Marriage: ಹಳೇ ಮಂಚ ಕೊಟ್ಟರೆಂದು ತನ್ನದೇ ಮದುವೆಯಿಂದ ಜೂಟ್​ ಆದ ವರ; ಅರ್ಧದಲ್ಲೇ ನಿಂತ ಕಾರ್ಯಕ್ರಮ, ಮುಂದೇನಾಯ್ತು?

ಮದುವೆ ಎಂಬುದು ಎಲ್ಲರ ಜೀವನದಲ್ಲಿ ಬರುವ ಒಂದು ಅವಿಸ್ಮರಣೀಯ ಘಟ್ಟ. ಆದ್ದರಿಂದಲೇ ಮಧ್ಯಮ ವರ್ಗ, ಬಡವರು ಕೂಡ ತಮ್ಮ ಕೈಯಲ್ಲಿ ಅದಷ್ಟು ಗ್ರ್ಯಾಂಡ್ ಆಗಿಯೇ ಮದುವೆಯಾಗಬೇಕು ಎಂದು ಕನಸು ಕಣ್ತಾರೆ. ಇಂತಹ ಮದುವೆ ಕಾರ್ಯಕ್ರಮ ನಡೆಯಬೇಕಾದರೆ ವಧುವಿನ ಕುಟುಂಬಸ್ಥರು ವರನಿಗೆ ಅಂತ ವರದಕ್ಷಿಣೆ ರೂಪಾದಲ್ಲಿ ಕೆಲವು ವಸ್ತುಗಳನ್ನು ನೀಡುವ ಸಂಪ್ರದಾಯ ಎಲ್ಲಾ ಕಡೆ ನಡೆಯುತ್ತದೆ.

ಆದರೆ, ಮದುವೆ ಸಂದರ್ಭದಲ್ಲಿ ವರನಿಗೆ ನೀಡುವ ವಸ್ತುಗಳಲ್ಲಿ ಹಳೆಯ ಮಂಚ ನೀಡಿದ್ದಾರೆ ಎಂದು ವರ ಅಸಮಾಧಾನ ವ್ಯಕ್ತಪಡಿಸಿ, ಮದುವೆಗೆ ಕೆಲವೇ ನಿಮಿಷಗಳು ಬಾಕಿ ಇರುವ ಸಂದರ್ಭದಲ್ಲಿ ಕಲ್ಯಾಣ ಮಂಟಪಕ್ಕೆ ಬಾರದರೆ ತನ್ನದೆ ಮದುವೆಗೆ ಗೈರಾದ ಘಟನೆ ಹೈದರಾಬಾದ್​ನ ಬಂಡ್ಲಗೂಡದಲ್ಲಿ ವರದಿಯಾಗಿದೆ.

ಹೈದರಾಬಾದ್​ನ ಮೌಲಾಲಿ ಪ್ರದೇಶದ ನಿವಾಸಿಯಾಗಿದ್ದ ಯುವಕನಿಗೆ ಹಾಗೂ ಬಂಡ್ಲಗೂಡ ನಿವಾಸಿಯಾಗಿದ್ದ ಯುವತಿಗೆ ಹಿರಿಯರು ಮದುವೆ ನಿಶ್ಚಯ ಮಾಡಿದ್ದರು. ಮೂರು ದಿನಗಳ ಹಿಂದಷ್ಟೇ ಕುಟುಂಬ ಸದಸ್ಯರ ಸಮ್ಮುಖದಲ್ಲಿ ಇಬ್ಬರಿಗೂ ನಿಶ್ಚಿತಾರ್ಥ ಕಾರ್ಯಕ್ರಮ ಕೂಡ ಮಾಡಲಾಗಿತ್ತು. ಅಲ್ಲದೆ, ಮೂರು ದಿನಗಳ ಅಂತರದಲ್ಲಿ ಅಂದರೆ ಭಾನುವಾರ ಮದುವೆಗೆ ಮುಹೂರ್ತ ಫಿಕ್ಸ್ ಮಾಡಿ ಎಲ್ಲಾ ತಯಾರಿ ಮಾಡಿಕೊಂಡಿದ್ದರು.

ಮದುವೆ ಸಂದರ್ಭದಲ್ಲಿ ವಧುವಿನ ಕುಟುಂಬಸ್ಥರು ವರನಿಗೆ ಸಂಪ್ರದಾಯದ ಅನ್ವಯ ಕೆಲ ಫರ್ನೀಚರ್​ಗಳನ್ನು ನೀಡಬೇಕಾಗಿತ್ತು. ಇದರಂತೆ ಯುವತಿ ಕುಟುಂಬಸ್ಥರು ವರನ ಮನೆಗೆ ಹಾಸಿಗೆ, ಬೀರುವ ಸೇರಿದಂತೆ ಕೆಲವು ವಸ್ತುಗಳನ್ನು ಕಳುಹಿಸಿದ್ದರು.

