80 ದೇಶಗಳಲ್ಲಿ ಕಾರ್ಯ ನಿರ್ವಹಿಸುತ್ತಿದೆ ಹಿಂದೂಸ್ತಾನಿ- ಪಾಕಿಸ್ತಾನಿ ಗೆಳೆಯರು ಆರಂಭಿಸಿದ ಈ ಕಂಪೆನಿ!

ಭಾರತ ಹಾಗೂ ಪಾಕಿಸ್ತಾನ ಗಡಿ ಭಾಗದಲ್ಲಿ ನಡೆಯುವ ಫೈರಿಂಗ್​ ಹಾಗೂ ಬಾಂಬ್​ ಸದ್ದು ಜನರ ನಿದ್ದೆಗೆಡಿಸಿರುವುದೇನೋ ನಿಜ. ಆದರೆ ಇಂದು ದೇಶದ ಬಹುದೊಡ್ಡ ಕಂಪೆನಿಗಳಲ್ಲೊಂದಾದ ಮಹೀಂದ್ರ ಆ್ಯಂಡ್​ ಮಹೀಂದ್ರ ಕಂಪೆನಿಯ ಅಡಿಪಾಯವನ್ನು ಇಬ್ಬರು ಅಮರ ಸ್ನೇಹಿಗಳು ಹಾಕಿದ್ದರೆಂಬ ವಿಚಾರ ಮಾತ್ರ ಯಾರಿಗೂ ತಿಳಿದಿಲ್ಲ. ಅದರಲ್ಲೂ ಈ ಇಬ್ಬರು ಗೆಳೆಯರಲ್ಲಿ ಒಬ್ಬರು ಭಾರತೀಯರಾಗಿದ್ದರೆ ಮತ್ತೊಬ್ಬರು ಪಾಕಿಸ್ತಾನದ ಪ್ರಜೆ ಎಂಬುವುದು ಮತ್ತೂ ಅಚ್ಚರಿ ಮೂಡಿಸುವ ವಿಚಾರವಾಗಿದೆ. ಗೆಳೆಯರ ದಿನವಾದ ಇಂದು ನ್ಯೂಸ್​ 18 ಕನ್ನಡವು ಇದೇ ಗೆಳೆಯರು ಆರಂಭಿಸಿದ ಮಹೀಂದ್ರ ಆ್ಯಂಡ್​ ಮಹೀಂದ್ರ ಕಂಪೆನಿಗೆ ಸಂಬಂಧಿಸಿದ ಕೆಲ ರೋಚಕ ವಿಚಾರಗಳನ್ನು ನಿಮಗೆ ತಿಳಿಸುವ ಪ್ರಯತ್ನ ಮಾಡುತ್ತಿದೆ.

ಭಾರತ ವಿಭಜನೆಯಾಗುವ ಮೊದಲು ಅಂದರೆ 1945 ರಲ್ಲಿ ಲೂದಿಯಾನಾದ ಇಬ್ಬರು ಸಹೋದರರು ಕೆ. ಸಿ ಮಹೀಂದ್ರ ಹಾಗೂ ಜೆ. ಸಿ. ಮಹೀಂದ್ರರವರು ಮಲಿಕ್ ಗುಲಾಂ​ ಮೊಹಮ್ಮದ್​ರೊಂದಿಗೆ ಸೇರಿ ಮಹೀಂದ್ರ ಆ್ಯಂಡ್​ ಮೊಹಮ್ಮದ್​ ಎಂಬ ಕಂಪೆನಿಗೆ ಅಡಿಪಾಯ ಹಾಕಿದ್ದರು. ಭಾರತದ ಸ್ವಾತಂತ್ರ್ಯ ಹಾಗೂ ಪಾಕಿಸ್ತಾನ ವಿಭಜನೆಯಾದ ಬಳಿಕ ಗುಲಾಂ ಮೊಹಮ್ಮದ್​ ಪಾಕಿಸ್ತಾನಕ್ಕೆ ತೆರಳಿ ಅಲ್ಲಿನ ಮೊದಲ ಹಣಕಾಸು ಸಚಿವರಾದರು. ​1948 ರಲ್ಲಿ ಈ ಕಂಪೆನಿಯ ಹೆಸರನ್ನು ಬದಲಾಯಿಸಿ ಮಹೀಂದ್ರ ಆ್ಯಂಡ್​ ಮಹೀಂದ್ರ ಎಂದು ಮರು ನಾಮಕರಣ ಮಾಡಲಾಯಿತು.

