Rinku Singh: IPLನಲ್ಲಿ ಮಾತ್ರವಲ್ಲ, ನಿಜ ಜೀವನದಲ್ಲೂ ಹೀರೋ ಆದ ರಿಂಕು ಸಿಂಗ್! ಆತನ ಮಹತ್ಕಾರ್ಯ ಗೊತ್ತಾದ್ರೆ ಶಹಬ್ಬಾಸ್ ಹೇಳ್ತೀರಾ!

ಬಡತನದಲ್ಲಿ ಬೆಳೆದರೂ, ಕಠಿಣ ಪರಿಶ್ರಮದಿಂದ ಮೇಲೆ ಬಂದಿರುವ ಯುವ ಕ್ರಿಕೆಟಿಗ ಕಿಂಗ್ ರಿಂಕು ಸಿಂಗ್ (Rinku Singh IPL) ಕೋಲ್ಕತ್ತಾ ನೈಟ್ ರೈಡರ್ಸ್ ಪರ ಆಡುತ್ತಿದ್ದಾರೆ. ಇತ್ತೀಚೆಗೆ ನಡೆದ ಗುಜರಾತ್ ಟೈಟಾನ್ಸ್ ವಿರುದ್ಧ ಕೊನೆಯ 5 ಎಸೆತಗಳಲ್ಲಿ 5 ಸಿಕ್ಸರ್ ಬಾರಿಸುವ ಮೂಲಕ ವಿಶ್ವವನ್ನೇ ತನ್ನತ್ತ ತಿರುಗುವಂತೆ ಮಾಡಿದ್ದಲ್ಲದೆ, ರಾತ್ರೋರಾತ್ರಿ ಹೀರೊ ಆಗಿದ್ದಾರೆ.

ಬಡತನದಲ್ಲೇ ಬೆಳೆದ ರಿಂಕು ಸಿಂಗ್ ಬಡವರ ಕಷ್ಟಗಳನ್ನು ಚೆನ್ನಾಗಿ ಅರಿತಿದ್ದಾರೆ. ಇದೇ ಕಾರಣದಿಂದ ಬಡ ಮಕ್ಕಳಿಗೆ ಕ್ರಿಕೆಟ್​ ತರಬೇತಿ ನೀಡಲು ಅಲಿಗಢದಲ್ಲಿ ಹಾಸ್ಟೆಲ್‌  ನಿರ್ಮಿಸುತ್ತಿದ್ದಾರೆ.

ಈ ಹಾಸ್ಟೆಲ್ ಅನ್ನ ಅಲಿಗಢದ ಮಹುವಾ ಖೇಡಾ ಕ್ರೀಡಾಂಗಣದಲ್ಲಿ ನಿರ್ಮಿಸಲಾಗುತ್ತಿದೆ. ರಿಂಕು ಅವರ ಸಹೋದರನ ಪ್ರಕಾರ,  100 ಹಾಸಿಗೆಗಳುಳ್ಳ ಈ ಹಾಸ್ಟೆಲ್  ಶೀಘ್ರದಲ್ಲೇ ಸಿದ್ಧವಾಗಲಿದೆಯಂತೆ.

ರಿಂಕು ಸಿಂಗ್ ಅವರ ಹಿರಿಯ ಸಹೋದರ ಮುಕುಲ್ ಸಿಂಗ್ ಈ ಬಗ್ಗೆ ಮಾತನಾಡಿ, ಈ ಹಾಸ್ಟೆಲ್‌ನಲ್ಲಿ ಸುಮಾರು 100 ವಿದ್ಯಾರ್ಥಿಗಳಿಗೆ ಉಳಿದುಕೊಳ್ಳಲು ವ್ಯವಸ್ಥೆ ಮಾಡಲಾಗಿದೆ. ಬಡತನದಿಂದ ಬಂದ ಪ್ರತಿಭಾವಂತ ಮಕ್ಕಳು ಈ ಹಾಸ್ಟೆಲ್‌ನಲ್ಲಿ ಉಳಿದುಕೊಂಡು ಕ್ರಿಕೆಟ್ ತರಬೇತಿ ಪಡೆಯಲಿ ಎಂಬುದು ರಿಂಕು ಸಿಂಗ್ ಅವರ ಉದ್ದೇಶ ಎಂದಿದ್ದಾರೆ.

