Lahari Pathivada: ಕೆಲಸಕ್ಕೆ ಹೋಗಿದ್ದಾಕೆ ಅಮೆರಿಕಾದಲ್ಲಿ ಶವವಾಗಿ ಪತ್ತೆ! ಏನಾಯ್ತು ಈ ಸುಂದರ ಯುವತಿಗೆ?

ಮೃತ ಯುವತಿಯನ್ನು 25 ವರ್ಷದ ಲಹರಿ ಪಥಿವಾಡ ಎಂದು ಗುರುತಿಸಲಾಗಿದ್ದು, ಇವರು ಮೆಕಿನ್ನಿ ಉಪನಗರದಲ್ಲಿ ಎಂದಿನಂತೆ ಕೆಲಸ ಮಾಡಲು ತನ್ನ ಬ್ಲಾಕ್ ಟೊಯೊಟಾ ಕಾರ್‌ನಲ್ಲಿ ಹೋಗಿದ್ದರು.

ಆದರೆ ಸಂಜೆ ಮನೆಗೆ ವಾಪಸ್ ಬರದೇ ಇದ್ದಾಗ ಚಿಂತಾಕ್ರಾಂತರಾದ ಮನೆಯವರು ಪೊಲೀಸರಿಗೆ ದೂರು ನೀಡಿದ್ದು, ಪೊಲೀಸರು ಶೋಧ ನಡೆಸಿದಾಗ ಕಾಣೆಯಾದ ಒಂದು ದಿನದ ನಂತರ ಲಹರಿ ಶವವಾಗಿ ಪತ್ತೆಯಾಗಿದ್ದಾರೆ.

ತಾನು ಕೆಲಸಕ್ಕೆ ಹೋಗುವ ವೇಳೆ ಕಣ್ಮರೆಯಾಗಿದ್ದು, ಲಹರಿ ಪಥಿವಾಡ ಅವರ ಶವ ಪಕ್ಕದ ರಾಜ್ಯ ಒಕ್ಲಹೋಮದಲ್ಲಿ (322 ಕಿಲೋ ಮೀಟರ್ ದೂರದಲ್ಲಿ) ಪತ್ತೆಯಾಗಿದೆ.

ಲಹರಿ ಪಥಿವಾಡ ಅವರು ಕೊನೆಯ ಬಾರಿಗೆ ತನ್ನ ಬ್ಲಾಕ್‌ ಟೊಯೊಟಾವನ್ನು ಎಲ್ ಡೊರಾಡೊ ಪಾರ್ಕ್‌ವೇ ಮತ್ತು ಡಲ್ಲಾಸ್ ಉಪನಗರದ ಹಾರ್ಡಿನ್ ಬೌಲೆವಾರ್ಡ್ ಪ್ರದೇಶದ ಸುತ್ತಮುತ್ತ ಓಡಿಸುತ್ತಿದ್ದರು ಎಂದು ಟೆಕ್ಸಾಸ್‌ನ ಕಾಲಿನ್ಸ್ ಕೌಂಟಿಯ ಮೆಕಿನ್ನಿ ನಿವಾಸಿಯೊಬ್ಬರು ಹೇಳಿದ್ದಾರೆ.

ಅಂದಹಾಗೆ ಲಹರಿ ಪಥಿವಾಡ ಅವರು ಓವರ್‌ಲ್ಯಾಂಡ್ ಪಾರ್ಕ್ ಪ್ರಾದೇಶಿಕ ವೈದ್ಯಕೀಯ ಕೇಂದ್ರದಲ್ಲಿ ಕೆಲಸ ಮಾಡುತ್ತಿದ್ದರು ಎಂದು ಅವರ ಫೇಸ್‌ಬುಕ್ ಪೇಜ್‌ನಲ್ಲಿ ಹಾಕಲಾಗಿದೆ.

ಕಾಣೆಯಾದ ಬಳಿಕ ಲಹರಿ ಫೋನ್‌ ಅನ್ನು ಪೊಲೀಸರು ಟ್ರೇಸ್‌ ಮಾಡಿದಾಗ ಆಕೆಯ ಫೋನ್ 322 ಕಿಲೋ ಮೀಟರ್ ದೂರದ ಒಕ್ಲಹೋಮದಲ್ಲಿ ಇರೋದಾಗಿ ಆಕೆಯ ಸ್ನೇಹಿತರು ಮತ್ತು ಕುಟುಂಬದ ಸದಸ್ಯರಿಗೆ ಪೊಲೀಸರು ತಿಳಿಸಿದ್ದಾರೆ.

ಲಹರಿ ಪಥಿವಾಡ ಅವರು ನೃತ್ಯ ಸೇರಿದಂತೆ ಮನರಂಜನಾ ಕ್ಷೇತ್ರದಲ್ಲಿ ತುಂಬಾ ಆಸಕ್ತಿ ಹೊಂದಿದ್ದರು. ಇದೀಗ ಅವರ ಸಾವು ಸ್ನೇಹ ವಲಯ ಮತ್ತು ಕುಟುಂಬ ವರ್ಗದಲ್ಲಿ ತೀವ್ರ ಆಘಾತವನ್ನುಂಟು ಮಾಡಿದೆ.