ಯುವತಿಯ ಕುಟುಂಸ್ಥರು ವರನ ಮನೆಗೆ ಕಳುಹಿಸಿದ್ದ ಮಂಚವನ್ನು ಸೆಟಪ್​ ಮಾಡುತ್ತಿದ್ದಾಗ ಮಂಚದ ಒಂದು ಭಾಗ ಮುರಿದು ಹೋಗಿತ್ತು ಎನ್ನಲಾಗಿದೆ. ಇದರಿಂದ ವರ, ವಧುವಿನ ಕುಟುಂಸ್ಥರ ವಿರುದ್ಧ ಕೋಪಗೊಂಡಿದ್ದನಂತೆ. ಅಲ್ಲದೆ, ಹಳೆಯ ಮಂಚಕ್ಕೆ ಹೊಸದಾಗಿ ಬಣ್ಣ ಹಾಕಿ ಕಳುಹಿಸಿದ್ದಾರೆ ಅಂತ ಅಸಮಾಧಾನ ಹೊರ ಹಾಕಿದ್ದನಂತೆ.

ಇತ್ತ ಭಾನುವಾರ ಮದುವೆಗೆ ವಧುವಿನ ಕಡೆಯವರು ಎಲ್ಲಾ ಸಿದ್ಧತೆಗಳನ್ನು ಮಾಡಿಕೊಂಡಿದ್ದರಂತೆ. ಮದುವೆ ಕಾರ್ಯಕ್ರಮಕ್ಕೆ ವರನ ಕಡೆವರು ಆಗಮಿಸಿದ್ದರಂತೆ. ಆದರೆ ಎಷ್ಟೇ ಸಮಯವಾದರೂ ಕಲ್ಯಾಣ ಮಂಟಪಕ್ಕೆ ವರನ ಕಡೆಯವರು ಬಾರದ ಹಿನ್ನೆಲೆಯಲ್ಲಿ, ವಧುವಿನ ಕುಟುಂಬಸ್ಥರು ಯುವಕನ ಮನೆ ಬಳಿಯೇ ತೆರಳಿ ಏನಾಯ್ತು ಎಂದು ತಿಳಿದುಕೊಳ್ಳಲು ಮುಂದಾಗಿದ್ದರಂತೆ.

ಇನ್ನು, ಮನೆಯ ಬಳಿ ಬಂದ ಯುವತಿಯ ತಂದೆ ಮದುವೆಗೆ ಯಾಕೆ ಬರಲಿಲ್ಲ ಎಂದು ವರನನ್ನು ಪ್ರಶ್ನೆ ಮಾಡಿದ್ದಾರೆ. ಇದಕ್ಕೆ ಉತ್ತರಿಸಿದ ವರ, ತನಗೆ ಹಳೆ ಮಂಚ ಕೊಟ್ಟಿದ್ದೀರಿ, ಅದು ಫಿಕ್ಸ್ ಮಾಡುವಾಗಲೇ ಮುರಿದು ಹೋಗಿದೆ ಎಂದು ಹೇಳಿ ಅಸಮಾಧಾನ ಹೊರ ಹಾಕಿದ್ದನಂತೆ. ಇದೇ ವೇಳೆ ಮಾತಿಗೆ ಮಾತು ಬೆಳೆದು ಎರಡು ಕುಟುಂಬಗಳ ನಡುವೆ ಜಗಳ ಕೂಡ ಆಗಿದೆ. ಇದರೊಂದಿಗೆ ವರ ತಾನು ಮದುವೆಯಾಗುವುದಿಲ್ಲ ಎಂದು ಹೇಳಿದ್ದನಂತೆ.

ಇದರೊಂದಿಗೆ ವಧುವಿನ ಕುಟುಂಬಸ್ಥರು ಪೊಲೀಸರಿಗೆ ದೂರ ನೀಡಿದ್ದಾರೆ. ಇತ್ತ ಪೊಲೀಸರು ಕೂಡ ವರನಿಗೆ ಬುದ್ಧಿ ಮಾತು ಹೇಳಿ ಮದುವೆಗೆ ಒಪ್ಪಿಸಿದ್ದರಂತೆ. ಆದರೆ ಯುವತಿಯ ತಂದೆ ಮದುವೆಗೆ ನಿರಾಕರಿಸಿದ ಕಾರಣ ಮದುವೆ ಮಧ್ಯದಲ್ಲೇ ನಿಂತು ಹೋಗಿದೆ. ಸದ್ಯ ಪೊಲೀಸರು ಎರಡೂ ಕುಟುಂಬಸ್ಥರ ನಡುವೆ ಮಾತುಕತೆ ನಡೆಸಿದ್ದು, ಮದುವೆಗೆ ಅರ್ಧಕ್ಕೆ ನಿಂತು ಹೋಗಿದೆ.