ಹಾಸ್ಟೆಲ್​ ಅಲ್ಲದೆ ಸ್ವತಃ ರಿಂಕು ಸಿಂಗ್ ಅವರೇ ಭವಿಷ್ಯದಲ್ಲಿ ಕ್ರಿಕೆಟ್‌ನಲ್ಲೇ ವೃತ್ತಿ ಜೀವನ ಕಂಡುಕೊಳ್ಳಲು ಬಯಸುವ ಬಡ ಪ್ರತಿಭಾವಂತ ಮಕ್ಕಳಿಗೆ ತರಬೇತಿ ನೀಡಲಿದ್ದಾರೆ ಎಂದು ಸಹೋದರ ತಿಳಿಸಿದ್ದಾರೆ.

ಮುಂದಿನ ಒಂದೂವರೆ ತಿಂಗಳಲ್ಲಿ ಹಾಸ್ಟೆಲ್​ ನಿರ್ಮಾಣ ಕಾರ್ಯ ಪೂರ್ಣಗೊಳ್ಳಲಿದೆ. ನನ್ನ ಸಹೋದರ ಬಡತನ ಅನುಭವಿಸಿದ್ದಾನೆ. ಬಡ ಮಕ್ಕಳ ನೋವು ಅವನಿಗೆ ಅರ್ಥವಾಗುತ್ತದೆ. ಈ ಕಾರಣಕ್ಕಾಗಿ ಬಡ ಮಕ್ಕಳಿಗೆ ತರಬೇತಿ ನೀಡಿ ಅವರನ್ನು ಕ್ರಿಕೆಟ್ ಜಗತ್ತಿನಲ್ಲಿ ತನ್ನ ಸಮಾನ ಸ್ಥಾನಕ್ಕೆ ತರಲು ಬಯಸಿದ್ದಾರೆ.

ಹಾಸ್ಟೆಲ್‌ನಲ್ಲಿರುವ ಮಕ್ಕಳಿಗೆ ತರಬೇತಿ ನೀಡುವುದಲ್ಲದೆ ಎಲ್ಲಾ ಸೌಲಭ್ಯಗಳನ್ನು ಉಚಿತವಾಗಿ ನೀಡಲಾಗುವುದು. ಅಲ್ಲದೆ ಬಡತನ ಎನ್ನುವುದು ಯಾವುದೇ ಪ್ರತಿಭೆಗಳನ್ನು ತಡೆಯಲು ಸಾಧ್ಯವಿಲ್ಲ, ಅದಕ್ಕೆ ನನ್ನ ಸಹೋದರ ಸಾಕ್ಷಿ ಎಂದು ತಿಳಿಸಿದ್ದಾರೆ.

ಗುಜರಾತ್ ಟೈಟಾನ್ಸ್ ವಿರುದ್ಧ ಕೊನೆಯ ಐದು ಎಸೆತಗಳಲ್ಲಿ ಐದು ಸಿಕ್ಸರ್‌ಗಳನ್ನು ಬಾರಿಸುವ ಮೂಲಕ ರಿಂಕು ಸಿಂಗ್ ಐಪಿಎಲ್ ಟಿ20 ಪಂದ್ಯದಲ್ಲಿ ಕೋಲ್ಕತ್ತಾ ನೈಟ್ ರೈಡರ್ಸ್‌ಗೆ ಸ್ಮರಣೀಯ ಜಯ ತಂದುಕೊಟ್ಟಿದ್ದರು. ಅಂದಿನಿಂದ ರಿಂಕು ಐಪಿಎಲ್‌ನ ಸ್ಟಾರ್ ಆಟಗಾರನಾಗಿದ್ದಾರೆ.