನೆಯ ಸಮಸ್ಯೆ ಮುಗಿಯುವವರೆಗೆ ಪಾಕಿಸ್ತಾನದೊಂದಿಗೆ ಯಾವುದೇ ರೀತಿಯ ಸಂಬಂಧವನ್ನು ಹೊಂದಿರಬಾದು. ಎಲ್ಲಕ್ಕಿಂತ ಭಾರತೀಯ ಸೈನಿಕರ ಪ್ರಾಣ ಮುಖ್ಯ ಎಂದು ಹೇಳಿದ್ದರು