ಮೊಹಮ್ಮದ್​ ಪಾಕಿಸ್ತಾನಕ್ಕೆ ತೆರಳಿದ ಬಳಿಕ ಕಂಪೆನಿಯು ದಿನದಿಂದ ದಿನಕ್ಕೆ ಅಭಿವೃದ್ಧಿ ಹೊಂದಲಾರಂಭಿಸಿತು. 1991 ರಲ್ಲಿ ಆನಂದ್​ ಮಹೀಂದ್ರ ಈ ಕಂಪೆನಿಯ ನೂತನ ಉಪ ನಿರ್ದೇಶಕರಾದರು, ಇದಾದ ಬಳಿಕ ಅಂದಿನಿಂದ ಇಂದಿನವರೆಗೆ ಮಹೀಂದ್ರ ಗ್ರೂಪ್​ ಹೊಸ ಮಜಲನ್ನು ತಲುಪಿರುವುದು ಎಲ್ಲರಿಗೂ ತಿಳಿದಿರುವ ವಿಚಾರ.

ಇಂಡೋ-ಪಾಕ್​ ವಿಭಜನೆಯೊಂದಿಗೆ ದೂರವಾದ ಗೆಳೆಯರು: ಮಹೀಂದ್ರ ಆ್ಯಂಡ್​ ಮೊಹಮ್ಮದ್​ ಕಂಪೆನಿಯನ್ನು ಭಾರತದ ಉತ್ಕೃಷ್ಟ ಸ್ಟೀಲ್​ ಕಂಪೆನಿಯನ್ನಾಗಿಸುವುದು ಮಹೀಂದ್ರ ಸಹೋದರರು ಹಾಗೂ ಮೊಹಮ್ಮದ್​ರವರ ಕನಸಾಗಿತ್ತು. ಆದರೆ 1947 ರ ಆಗಸ್ಟ್​ 15 ರಂದು ದೇಶವನ್ನು ಧರ್ಮದ ಆಧಾರದಲ್ಲಿ ಎರಡು ಭಾಗಗಳನ್ನಾಗಿ ವಿಭಜಿಸಿದಾಗ ಈ ಕಂಪೆನಿಯ ಹಿಂದೂ-ಮುಸಲ್ಮಾನ ಗೆಳೆಯರೂ ದೂರವಾದರು. ಗುಲಾಂ ಮೊಹಮ್ಮದ್​ ಈ ಗ್ರೂಪ್​ನಿಂದ ದೂರವಾಗಿ ಪಾಕಿಸ್ತಾನಕ್ಕೆ ಹೋದರೆ ಇತ್ತ ಮಹೀಂದ್ರ ಸಹೋದರರು ಕಂಪೆನಿಯನ್ನು ಏಕಾಂಗಿಯಾಗಿ ಭಾರತದಲ್ಲಿ ಮುಂದುವರೆಸಲು ನಿರ್ಧರಿಸಿದರು.

