Jagannath Temple: ಜಗನ್ನಾಥ ದೇವಾಲಯ ನಿರ್ಮಾಣಕ್ಕೆ 250 ಕೋಟಿ ದೇಣಿಗೆ ! ಇವರು ದೇಗುಲಕ್ಕೆ ಇಷ್ಟು ದೊಡ್ಡ ಮೊತ್ತ ನೀಡಿದ ಮೊದಲ ಉದ್ಯಮಿ

ಯುನೈಟೆಡ್​ ಕಿಂಗ್​ಡಮ್​ನಲ್ಲಿ ನಿರ್ಮಾಣವಾಗಲಿರುವ ಮೊದಲ ಜಗನ್ನಾಥ ದೇವಾಲಯ ನಿರ್ಮಾಣಕ್ಕೆ ಭಾರತದ ಒಡಿಶಾದ ಬಿಲಿಯನೇರ್ ವಿಶ್ವನಾಥ್ ಪಟ್ನಾಯಕ್ ಅವರು 250 ಕೋಟಿ ರೂಪಾಯಿಗಳನ್ನು ದೇಣಿಗೆ ನೀಡಲು ವಾಗ್ದಾನ ಮಾಡಿದ್ದಾರೆ ಎಂದು ತಿಳಿದುಬಂದಿದೆ.

ಒಂದು ವೇಳೆ ಇದು ನಿಜವಾಗಿಯೂ ಸಂಭವಿಸಿದರೆ, ಭಾರತೀಯ ಕೈಗಾರಿಕೋದ್ಯಮಿಯೊಬ್ಬ ವಿದೇಶಿ ನೆಲದಲ್ಲಿ ದೇವಾಲಯ ನಿರ್ಮಾಣಕ್ಕೆ ನೀಡಿದ ಅತಿದೊಡ್ಡ ದೇಣಿಗೆ ಇದಾಗಲಿದೆ ಎಂದು ತಿಳಿದುಬಂದಿದೆ.

ಯುಕೆಯಲ್ಲಿರುವ ಶ್ರೀ ಜಗನ್ನಾಥ್ ಸೊಸೈಟಿಯ ಅಧ್ಯಕ್ಷ ಡಾ. ಸಹದೇವ್ ಸ್ವೈನ್ ಮತ್ತು ಫೈನೆಸ್ಟ್ ಗ್ರೂಪ್‌ನ ವ್ಯವಸ್ಥಾಪಕ ನಿರ್ದೇಶಕ ಅರುಣ್ ಕರ್ ಅವರು ಭಾನುವಾರ (ಏಪ್ರಿಲ್ 23) ಈ ವಿಚಾರವನ್ನು ಘೋಷಿಸಿದ್ದಾರೆ. ಇನ್ವೆಸ್ಟರ್ ಮತ್ತು ಫೈನೆಸ್ಟ್ ಗ್ರೂಪ್‌ನ ಅಧ್ಯಕ್ಷ ಬಿಸ್ವನಾಥ್ ಪಟ್ನಾಯಕ್ ಅವರು ದೇವಾಲಯದ ನಿರ್ಮಾಣಕ್ಕೆ ದೇಣಿಗೆ ನೀಡಲು ವಾಗ್ದಾನ ಮಾಡಿದ್ದಾರೆ ಎಂದು ಹೇಳಿದ್ದಾರೆ.

ಈ ದೇಣಿಗೆ ಮತ್ತು ಜಗನ್ನಾಥನ ಆಶೀರ್ವಾದದೊಂದಿಗೆ, ಲಂಡನ್‌ನಲ್ಲಿ ಭವ್ಯವಾದ ಜಗನ್ನಾಥ ದೇವಾಲಯವನ್ನು ನಿರ್ಮಿಸುವವುದಕ್ಕೆ ಯುಕೆಯ ಶ್ರೀ ಜಗನ್ನಾಥ ಸೊಸೈಟಿ ಬದ್ಧವಾಗಿದೆ ಎಂದು ಹೇಳಿದ್ದಾರೆ.

ಪಟ್ನಾಯಕ್​ ಅವರು ಈಗಾಗಲೇ ಲಂಡನ್‌ನ ಹೊರವಲಯದಲ್ಲಿ ಸುಮಾರು 15 ಎಕರೆ ಭೂಮಿಯನ್ನು ಖರೀದಿಸಲು 70 ಕೋಟಿ ರೂಪಾಯಿಗಳನ್ನು ನೀಡಿದೆ ಎಂದು ಫೈನೆಸ್ಟ್ ಕಂಪನಿಯ ಎಂಡಿ ಅರುಣ್​ಮಾಹಿತಿ ನೀಡಿದ್ದಾರೆ.

ದೇವಾಲಯದ ನಿರ್ಮಾಣದ ಮೊದಲ ಹಂತವು 2024 ರ ಅಂತ್ಯದ ವೇಳೆಗೆ ಪೂರ್ಣಗೊಳ್ಳಲಿದೆ ಎಂದು ಅರುಣ್ ಕರ್ ತಿಳಿಸಿದ್ದಾರೆ. ದೇವಸ್ಥಾನಕ್ಕೆ ಸೂಕ್ತ ಒಂದು ಎಕರೆ ಜಾಗ ಗುರುತಿಸಲಾಗಿದ್ದು, ಸದ್ಯ ಅಂತಿಮ ಹಂತದಲ್ಲಿದೆ ಎಂದರು. ಜಗನ್ನಾಥ ದೇವರ ಸಮಾವೇಶಕ್ಕೆ 600 ಕ್ಕೂ ಹೆಚ್ಚು ಭಕ್ತರು ತಮ್ಮನ್ನು ನೋಂದಾಯಿಸಿಕೊಂಡಿದ್ದಾರೆ ಎಂದು ಅರುಣ್ ತಿಳಿಸಿದ್ದಾರೆ.

ಲಂಡನ್‌ನಲ್ಲಿ ನಿರ್ಮಾಣವಾಗಲಿರುವ ಜಗನ್ನಾಥ ದೇವಾಲಯವು ಯುರೋಪ್‌ನಲ್ಲಿ ಜಗನ್ನಾಥ ಸಂಸ್ಕೃತಿಯ ಕೇಂದ್ರವಾಗಲಿದೆ ಮತ್ತು ಪ್ರಪಂಚದಾದ್ಯಂತದ ಸಾವಿರಾರು ಭಕ್ತರು ಮತ್ತು ಪ್ರವಾಸಿಗರನ್ನು ಆಕರ್ಷಿಸುವ ಪ್ರಮುಖ ಯಾತ್ರಾ ಕೇಂದ್ರವಾಗಿ ಅಭಿವೃದ್ಧಿ ಹೊಂದಲಿದೆ ಎಂದು ಜಗನ್ನಾಥ್ ಸೊಸೈಟಿಯ ಅಧ್ಯಕ್ಷ ಡಾ. ಸಹದೇವ್ ಸ್ವೈನ್ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.