ಲಕ್ಷಾಂತರ ಮಂದಿ ಸಾವಿಗೆ ಕಾರಣ Covid-19 ಅಲ್ವಂತೆ, ಕೊರೋನಾ ಬಗ್ಗೆ ಬಯಲಾಯ್ತು ಶಾಕಿಂಗ್ ಮಾಹಿತಿ

ಭಾರತ ಸೇರಿದಂತೆ ಇಡೀ ಜಗತ್ತು ಇನ್ನೂ ಕೋವಿಡ್‌ ಕರಾಳತೆಯಿಂದ ಸಂಪೂರ್ಣವಾಗಿ ಹೊರಬಂದಿಲ್ಲ, ಅನೇಕ ದೇಶಗಳಲ್ಲಿ ಕೋವಿಡ್ ಪ್ರಕರಣಗಳಲ್ಲಿ ಇನ್ನೂ ಇಳಿಕೆ ಕಂಡು ಬಂದಿಲ್ಲ. ಸಂಶೋಧಕರು ನಿರಂತರವಾಗಿ SARS-CoV-2 ದೇಹದ ಮೇಲೆ ಯಾವ ರೀತಿ ಪರಿಣಾಮ ಬೀರುತ್ತದೆ ಎಂಬುವುದನ್ನು ಕಂಡುಹಿಡಿಯುವಲ್ಲಿ ತೊಡಗಿದ್ದಾರೆ.

ಕೋವಿಡ್ -19 ಸೋಂಕಿನಿಂದಾಗಿ ವೆಂಟಿಲೇಟರ್‌ಗಳಲ್ಲಿದ್ದ ಅನೇಕರು ಮತ್ತೊಂದು ಬ್ಯಾಕ್ಟೀರಿಯಾದ ಇನ್ಫೆಕ್ಷನ್​ನಿಂದ ಬಳಲಿದ್ದರು ಎಂದು ಹೊಸ ವಿಶ್ಲೇಷಣೆ ತೋರಿಸಿದೆ, ಅದೇ ಅವರೆಲ್ಲರ ಸಾವಿಗೆ ಕಾರಣವಾಗಿದೆ ಎಂದಿದೆ.

ಇತರ ಬ್ಯಾಕ್ಟೀರಿಯಾಗಳಿಂದ ಉಂಟಾಗುವ ಶ್ವಾಸಕೋಶದ ಸೋಂಕು (ನ್ಯುಮೋನಿಯಾ) ಕೋವಿಡ್-19 ಸೋಂಕಿತ ರೋಗಿಗಳಲ್ಲಿ ತುಂಬಾ ಸಾಮಾನ್ಯವಾಗಿತ್ತು. ಇದು ವೆಂಟಿಲೇಟರ್‌ಗಳಲ್ಲಿದ್ದ ಅರ್ಧದಷ್ಟು ರೋಗಿಗಳ ಮೇಲೆ ಪರಿಣಾಮ ಬೀರಿತ್ತು.

ನಾರ್ತ್‌ವೆಸ್ಟರ್ನ್ ಯೂನಿವರ್ಸಿಟಿ ಫೀನ್‌ಬರ್ಗ್ ಸ್ಕೂಲ್ ಆಫ್ ಮೆಡಿಸಿನ್‌ನ ತಂಡವು ಕ್ಲಿನಿಕಲ್ ಇನ್ವೆಸ್ಟಿಗೇಶನ್ ಜರ್ನಲ್‌ನಲ್ಲಿ ತಮ್ಮ ಆವಿಷ್ಕಾರವನ್ನು ಪ್ರಕಟಿಸಿದೆ. ಇತರ ಬ್ಯಾಕ್ಟೀರಿಯಾಗಳಿಂದ ಉಂಟಾಗುವ ನ್ಯುಮೋನಿಯಾದ ಬಗ್ಗೆ ತಿಳಿಯಲು ಸಂಶೋಧಕರು ಕೃತಕ ಬುದ್ಧಿಮತ್ತೆಯ ಸಹಾಯವನ್ನು ಪಡೆದಿದ್ದಾರೆ. ಸಂಪೂರ್ಣವಾಗಿ ಚಿಕಿತ್ಸೆ ನೀಡಲು ಸಾಧ್ಯವಾಗದ ಬ್ಯಾಕ್ಟೀರಿಯಾವೇ ಸಾವಿಗೆ ಪ್ರಮುಖ ಕಾರಣ ಎಂದು ಸಂಶೋಧನೆಯಲ್ಲಿ ಕಂಡುಬಂದಿದೆ.

ಕೋವಿಡ್ 'ಸೈಟೋಕಿನ್ ಸ್ಟಾರ್ಮ್​ಗೆ' ಕಾರಣವಲ್ಲ ಎಂದು ಸಂಶೋಧನೆಯಲ್ಲಿ ಕಂಡುಬಂದಿದೆ. ಇಲ್ಲಿಯವರೆಗೆ, ಸೈಟೋಕಿನ್ ಚಂಡಮಾರುತದ ಪ್ರಮುಖ ಕಾರಣವನ್ನು ಕೋವಿಡ್ -19 ಎಂದು ಪರಿಗಣಿಸಲಾಗಿದೆ, ಇದು ಸೋಂಕಿತ ವ್ಯಕ್ತಿಯ ಸಾವಿಗೆ ಪ್ರಮುಖ ಕಾರಣವೆಂದು ಹೇಳಲಾಗಿತ್ತು

