Hyderabad: ಪಾರ್ಸೆಲ್ ನೀಡಲು ಹೋದಾಗ ನಾಯಿ ದಾಳಿ! 3ನೇ ಮಹಡಿಯಿಂದ ಬಿದ್ದು ಡೆಲಿವರಿ ಬಾಯ್ ಗಂಭೀರ

ಹೈದರಾಬಾದ್‌ನ ಪಂಚವಟಿ ಕಾಲೋನಿಯಲ್ಲಿರುವ ಶ್ರೀನಿಧಿ ಹೈಟ್ಸ್‌ ಅಪಾರ್ಟ್‌ಮೆಂಟ್‌ನಲ್ಲಿ ಈ ಘಟನೆ ನಡೆದಿದ್ದು, ಡೆಲಿವರಿ ಬಾಯ್‌ ಮೂರನೇ ಮಹಡಿಗೆ ಆರ್ಡರ್ ಮಾಡಿದ್ದ ಹಾಸಿಗೆ ನೀಡಲು ಹೋದಾಗ ಡಾಬರ್‌ಮೆನ್ ನಾಯಿ ಅಟ್ಟಾಡಿಸಿಕೊಂಡು ಬಂದಿದೆ.

ಹೀಗಾಗಿ ಮೊದಲೇ ಬೃಹತ್ ಗಾತ್ರದ ನಾಯಿಯ ಅಟ್ಟಹಾಸ ಕಂಡು ಭೀತಿಗೊಂಡ ಡೆಲಿವರಿ ಬಾಯ್ ಭಯದಿಂದ ತನ್ನನ್ನು ತಾನು ರಕ್ಷಿಸಿಕೊಳ್ಳಲು ಕಟ್ಟಡದ ಮೂರನೇ ಮಹಡಿಯಿಂದ ಜಿಗಿದಿದ್ದಾರೆ.

ಪೋಲೀಸರು ಹೇಳುವ ಪ್ರಕಾರ, ಡೆಲಿವರಿ ಬಾಯ್ ಇಲ್ಯಾಸ್‌ (30 ವರ್ಷ) ಹಾಸಿಗೆ ವಿತರಿಸಲು ಮನೆಗೆ ಹೋದಾಗ ಗ್ರಾಹಕರ ಮನೆಯ ನಾಯಿ ಬಾಗಿಲ ಬಳಿ ಬೊಗಳಲು ಆರಂಭಿಸಿದೆ.

ಬಾಗಿಲು ಅದಾಗಲೇ ಅರ್ಧ ತೆರೆದಿದ್ದರಿಂದ ನಾಯಿ ಇಲ್ಯಾಸ್‌ನನ್ನು ಅಟ್ಟಾಡಿಸಿಕೊಂಡು ಬಂದಿದ್ದು, ಅದರಿಂದ ಪಾರಾಗಲು ಓಡಿ ಬಂದ ಇಲ್ಯಾಸ್ ಕಾಲು ಜಾರಿ ಕಟ್ಟಡದಿಂದ ಬಿದ್ದು ಗಂಭೀರ ಗಾಯಕ್ಕೊಳಗಾಗಿದ್ದಾರೆ.

ಡೆಲಿವರಿ ಬಾಯ್ ಇಲ್ಯಾಸ್ ಕಟ್ಟಡದಿಂದ ಕೆಳಗೆ ಬಿದ್ದ ತಕ್ಷಣ ಮನೆಯ ಯಜಮಾನ ಮತ್ತು ನೆರೆಹೊರೆಯವರು ಆತನನ್ನು ರಕ್ಷಿಸಿ ಆಸ್ಪತ್ರೆಗೆ ದಾಖಲಿಸಿದ್ದಾರೆ.

ಘಟನೆ ಸಂಬಂಧ ರಾಯದುರ್ಗಂ ಪೊಲೀಸರು ಭಾರತೀಯ ದಂಡ ಸಂಹಿತೆಯ (ಐಪಿಸಿ) ಸೆಕ್ಷನ್ 289 ರ ಅಡಿಯಲ್ಲಿ ಪ್ರಕರಣ ದಾಖಲಿಸಿದ್ದಾರೆ.

ಪ್ರಕರಣ ಸಂಬಂಧ ಸ್ಥಳೀಯ ಪೊಲೀಸರು ಎಫ್‌ಐಆರ್ ದಾಖಲಿಸಿದ್ದು, ಅತ್ತ ತೆಲಂಗಾಣ ಗಿಗ್ ಮತ್ತು ಪ್ಲಾಟ್‌ಫಾರ್ಮ್ ವರ್ಕರ್ಸ್ ಯೂನಿಯನ್ (ಟಿಜಿಪಿಡಬ್ಲ್ಯುಯು) ಪ್ರಕಟಣೆಯಲ್ಲಿ ನಾಯಿ ಮಾಲೀಕರು ಡೆಲಿವರಿ ಬಾಯ್‌ನ ಚಿಕಿತ್ಸೆಯ ವೆಚ್ಚವನ್ನು ಭರಿಸಬೇಕೆಂದು ಒತ್ತಾಯಿಸಿದ್ದಾರೆ.