ಭಾರತದ ಈ ಎಂಟು ದೇವಾಲಯಗಳಲ್ಲಿ ಪುರುಷರಿಗೆ ಪ್ರವೇಶವಿಲ್ಲ..!

ಶಬರಿಮಲೆ ಅಯ್ಯಪ್ಪ ಸ್ವಾಮಿ ಸನ್ನಿಧಿಗೆ ಮಹಿಳೆಯರು ಪ್ರವೇಶಿಸುವ ಮೂಲಕ ಇತಿಹಾಸ ಸೃಷ್ಟಿಸಿದ್ದಾರೆ. ಬುಧವಾರ 40 ವರ್ಷದೊಳಗಿನ ಇಬ್ಬರು ಮಹಿಳೆಯರು ದೇಗುಲ ಪ್ರವೇಶಿಸಿದ್ದು, ಇದರ ಸಿಸಿಟಿವಿ ವೀಡಿಯೊ ಭಾರೀ ವೈರಲ್​​ ಆಗಿದೆ. ಇದರ ಬೆನ್ನಲ್ಲೇ ಹೊಸ ವಿವಾದವೊಂದು ಹುಟ್ಟಿಕೊಂಡಿದ್ದು, ನಾಳೆ ಕೇರಳದಾದ್ಯಂತ ಬಂದ್​ ಆಚರಿಸಲು ಅಯ್ಯಪ್ಪ ಭಕ್ತರು ಕರೆ ನೀಡಿದ್ಧಾರೆ. ದೇಶದಲ್ಲಿ ಮಹಿಳಾ ಪ್ರವೇಶವನ್ನು ನಿರ್ಬಂಧಿಸಿರುವ ಇನ್ನು ಅನೇಕ ದೇವಸ್ಥಾನಗಳಿವೆ ಎಂಬುದು ಎಲ್ಲರಿಗೂ ಗೊತ್ತಿದೆ. ಹಾಗೆಯೇ ಪುರುಷರಿಗೆ ನಿರ್ಬಂಧ ವಿಧಿಸಲಾಗಿರುವ ಎಂಟು ದೇವಾಲಯಗಳು ಭಾರತದಲ್ಲಿದೆ ಎಂದರೆ ನಂಬಲೇಬೇಕು. ಸದ್ಯ ಮಹಿಳೆಯರು ದೇಗುಲ ಪ್ರವೇಶದಿಂದ ಸುದ್ದಿಯಲ್ಲಿರುವ ಕೇರಳದಲ್ಲೂ ಪುರಷರಿಗೆ ಪ್ರವೇಶವಿರದ ದೇವಾಲಯ ಇರುವುದು ವಿಶೇಷ. ಇಂತಹ ಸಂಪ್ರದಾಯವನ್ನು ಆಚರಿಸಿಕೊಂಡು ಬರುತ್ತಿರುವ ಎಂಟು ದೇವಾಲಯಗಳ ಪರಿಚಯ ಇಲ್ಲಿವೆ.

ಭಗವತಿ ದೇವಿ ಮಂದಿರ, ಕನ್ಯಾಕುಮಾರಿ: ತಮಿಳುನಾಡಿನ ಕನ್ಯಾಕುಮಾರಿಯಲ್ಲಿರುವ ಭಗವತಿ ದೇವಸ್ಥಾನದಲ್ಲಿ ಭಗವತಿ ದೇವಿಯ ಕನ್ಯಾ ರೂಪದ ಮೂರ್ತಿಯನ್ನು ಪ್ರತಿಸ್ಠಾಪಿಸಲಾಗಿದೆ. ಈ ಮಂದಿರಕ್ಕೆ ಪುರುಷರ ಪ್ರವೇಶವನ್ನು ಸಂಪೂರ್ಣ ನಿಷೇಧಿಸಲಾಗಿದೆ. ಅದಾಗ್ಯೂ ಬ್ರಹ್ಮಚಾರಿಗಳು ದೇಗುಲದ ದ್ವಾರದ ತನಕ ಹೋಗಬಹುದಾಗಿದೆ.

ತ್ರೈಬಂಕೇಶ್ವರ ದೇವಾಲಯ, ನಾಸಿಕ್: ಮಹಾರಾಷ್ಟ್ರದಲ್ಲಿರುವ ಈ ದೇವಾಲಯದ ಒಂದು ಪರಿಧಿವರೆಗೆ ಮಾತ್ರ ಮಹಿಳೆಯರಿಗೆ ಪ್ರವೇಶವಿದೆ. ಆದರೆ ಈ ಹಿಂದೆ ಪುರುಷರಿಗೆ ದೇವಸ್ಥಾನ ಪ್ರವೇಶಿಸಲು ಸಂಪೂರ್ಣ ಸ್ವಾತಂತ್ರ್ಯವಿತ್ತು. ಇಲ್ಲಿನ ಅಸಮಾನತೆ ವಿರುದ್ಧ ಪ್ರಕರಣ ದಾಖಲಿಸಲಾಗಿತ್ತು. ಈ ಹಿನ್ನೆಲೆಯಲ್ಲಿ ಬಾಂಬೆ ಹೈಕೋರ್ಟ್​ ಪುರುಷರ ಪ್ರವೇಶಕ್ಕೂ ನಿಷೇಧ ಹೇರಿದೆ ಎನ್ನಲಾಗಿದೆ.

ಬ್ರಹ್ಮ ದೇವಸ್ಥಾನ, ಪುಷ್ಕರ್: ರಾಜಸ್ಥಾನದ ಪುಷ್ಕರ್​ನಲ್ಲಿರುವ ಬ್ರಹ್ಮ ದೇವಸ್ಥಾನವನ್ನು 14 ನೇ ಶತಮಾನದಲ್ಲಿ ನಿರ್ಮಿಸಲಾಗಿದೆ. ಇದು ಏಕೈಕ ಬ್ರಹ್ಮ ದೇವಾಲಯವಾಗಿದ್ದು, ಇಲ್ಲಿನ ಪುಷ್ಕರ್ ಸರೋವರದಲ್ಲಿ ದೇವಿ ಸರಸ್ವತಿಯೊಂದಿಗೆ ಬ್ರಹ್ಮ ದೇವ ಯಜ್ಞ ಮಾಡಿದ್ದರು. ಈ ವೇಳೆ ಸರಸ್ವತಿ ದೇವಿಯು ಯಾವುದೊ ವಿಷಯಕ್ಕೆ ಕೋಪಗೊಂಡು ಈ ದೇವಾಲಯಕ್ಕೆ ಶಾಪ ನೀಡಿದ್ದರು ಎಂದು ನಂಬಲಾಗುತ್ತದೆ. ಈ ಹಿನ್ನೆಲೆಯಲ್ಲಿ ಈ ದೇವಾಲಯಕ್ಕೆ ವಿವಾಹಿತ ಪುರುಷರಿಗೆ ಅನುಮತಿ ನಿರಾಕರಿಸಲಾಗಿದೆ. ಅಂತೂ ಹೋದರೆ ಅವರ ವೈವಾಹಿಕ ಜೀವನದಲ್ಲಿ ತೊಂದರೆಗಳು ಕಾಣಿಸಿಕೊಳ್ಳುತ್ತದೆ ಎನ್ನಲಾಗುತ್ತದೆ. ಇಲ್ಲಿ ಅವಿವಾಹಿತರಿಗೆ ಪ್ರವೇಶವಿದ್ದು, ವಿವಾಹಿತರಿಗೆ ನಿರ್ಬಂಧ ವಿಧಿಸಲಾಗಿದೆ.

ಸಂತೋಷಿ ಮಾತೆ ಮಂದಿರ: ಸಂತೋಷಿ ಮಾತೆಯ ಉಪವಾಸ ವೃತವನ್ನು ಮಹಿಳೆಯರು ಮತ್ತು ಕನ್ಯಾ ಸ್ತ್ರೀಯರು ಕೈಗೊಳ್ಳುತ್ತಾರೆ. ಈ ಸಮಯದಲ್ಲಿ ಹುಳಿ ಪದಾರ್ಥಗಳನ್ನು ವೃತದಲ್ಲಿರುವವರು ತಿನ್ನುವಂತಿಲ್ಲ. ಹಾಗೆಯೇ ಪುರುಷರು ಶುಕ್ರವಾರ ದೇವಸ್ಥಾನವನ್ನು ಪ್ರವೇಶಿಸುವಂತಿಲ್ಲ. ಆದರೆ ಇಲ್ಲಿ ಇತರೆ ದಿನಗಳಲ್ಲಿ ಪುರುಷರು ದೇವಾಲಯ ಪ್ರವೇಶಿಸಬಹುದಾದರೂ, ಶುಕ್ರವಾರದಂದು ಮಾತ್ರ ದೇವಸ್ಥಾನಕ್ಕೆ ಹೋಗುವಂತಿಲ್ಲ.

ಮಾತಾ ದೇವಾಲಯ, ಮುಜಫರ್​ಪುರ್​: ಬಿಹಾರದಲ್ಲಿರುವ ಈ ದೇವಾಲಯದ ಆವರಣಕ್ಕೆ ನಿರ್ದಿಷ್ಟ ಸಮಯದಲ್ಲಿ ಪುರುಷರ ಪ್ರವೇಶವನ್ನು ನಿಷೇಧಿಸಲಾಗಿದೆ. ಈ ಸಮಯದಲ್ಲಿ ದೇವಾಲಯ ಆರ್ಚಕರು ಕೂಡ ಹೋಗುವಂತಿಲ್ಲ. ಆದರೆ ಇಲ್ಲಿಗೆ ಮಹಿಳೆಯರು ಯಾವುದೇ ಸಮಯದಲ್ಲೂ ಬೇಕಾದರೂ ಭೇಟಿ ನೀಡಬಹುದು.