ಸೈಟೋಕಿನ್​ಗಳು ದೇಹದ ಜೀವಕೋಶಗಳಿಂದ ಉತ್ಪತ್ತಿಯಾಗುವ ಒಂದು ರೀತಿಯ ಪ್ರೋಟೀನ್‌ಗಳು (ಗ್ಲೈಕೊಪ್ರೋಟೀನ್‌ಗಳು). ವೈರಸ್‌ಗಳ ವಿರುದ್ಧ ಹೋರಾಡುವುದು ಸೇರಿದಂತೆ ಸೈಟೋಕಿನ್​ಗಳು ದೇಹಕ್ಕೆ ಹಲವು ವಿಧಗಳಲ್ಲಿ ಸಹಾಯ ಮಾಡುತ್ತವೆ. ಏಕೆಂದರೆ ಇದು ನಮ್ಮ ರೋಗ ನಿರೋಧಕಾ ವ್ಯವಸ್ಥೆಯನ್ನು ಸಕ್ರಿಯಗೊಳಿಸುತ್ತದೆ. ಆದರೆ ದೇಹವು ಹೆಚ್ಚು ಸೈಟೋಕಿನ್​ಗಳನ್ನು ಬಿಡುಗಡೆ ಮಾಡಲು ಪ್ರಾರಂಭಿಸಿದರೆ, ಪ್ರತಿರಕ್ಷಣಾ ವ್ಯವಸ್ಥೆಯು ಹೆಚ್ಚು ಸಕ್ರಿಯವಾಗುತ್ತದೆ, ಇದರಿಂದಾಗಿ ದೇಹವು ಹಾನಿಗೊಳಗಾಗಬಹುದು. ಆದ್ದರಿಂದ ದೇಹವು ಹೆಚ್ಚು ಸೈಟೋಕಿನ್​ಗಳನ್ನು ಬಿಡುಗಡೆ ಮಾಡುವ ಸ್ಥಿತಿಯನ್ನು ಸೈಟೋಕಿನ್ ಸ್ಟಾರ್ಮ್​ ಎಂದು ಕರೆಯಲಾಗುತ್ತದೆ.

ಸಂಶೋಧಕರ ತಂಡವು ಐಸಿಯುನಲ್ಲಿ ದಾಖಲಾಗಿರುವ ಸುಮಾರು 585 ರೋಗಿಗಳನ್ನು ಮೌಲ್ಯಮಾಪನ ಮಾಡಿದ್ದು, ಇವರೆಲ್ಲರೂ ತೀವ್ರ ನ್ಯುಮೋನಿಯಾ ಮತ್ತು ಉಸಿರಾಟದ ತೊಂದರೆಯಿಂದ ಬಳಲುತ್ತಿದ್ದ ರೋಗಿಗಳಾಗಿದ್ದರು.

ಈ ಪೈಕಿ 190 ರೋಗಿಗಳಲ್ಲಿ ಕೋವಿಡ್-19 ಸೋಂಕು ಪತ್ತೆಯಾಗಿದೆ. ತಂಡವು ICU ರೋಗಿಗಳ ಎಲೆಕ್ಟ್ರಾನಿಕ್ ಆರೋಗ್ಯ ದಾಖಲೆ ಡೇಟಾವನ್ನು ಸಂಗ್ರಹಿಸುವ ಕಾರ್ಪೆಡಿಯಮ್ ಎಂಬ ಹೊಸ ಯಂತ್ರವನ್ನು ವಿನ್ಯಾಸಗೊಳಿಸಿದೆ.

ಇನ್ನು ಸೆಕೆಂಡರಿ ನ್ಯುಮೋನಿಯಾದಿಂದ ಗುಣಮುಖರಾದ ಜನರು ಬದುಕುಳಿಯುವ ಸಾಧ್ಯತೆಯಿದೆ ಎಂದು ಸಂಶೋಧಕರು ಹೇಳುತ್ತಾರೆ, ಆದರೆ ಯಾರಿಗೆ ನ್ಯುಮೋನಿಯಾ ಪತ್ತೆಯಾಗಿಲ್ಲವೋ ಅವರಿಗೆ ಸಾವಿನ ಅಪಾಯವಿರುತ್ತದೆ.

ಸಂಶೋಧಕರ ಡೇಟಾ ಅನ್ವಯ ವೈರಸ್‌ನಿಂದಾದ ಸಾವಿನ ಪ್ರಮಾಣ ತುಂಬಾ ಕಡಿಮೆಯಿದ್ದರೂ, ಸೆಕೆಂಡರಿ ಬ್ಯಾಕ್ಟೀರಿಯಾದ ನ್ಯುಮೋನಿಯಾ ಸೇರಿದಂತೆ ಇತರ ಕಾರಣಗಳು ICU ನಲ್ಲಿನ ಸಾವಿಗೆ ಪ್ರಮುಖ ಕಾರಣವಾಗಿದೆ ಎಂದು ತೋರಿಸುತ್ತದೆ.

ಕೋವಿಡ್ -19 ರೋಗಿಗಳ ಸಾವಿಗೆ ಕಾರಣವಾಗಿ ಶ್ವಾಸಕೋಶದಲ್ಲಿ ಕಂಡುಬರುವ ಬ್ಯಾಕ್ಟೀರಿಯಾದ ಸೂಪರ್‌ಇನ್‌ಫೆಕ್ಷನ್ ಅನ್ನು ಕಡಿಮೆ ಅಂದಾಜು ಮಾಡಲಾಗಿದೆ ಎಂದು ಸಂಶೋಧಕರು ಹೇಳಿದ್ದಾರೆ.