ಚಾಲಕರ ಗಮನಕ್ಕೆ: ನೀವಿನ್ನೂ ನಿಮ್ಮ ಲೈಸೆನ್ಸ್​ ನವೀಕರಿಸಿಲ್ವಾ? ಹಾಗಿದ್ರೆ ಮುಂದಿದೆ ತೊಂದರೆ..!

ಚಾಲಕರೇ ಗಮನಿಸಿ...ಒಂದು ವೇಳೆ ನೀವು ಬೈಕ್ ಅಥವಾ ಇತರೆ ವಾಹನಗಳ ಚಾಲನಾ ಪರವಾನಗಿಯನ್ನು ನವೀಕರಿಸದಿದ್ದರೆ, ಇನ್ನು ಮುಂದೆ ಲೈಸೆನ್ಸ್ ಪಡೆಯುವುದು ಅಷ್ಟು ಸುಲಭವಲ್ಲ. ಏಕೆಂದರೆ...

ಕೇಂದ್ರ ಸರ್ಕಾರದ ಹೊಸ ವಾಹನ ಕಾಯ್ದೆ ಪ್ರಕಾರ ಒಂದು ವರ್ಷಕ್ಕೂ ಹೆಚ್ಚು ಕಾಲ ಚಾಲನಾ ಪರವಾನಗಿ ನವೀಕರಿಸದಿದ್ದರೆ ನೀವು ಮತ್ತೆ ಡ್ರೈವಿಂಗ್ ಟೆಸ್ಟ್​ಗೆ ಒಳಗಾಗಬೇಕಾಗುತ್ತದೆ.

ಒಂದು ವರ್ಷದವರೆಗೂ ಲೈಸೆನ್ಸ್ ರಿನಿವ್ಯೂ ಮಾಡದಿದ್ದರೆ ಅವರನ್ನು ಹೊಸ ಚಾಲಕರೆಂದು ಪರಿಗಣಿಸಲಾಗುತ್ತದೆ. ಅಲ್ಲದೆ 20 ಅಂಕಗಳ ಪರೀಕ್ಷೆಯನ್ನು ಎದುರಿಸಿ, ಹೊಸ ಲೈಸೆನ್ಸ್​ಗಾಗಿ 30 ದಿನಗಳ ಕಾಲ ಕಾಯಬೇಕಾಗುತ್ತದೆ ಎಂದು ತಿಳಿಸಲಾಗಿದೆ.

ಈ ಒಂದು ವರ್ಷದೊಳಗೆ ಪರವಾನಗಿ ಅವಧಿ ಮುಗಿದು ಚಾಲನೆ ವೇಳೆ ಸಿಕ್ಕಿ ಬಿದ್ದರೆ ಡ್ರೈವರ್​ಗೆ 500 ರೂ. ದಂಡವನ್ನು ವಿಧಿಸಲಾಗುತ್ತದೆ. ಅದರೊಂದಿಗೆ ಲೈಸೆನ್ಸ್ ಪಡೆಯಲು ಒಂದು ತಿಂಗಳ ಸಮಯವಕಾಶ ನೀಡಲಾಗುತ್ತದೆ ಎಂದು ತಿಳಿಸಿದೆ.

ಈ ಬಗ್ಗೆ ಮಾತನಾಡಿರುವ ಪ್ರಾದೇಶಿಕ ಸಾರಿಗೆ ಅಧಿಕಾರಿ ಅಭಯ್ ದೇಶಪಾಂಡೆ, ನಾವು ಮೋಟಾರು ವಾಹನ (ತಿದ್ದುಪಡಿ) ಕಾಯ್ದೆಯನ್ನು ಕಟ್ಟುನಿಟ್ಟಾಗಿ ಜಾರಿಗೆ ತರಲು ಮುಂದಾಗುತ್ತಿದ್ದೇವೆ. ಈಗಾಗಲೇ ಮಹಾರಾಷ್ಟ್ರದ 50 ಆರ್‌ಟಿಒಗಳಲ್ಲಿ ಹೊಸ ಆದೇಶವನ್ನು ಕಾರ್ಯಗತಗೊಳಿಸಲು ಪ್ರಾರಂಭಿಸಿದೆ.

ಒಂದು ವೇಳೆ ಚಾಲಕರು ಲೆಸೆನ್ಸ್​ ಅನ್ನು ವರ್ಷಗಳ ಕಾಲ ನವೀಕರಿಸದಿದ್ದರೆ, ಅವರಿಗೆ ಯಾವುದೇ ಸ್ಪೆಷಲ್ ವಿಶೇಷ ಸೌಲಭ್ಯಗಳಿರುವುದಿಲ್ಲ. ಹೊಸ ಚಾಲಕರಂತೆ ಪರವಾನಗಿಗಾಗಿ ಕ್ಯೂ ನಿಲ್ಲಬೇಕಾಗುತ್ತದೆ ಎಂದು ತಿಳಿಸಿದ್ದಾರೆ.

ಹಾಗೆಯೇ, ಯಾರಾದರೂ 30 ವರ್ಷಕ್ಕಿಂತ ಕಡಿಮೆ ವಯಸ್ಸಿನವರಾಗಿದ್ದರೆ, 40 ವರ್ಷ ತುಂಬುವವರೆಗೆ ಚಾಲನಾ ಪರವಾನಗಿ ನೀಡಲಾಗುತ್ತದೆ.

ಅದೇ ರೀತಿ, 30 ವರ್ಷ ಮತ್ತು 50 ವರ್ಷದ ಒಳಗಿರುವವರಿಗೆ 10 ವರ್ಷಗಳವರೆಗೆ ಪರವಾನಗಿ ನೀಡಲಾಗುತ್ತದೆ.

ಇನ್ನು 50 ಮತ್ತು 55 ವರ್ಷದ ಒಳಗಿನವರಿಗೆ 60 ವರ್ಷದವರೆಗೆ ಪರವಾನಗಿ ನೀಡಲಾಗುತ್ತದೆ.

55 ವರ್ಷಕ್ಕಿಂತ ಮೇಲ್ಪಟ್ಟವರಿಗೆ 5 ವರ್ಷಗಳ ಕಾಲ ಪರವಾನಗಿ ನೀಡಲಾಗುತ್ತದೆ ಎಂದು ಹೊಸ ಕಾನೂನಿನಲ್ಲಿ ತಿಳಿಸಲಾಗಿದೆ.

ಇನ್ನು ಕಮರ್ಷಿಯಲ್ ಡ್ರೈವಿಂಗ್ ಲೈಸೆನ್ಸ್ ಪ್ರತಿ 5 ವರ್ಷಗಳಿಗೊಮ್ಮೆ ನವೀಕರಿಸಬೇಕು ಎಂದು ಹೇಳಲಾಗಿದೆ.

ಈ ಹೊಸ ನಿಯಮವು ಶೀಘ್ರದಲ್ಲೇ ಎಲ್ಲಾ ರಾಜ್ಯಗಳಲ್ಲೂ ಜಾರಿಗೆ ಬರಲಿದೆ ಎಂದು ಪ್ರಾದೇಶಿಕ ಸಾರಿಗೆ ಅಧಿಕಾರಿ ಅಭಯ್ ದೇಶಪಾಂಡೆ ತಿಳಿಸಿದ್ದಾರೆ.