ಬದಲಾಯ್ತು ಉದ್ಯಮದ ರಣತಂತ್ರ: ಹೆಸರು ಬದಲಾಯಿಸಿದ ಬಳಿಕ ಮಹೀಂದ್ರ ಸಹೋದರರು ಆಟೋ ಇಂಡಸ್ಟ್ರಿಗೆ ಕಾಲಡಲು ನಿರ್ಧರಿಸಿದರು. ವಾಸ್ತವವಾಗಿ ಅಮೆರಿಕಾ ಕಂಪೆನಿಯಲ್ಲಿ ಕೆಲಸ ಮಾಡಿದ್ದ ಸಂದರ್ಭದಲ್ಲಿ ಕೆ. ಸಿ ಮಹೀಂದ್ರ ಅಲ್ಲಿ ಜೀಪನ್ನು ನೋಡಿದ್ದರು. ಇದಾದ ಬಳಿಕವೇ ಅವರು ಭಾರತದಲ್ಲಿ ಜೀಪ್​ ನಿರ್ಮಿಸುವ ಕನಸು ಕಂಡಿದ್ದರು ಹಾಗೂ ಈ ಕನಸನ್ನು ನನಸಾಗಿಸಲು ಕಂಪೆನಿಯು ಭಾರತದಲ್ಲಿ ಜೀಪ್​ ಪ್ರೊಡಕ್ಷನ್​ ಆರಂಭಿಸಿದರು. ಕೆಲ ಸಮಯದ ಬಳಿಕ ಲೈಟ್​ ಕಮರ್ಷಿಯಲ್​ ವಾಹನ ಹಾಗೂ ಟ್ರ್ಯಾಕ್ಟರ್​ ನಿರ್ಮಿಸಲಾರಂಭಿಸದರು. ಇದಾದ ಬಳಿಕ ನಿಧಾನವಾಗಿ ಅದರ ಪ್ರಯಾಣ ಅಭಿವೃದ್ಧಿಯತ್ತ ಸಾಗಿತು.

ಪಾಕಿಸ್ತಾನದ ಮೊದಲ ಹಣಕಾಸು ಸಚಿವರಾದ ಗುಲಾಂ ಮೊಹಮ್ಮದ್​: ಮಲಿಕ್​ ಗುಲಾಂ ಮೊಹಮ್ಮದ್​ ಪಂಜಾಬ್​ನ ಮಧ್ಯಮ ವರ್ಗದವರಾಗಿದ್ದರು. ಅವರು ಆಲೀಘಡ ಮುಸ್ಲಿಂ ವಿಶ್ವವಿದ್ಯಾನಿಲಯದಲ್ಲಿ ಪದವಿ ಪಡೆದಿದ್ದರು. ಇದಾದ ಬಳಿಕ ಅವರು ಇಂಡಿಯನ್​ ಅಕೌಂಟ್​ ಸರ್ವಿಸ್​ನಲ್ಲಿ ಕೆಲಸ ಆರಂಭಿಸಿದರು. ಇದಾದ ಬಳಿಕ ಅವರು ಹೈದರಾಬಾದ್​ ನಿಜಾಮರ ಬಳಿ ಆರ್ಥಿಕ ಸಲಹೆಗಾರರಾಗಿ ಕಾರ್ಯ ನಿರ್ವಹಿಸಿದರು. ವಿಭಜನೆ ಬಳಿಕ ಪಾಕಿಸ್ತಾನಕ್ಕೆ ತೆರಳಿದ ಅವರು ಅಲ್ಲಿನ ಮೊದಲ ಹಣಕಾಸು ಸಚಿವರಾದರು. ಇಷ್ಟೇ ಅಲ್ಲದೇ, ಲಿಯಾಕತ್​ ಅಲಿಯವರ ಹತ್ಯೆ ಬಳಿಕ ಅವರು ಪಾಕಿಸ್ತಾನದ ಮೂರನೇ ಜನರಲ್​ ಗವರ್ನರ್​ ಕೂಡಾ ಆದರು.

ಮಹೀಂದ್ರ ಕಂಪೆನಿಗೆ ಮಹತ್ವಪೂರ್ಣವಾದ 1991: ಭಾರತೀಯ ಅರ್ಥ ವ್ಯವಸ್ಥೆ ಹಾಗೂ ಮಹೀಂದ್ರ ಗ್ರೂಪ್​ ಎರಡಕ್ಕೂ 1991 ಬಹಳಷ್ಟು ಮಹತ್ವಪೂರ್ಣವಾಗಿತ್ತು. ಇದೇ ವರ್ಷದಲ್ಲಿ ಭಾರತವು ಜಾಗತೀಕರಣವನ್ನು ಒಪ್ಪಿಕೊಂಡಿದ್ದು, ಮಾರುಕಟ್ಟೆಯು ಶೀಘ್ರವಾಗಿ ಅಭಿವೃದ್ಧಿ ಕಾಣಲಾರಂಭಿಸಿತು. 1991ರಲ್ಲಿ ಆನಂದ್​ ಮಹೀಂದ್ರ ಗ್ರೂಪ್​ಉಪ ನಿರ್ದೇಶಕರಾದೆರು. ಕಳೆದ 24 ವರ್ಷಗಳಲ್ಲಿ ಭಾರತೀಯ ಅರ್ಥ ವ್ಯವಸ್ಥೆಯಂತೆ ಮಹೀಂದ್ರ ಗ್ರೂಪ್​ ಕೂಡಾ ಯಶಸ್ಸಿನ ಉತ್ತುಂಗದಲ್ಲಿದೆ.

