King Charles III Coronation: ಬ್ರಿಟನ್​ನ ನೂತನ ರಾಜನಾದ 3ನೇ ಕಿಂಗ್‌ ಚಾರ್ಲ್ಸ್! ಅದ್ದೂರಿಯಾಗಿ ನಡೆಯಿತು ಪಟ್ಟಾಭಿಷೇಕ

ಶನಿವಾರ ಸಂಜೆ ಬ್ರಿ ವೆಸ್ಟ್‌ಮಿನಿಸ್ಟರ್ ಅಬ್ಬೆಯಲ್ಲಿ ನಡೆದ ಐತಿಹಾಸಿಕ ಪಟ್ಟಾಭಿಷೇಕ ಸಮಾರಂಭದಲ್ಲಿ ಕಿಂಗ್ ಚಾರ್ಲ್ಸ್ III ಅಧಿಕೃತವಾಗಿ ಬ್ರಿಟನ್​ ರಾಜನ ಕಿರೀಟ ಸ್ವೀಕರಿಸಿದ್ದಾರೆ. ಕಳೆದ ವರ್ಷ ಸೆಪ್ಟೆಂಬರ್‌ನಲ್ಲಿ ಅವರ ತಾಯಿ ರಾಣಿ ಎಲಿಜಬೆತ್ ಅವರ ಮರಣದ ನಂತರ ಚಾರ್ಲ್ಸ್ III ಬ್ರಿಟನ್ ರಾಜನ ಬಿರುದನ್ನು ಪಡೆದುಕೊಂಡಿದ್ದರು.

ಮೇ 6 ರಂದು ಚಾರ್ಲ್ಸ್ ಅವರಿಗೆ ಔಪಚಾರಿಕವಾಗಿ ಪಟ್ಟಾಭಿಷೇಕ ಮಾಡಲಾಯಿತು. ಎರಡು ಗಂಟೆಗಳ ಈ ಕಿರೀಟದಾರಣೆಯ ಸಾಂಪ್ರದಾಯ ಕಾರ್ಯಕ್ರಮದಲ್ಲಿ ಕ್ಯಾಂಟರ್ಬರಿಯ ಆರ್ಚ್​ಬಿಷಪ್ ರಾಜನ ತಲೆಯ ಮೇಲೆ ಸೇಂಟ್ ಎಡ್ವರ್ಡ್ ಕಿರೀಟವನ್ನು ಇರಿಸಿದರು. ಕಿಂಗ್ ಚಾರ್ಲ್ಸ್  ನಂತರ, ಅವರ ಪತ್ನಿ ಕ್ಯಾಮಿಲ್ಲಾ ಕೂಡ ವೆಸ್ಟ್‌ಮಿನಿಸ್ಟರ್ ಅಬ್ಬೆಯಲ್ಲಿ ಬ್ರಿಟನ್​ ರಾಣಿಯಾಗಿ ಪಟ್ಟಾಭಿಷಿಕ್ತಳಾದರು.

ಈ ಸಂದರ್ಭದಲ್ಲಿ ಸಭೆಯಲ್ಲಿದ್ದವರು, ದೇವರೆ ರಾಜನನ್ನು ರಕ್ಷಿಸು' ಎಂದು ಹರ್ಷೋದ್ಗಾರ ಮಾಡಿದರು. ನಂತರ ಕಿಂಗ್ ಚಾರ್ಲ್ಸ್ III ಯುನೈಟೆಡ್ ಕಿಂಗ್‌ಡಂನ ಜನರನ್ನು " ನ್ಯಾಯ ಮತ್ತು ಕರುಣೆ" ಯೊಂದಿಗೆ ಆಳಲು ಮತ್ತು ಎಲ್ಲಾ ನಂಬಿಕೆಗಳು ಜನರು ಮುಕ್ತವಾಗಿ ಬದುಕಲು ಸುಲಭವಾದ ವಾತಾವರಣವನ್ನು ನಿರ್ಮಿಸುವುದಕ್ಕೆ ಬದ್ಧನಾಗಿದ್ದೇನೆ ಎಂದು ಪ್ರಮಾಣವಚನ ಸ್ವೀಕರಿಸಿದರು.

