ATM ನಲ್ಲಿ ಹಣ ಸಿಲುಕಿದ್ರೆ ಹಿಂಪಡೆಯುವುದು ಈಗ ಮತ್ತಷ್ಟು ಸುಲಭ

ಎಟಿಎಂನಿಂದ ಟ್ರಾನ್ಸಕ್ಷನ್ ಮಾಡುವಾಗ ತಾಂತ್ರಿಕ ತೊಂದರೆಗೆ ಹಲವು ಬಾರಿ ಒಳಗಾಗುತ್ತೀರಿ. ಅದರಲ್ಲೂ ಹಣ ಠೇವಣಿ ಇಡುವಂತಹ ಎಟಿಎಂಗಳಲ್ಲಿ ಈ ಸಮಸ್ಯೆ ಕಾಣಿಸುವುದು ಸಾಮಾನ್ಯ. ಎಟಿಎಂನಿಂದ ಹಣ ಬರದೇ, ನಿಮ್ಮ ಅಕೌಂಟ್​ನಿಂದ ದುಡ್ಡು ಕಡಿತಗೊಂಡರೆ ಇನ್ಮುಂದೆ ಜಾಸ್ತಿ ತಲೆ ಕೆಡಿಸಿಕೊಳ್ಳಬೇಕಾದ ಅಗತ್ಯವಿಲ್ಲ. ಏಕೆಂದರೆ ಬ್ಯಾಂಕುಗಳು ನಿಮಗೆ ಸುಲಭವಾಗಿ ಹಣ ಮರಳಿಸಲಿದೆ. ಇಂತಹ ಪರಿಸ್ಥಿತಿಯಲ್ಲಿ ನೀವು ಮಾಡಬೇಕಿರುವುದು ಇಷ್ಟೇ.

ಎಟಿಎಂಗಳಲ್ಲಿ ನಿಮ್ಮ ಟ್ರಾನ್ಸಕ್ಷನ್ ವಿಫಲವಾದರೆ ಎಟಿಎಂನಿಂದ ಹೊರಡುವ ಮುನ್ನ ವಹಿವಾಟಿನ ಸ್ಲಿಪ್​ ಅನ್ನು ತೆಗೆದುಕೊಳ್ಳಿ. ಈ ಸ್ಲಿಪ್​ನಲ್ಲಿ ಎಟಿಎಂ ಮಾಹಿತಿ, ಸ್ಥಳ, ಸಮಯ ಮತ್ತು ರೆಸ್ಪಾನ್ಸ್​ ಕೋಡ್​ ಐಡಿಗಳನ್ನು ಮುದ್ರಿಸಲಾಗಿರುತ್ತದೆ. ಈ ಸ್ಲಿಪ್​ ಅನ್ನು ಲಗತ್ತಿಸಿ ನಿಮ್ಮ ಬ್ಯಾಂಕ್ ಶಾಖೆಗೆ ದೂರು ನೀಡಿ. ಇನ್ನು ಎಟಿಎಂನಿಂದ ