Vande Metro: ವಂದೇ ಭಾರತ್ ರೈಲು ಮಾದರಿಯಲ್ಲೇ 'ವಂದೇ ಮೆಟ್ರೋ ಸೇವೆ': ರೈಲ್ವೆ ಸಚಿವ ಘೋಷಣೆ, ಡಿಟೈಲ್ಸ್ ಇಲ್ಲಿದೆ

ಭಾರತೀಯ ರೈಲ್ವೆ ಈಗಾಗಲೆ ದೇಶಾದ್ಯಂತ ವಂದೇ ಭಾರತ್ ಎಕ್ಸ್‌ಪ್ರೆಸ್ ರೈಲುಗಳನ್ನು ಆರಂಭಿಸಿರುವುದು ಎಲ್ಲರಿಗೂ ತಿಳಿದಿದೆ. ಈಗಾಗಲೇ 8 ವಂದೇ ಭಾರತ್ ರೈಲುಗಳು ಪ್ರಯಾಣಿಕರಿಗೆ ಸೇವೆ ನೀಡುತ್ತಿವೆ.  ಆಗಸ್ಟ್ 15 ರೊಳಗೆ 75 ವಂದೇ ಭಾರತ್ ರೈಲುಗಳನ್ನು ಮತ್ತು ಮುಂದಿನ ಮೂರ್ನಾಲ್ಕು ವರ್ಷಗಳಲ್ಲಿ 400 ವಂದೇ ಭಾರತ್ ರೈಲುಗಳನ ಸೇವೆ ಒದಗಿಸುವ ಗುರಿಯನ್ನು ಕೇಂದ್ರ ಸರ್ಕಾರ ಹೊಂದಿದೆ.

ವಂದೇ ಭಾರತ್ ರೈಲುಗಳ ಜೊತೆಗೆ ವಂದೇ ಮೆಟ್ರೋ ರೈಲುಗಳು ಶೀಘ್ರದಲ್ಲೇ ಬರಲಿವೆ. ಇವು ವಂದೇ ಭಾರತ್ ಎಕ್ಸ್‌ಪ್ರೆಸ್ ರೈಲುಗಳ ಮಿನಿ ಆವೃತ್ತಿಗಳಾಗಿವೆ. ವಂದೇ ಮೆಟ್ರೋ ರೈಲುಗಳ ತಯಾರಿಕೆ ಈ ವರ್ಷ ಪೂರ್ಣಗೊಳ್ಳಲಿದೆ. ಮುಂದಿನ ವರ್ಷ ಅಥವಾ ಈ ವರ್ಷದ ಅಂತ್ಯದಲ್ಲಿ ವಂದೇ ಮೆಟ್ರೋ ರೈಲುಗಳು ಪ್ರಯಾಣಿಕರ ಸಂಚಾರಕ್ಕೆ ಲಭ್ಯವಾಗಲಿದೆ.

ವಂದೇ ಮೆಟ್ರೋ ರೈಲುಗಳನ್ನು ದೊಡ್ಡ ನಗರಗಳ ಹತ್ತಿರದ ಭಾಗಗಳಲ್ಲಿ ಪ್ರಯಾಣಿಕರಿಗೆ ಅನುಕೂಲವಾಗಲು  ಆರಂಭಿಸಲಾಗುತ್ತಿದೆ. ಪ್ರಧಾನಿ ಮೋದಿಯವರ ದೂರದೃಷ್ಟಿಯ ಪ್ರಕಾರ ಸಂಪೂರ್ಣ ಮೇಡ್ ಇನ್ ಇಂಡಿಯಾ ವಂದೇ ಮೆಟ್ರೋ ರೈಲುಗಳು ಶೀಘ್ರದಲ್ಲೇ ಸಂಚಾರ ಆರಂಭಿಸಲಿವೆ ಎಂದು ರೈಲ್ವೆ ಸಚಿವ ಅಶ್ವಿನಿ ವೈಷ್ಣವ್ ಹೇಳಿದ್ದಾರೆ.

ಫೆಬ್ರವರಿ 1ರಂದು ಸಂಸತ್ತಿನಲ್ಲಿ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರು 2023ರ ಕೇಂದ್ರ ಬಜೆಟ್ ಮಂಡಿಸಿದರು.  ಈ ಬಜೆಟ್​ನಲ್ಲಿ ರೈಲ್ವೆ ಇಲಾಖೆಗ ಬರೋಬ್ಬರಿ 2.41 ಲಕ್ಷ ಕೋಟಿ ಅನುದಾನ ನೀಡಿದ ನಂತರ ರೈಲ್ವೆ ಸಚಿವ ಅಶ್ವನಿ ವೈಷ್ಣವ್ ಅವರು ವಂದೇ ಮೆಟ್ರೋ ಯೋಜನೆಯನ್ನು ಘೋಷಿಸಿದ್ದಾರೆ.

ವಂದೇ ಮೆಟ್ರೋ ರೈಲುಗಳನ್ನು ರೈಲ್ವೆ ಇಲಾಖೆಯು ಸೆಮಿಸ್ಪೀಡ್​ ಆವೃತ್ತಿಯಲ್ಲಿ ಅಭಿವೃದ್ಧಿಪಡಿಸುತ್ತಿದೆ. ಈ ರೈಲುಗಳು ಮೆಟ್ರೋ ರೈಲಿನಂತೆ ಎಂಟು ಕೋಚ್‌ಗಳನ್ನು ಹೊಂದಿವೆ. ಜನರು ತಮ್ಮ ಊರಿನಿಂದ ದೊಡ್ಡ ನಗರಗಳ ಕಚೇರಿಗಳಿಗೆ ಅನುಕೂಲಕರವಾಗಿ ಪ್ರಯಾಣಿಸಲು ಅನುಕೂಲವಾಗುವಂತೆ ವಂದೇ ಮೆಟ್ರೋವನ್ನು ಅಭಿವೃದ್ಧಿಪಡಿಸಲಾಗುತ್ತಿದೆ.

ಈ ರೈಲುಗಳು ಎಂಟು ಕೋಚ್‌ಗಳನ್ನು ಹೊಂದಿದ್ದು, ಮೆಟ್ರೋ ರೈಲಿನಂತೆ ಇರಲಿವೆ. ವಂದೇ ಭಾರತ್ ಮೆಟ್ರೋ ಪ್ರಯಾಣಿಕರು ಇದರಲ್ಲಿ ಸುಖಕರ ಪ್ರಯಾಣದ ಅನುಭವವನ್ನು ಪಡೆಯಬಹುದಾಗಿದೆ. ದೊಡ್ಡ ನಗರಗಳ ಸುತ್ತಲೂ ಇರುವ ಜನರು ಕೆಲಸಕ್ಕೆ, ಶಾಪಿಂಗ್ ಅಥವಾ ರಜಾ ದಿನಗಳಲ್ಲಿ ಸಮಯ ಕಳೆಯಲಯ ನಗರಕ್ಕೆ ಬರುತ್ತಾರೆ. ಹೀಗೆ ಬಂದವರು ತಮ್ಮ ಸ್ವಂತ ಊರಿಗೆ ಮರಳಲು ಬಯಸುತ್ತಾರೆ. ಅವರಿಗಾಗಿ ನಾವು ವಂದೇ ಮೆಟ್ರೋವನ್ನು ತರುತ್ತಿದ್ದೇವೆ ಎಂದು ರೈಲ್ವೆ ಸಚಿವರು ಹೇಳಿದ್ದಾರೆ.

ಭಾರತೀಯ ರೈಲ್ವೆ ಶೀಘ್ರದಲ್ಲೇ ಪ್ರಾರಂಭವಾಗಲಿರುವ ವಂದೇ ಮೆಟ್ರೋ ರೈಲುಗಳು 1950 ಮತ್ತು 60 ರ ದಶಕದಲ್ಲಿ ನಿರ್ಮಿಸಲಾದ ಹಳೆಯ ರೈಲುಗಳನ್ನು ರೀಪ್ಲೇಸ್ ಮಾಡಲಿದೆ. ಮೇ ಅಥವಾ ಜೂನ್ ವೇಳೆಗೆ ವಂದೇ ಮೆಟ್ರೋ ರೈಲುಗಳ ವಿನ್ಯಾಸ ಹೊರಬೀಳಲಿದೆ. ಈ ವರ್ಷದ ಅಂತ್ಯದ ವೇಳೆಗೆ ಪೂರ್ಣ ಪ್ರಮಾಣದ ಸಂಚಾರ ಆರಂಭಿಸಲಿವೆ.