ಕಾಮರೂಪ ಕಾಮಾಕ್ಯ ದೇವಾಲಯ: ಅಸ್ಸಾಂ ರಾಜ್ಯದಲ್ಲಿರುವ ಈ ದೇವಾಲಯದ ಆವರಣಕ್ಕೆ ಮಹಿಳೆಯರ ಪ್ರವೇಶಕ್ಕೆ ಮಾತ್ರ ಅನುಮತಿಯಿದೆ. ಇಲ್ಲಿ ಪುರುಷರ ಬದಲಾಗಿ ಮಹಿಳಾ ಆರ್ಚಕರನ್ನು ನೇಮಿಸಲಾಗುತ್ತದೆ. ಭಗವಾನ್​ ವಿಷ್ಣು ಅವರ ತಾಯಿ ಸತಿ ಮಾತೆಯ ನೆನಪಿಗಾಗಿ ಈ ದೇವಲಾಯವನ್ನು ನಿರ್ಮಿಸಲಾಗಿದ್ದು, ಇಲ್ಲಿ ಪುರುಷರ ಪ್ರವೇಶವನ್ನು ನಿಷೇಧಿಸಲಾಗಿದೆ.

ಚಕ್ಕುಲತುಕಾವು ದೇವಾಲಯ: ಕೇರಳದ ಅಲೆಪ್ಪಿ ಜಿಲ್ಲೆಯಲ್ಲಿರುವ ಚಕ್ಕುಲತುಕಾವು ದೇವಾಲಯದಲ್ಲಿ ಭಗವತಿ ದೇವಿಯನ್ನು ಪ್ರತಿಸ್ಠಾಪಿಸಲಾಗಿದೆ. ದುರ್ಗಾ ಮಾತೆಯ ಅವತಾರವನ್ನು ಪೂಜಿಸಲಾಗುತ್ತಿರುವ ಈ ದೇವಾಲಯದಲ್ಲಿ ವಿಶೇಷ ಮಹಿಳಾ ಪೂಜೆಗಳನ್ನು ನೆರವೇರಿಸಲಾಗುತ್ತದೆ. ಅಂತಹ ದಿನಗಳಲ್ಲಿ ಈ ದೇವಾಲಯಕ್ಕೆ ಪುರುಷರಿಗೆ ನಿಷೇಧ ಹೇರಲಾಗುತ್ತದೆ. ಇಲ್ಲಿನ ಆರ್ಚಕರು ಡಿಸೆಂಬರ್​ ತಿಂಗಳಲ್ಲಿ 10 ದಿನಗಳ ಕಾಲ ವೃತ ಆಚರಿಸುವುದಲ್ಲದೆ, ಮಹಿಳಾ ಭಕ್ತರ ಪಾದಗಳನ್ನು ತೊಳೆಯುತ್ತಾರೆ ಎನ್ನಲಾಗಿದೆ. ಈ ದಿನವನ್ನು ಧನು ಎನ್ನಲಾಗುತ್ತಿದ್ದು, ಅಂದು ದೇವಾಲಯದ ಆವರಣಕ್ಕೆ ಪುರುಷರಿಗೆ ನಿರ್ಬಂಧ ವಿಧಿಸಲಾಗುತ್ತದೆ.

ಅಟ್ಟುಕಲ್ ಮಂದಿರ: ಕೇರಳದ ಅಟ್ಟುಕಲ್ ಭಗವತಿ ಮಂದಿರದಲ್ಲಿ ಮಹಿಳೆಯರೇ ಪೂಜಾ ಕಾರ್ಯಗಳನ್ನು ನೆರವೇರಿಸುತ್ತಾರೆ. ಈ ದೇವಾಲಯದಲ್ಲಿ ಸುಮಾರು ಮೂರು ಮಿಲಿಯನ್ ಮಹಿಳೆಯರು ಸೇರಿ ಪೊಂಗಲ್ ಆಚರಿಸಿ ಗಿನ್ನಿಸ್ ದಾಖಲೆಯನ್ನು ಬರೆದಿದ್ದಾರೆ. ಇಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಮಹಿಳಾ ಭಕ್ತರು ಇರುವುದರಿಂದ ಈ ದೇವಾಲಯಕ್ಕೆ ಪುರುಷರಿಗೆ ಪ್ರವೇಶವಿಲ್ಲ.