ಟ್ರ್ಯಾಕ್ಟರ್​ನಿಂದ ಸಾಫ್ಟ್​ವೇರ್​ಗೂ ತಲುಪಿದ ಉದ್ಯಮ: ಇಂದು ಮಹೀಂದ್ರ ಆ್ಯಂಡ್​ ಮಹೀಂದ್ರ ಕಂಪೆನಿಯ ಉದ್ಯಮವು ಟ್ರ್ಯಾಕ್ಟರ್​ನಿಂದ ಸಾಫ್ಟ್​ವೇರ್​ ಕ್ಷೇತ್ರದವರೆಗೂ ತಲುಪಿದೆ. ಗ್ರೂಪ್​ನ ಈ ಯಶಸ್ಸಿನ ಹಿಂದೆ ಆನಂದ್​ ಮಹೀಂದ್ರರವರ ಕಠಿಣ ಪರಿಶ್ರಮವಿದೆ. ಇಂದು ಅವರು ಮಹೀಂದ್ರ ಗ್ರೂಪ್​ನ ಚೇರ್​ಮನ್​ ಹಾಗೂ ವ್ಯವಸ್ಥಾಪಕ ನಿರ್ದೇಶಕರಾಗಿದ್ದಾರೆ. 63 ವರ್ಷದ ಆನಂದ್​ ಮಹೀಂದ್ರ 1997ರಲ್ಲಿ ಮಹೀಂದ್ರ ಗ್ರೂಪ್​ನ ಎಂಡಿ ಆದರು

ಈ ಉದ್ಯಮಗಳಲ್ಲಿ ತೊಡಗಿಸಿಕೊಂಡಿದೆ ಮಹೀಂದ್ರ ಗ್ರೂಪ್​: ಇಂದು ಮಹೀಂದ್ರ ಗ್ರೂಪ್​ ರಿಯಲ್​ ಎಱಸ್ಟೇಟ್​, ಹಾಲಿಡೇ ರೆಸಾರ್ಟ್​, ರೀಟೆಲ್​, ಡಿಫೆಂನ್ಸ್​, ಏಜೆನ್ಸಿ, ಫೈನಾನ್ಶಿಯಲ್​ ಸರ್ವೀಸಸ್​, ಏವೀಯೇಶನ್​ ಸೇರಿದಂತೆ ಹಲವರು ಇತರ ಉದ್ಯಮಗಳಲ್ಲಿ ತನ್ನ ಛಾಪು ಮೂಡಿಸಿದೆ. ಗ್ರೂಪ್​ನ ವಾರ್ಷಿಕ ಆದಾಯ 93 ಕೋಟಿಗೂ ಅಧಿಕವಿದೆ. ಗ್ರೂಪ್​ನ ಕಂಪೆನಿಯ ಸಂಖ್ಯೆಗಳು ಒಂದು ಡಜನ್​ಗಿಂತಲೂ ಅಧಿಕವಿದೆ.

80ಕ್ಕೂ ಅಧಿಕ ದೇಶಗಳಲ್ಲಿ ಉದ್ಯಮ: ಮಹೀಂದ್ರ ಗ್ರೂಪ್​ ದೇಶದಲ್ಲಿ ಅತ್ಯಂತ ವೇಗವಾಗಿ ಅಭಿವೃದ್ಧಿ ಕಾಣುತ್ತಿರುವ ಕಂಪೆನಿಗಳಲ್ಲೊಂದಾಗಿದೆ. ವಜಗತ್ತಿನಲ್ಲಿ 80ಕ್ಕೂ ಅಧಿಕ ದೇಶಗಳಲ್ಲಿ ಇದು ತನ್ನ ಉದ್ಯಮ ನಡೆಸುತ್ತಿದೆ.