ಕಿಂಗ್​ ಚಾರ್ಲ್ಸ್​ ತಮ್ಮ 74 ನೇ ವಯಸ್ಸಿನಲ್ಲಿ ಬ್ರಿಟಿಷ್ ಸಿಂಹಾಸನವೇರಿದ್ದಾರೆ. ಈ ಮೂಲಕ ಬ್ರಿಟನ್ ಸಿಂಹಾಸನ ಏರಿದ ಅತ್ಯಂತ ಹಿರಿಯ ರಾಜ ಎಂಬ ಖ್ಯಾತಿಗೆ ಪಾತ್ರರಾದರು.

ವೆಸ್ಟ್‌ಮಿನಿಸ್ಟರ್ ಅಬ್ಬೆ 1066 ರಿಂದಲೂ ಪ್ರತಿ ಬ್ರಿಟನ್​ ರಾಜರ ಪಟ್ಟಾಭಿಷೇಕ ನಡೆದ ಸ್ಥಳವಾಗಿದೆ. ವಿಲಿಯಂ ದಿ ಕಾಂಕರರ್ ಇಲ್ಲಿ ಮೊದಲ ಬ್ರಿಟನ್​ ರಾಜನಾಗಿ ಅಧಿಕಾರ ಸ್ವೀಕರಿಸಿದ್ದರು. ಇದೀಗ ಕಿಂಗ್ ಚಾರ್ಲ್ಸ್ III ಮತ್ತು ಅವರ ಪತ್ನಿ ರಾಣಿ ಕ್ಯಾಮಿಲ್ಲಾ ಈ ಭವ್ಯ ಸಂಪ್ರದಾಯವನ್ನು ಅನುಸರಿಸಿದರು. ಈ ಸಂದರ್ಭದಲ್ಲಿ, ಧಾರ್ಮಿಕ ಮುಖಂಡರು ಮತ್ತು ಹಿಂದೂ, ಸಿಖ್, ಮುಸ್ಲಿಂ, ಬೌದ್ಧ ಮತ್ತು ಯಹೂದಿ ಸಮುದಾಯಗಳ ಪ್ರತಿನಿಧಿಗಳು ಸಹ ಉಪಸ್ಥಿತರಿದ್ದರು.

ಈ ಸಂದರ್ಭದಲ್ಲಿ, ಪ್ರಪಂಚದ ಮೂಲೆ ಮೂಲೆಗಳಿಂದ ಅನೇಕ ಅತಿಥಿಗಳು ವೆಸ್ಟ್‌ಮಿನಿಸ್ಟರ್ ಅಬ್ಬೆಗೆ ಆಗಮಿಸಿದರು. ರಾಜಮನೆತನದ ಸದಸ್ಯರು, ಪ್ರಧಾನಿ ರಿಷಿ ಸುನಕ್ ಮತ್ತು ಅವರ ಪತ್ನಿ ಅಕ್ಷತಾ ಮೂರ್ತಿ ವಿವಿಧ ರಾಷ್ಟ್ರಗಳ ಮುಖ್ಯಸ್ಥರನ್ನು ಸ್ವಾಗತಿಸಿದ್ದರು.

 ಅಮೆರಿಕದ ಪ್ರಥಮ ಮಹಿಳೆ ಜಿಲ್ ಬಿಡೆನ್, ಭಾರತದ ಉಪರಾಷ್ಟ್ರಪತಿ ಜಗದೀಪ್ ಧನಕರ್, ಕೆನಡಾ ಪ್ರಧಾನಿ ಜಸ್ಟಿನ್ ಟ್ರುಡೊ ಮತ್ತು ಅವರ ಪತ್ನಿ ಸೋಫಿ ಟ್ರುಡೊ ಸೇರಿದಂತೆ ಹಲವು ದೇಶದ ಗಣ್ಯರು ಆಗಮಿಸಿದ್ದರು.brit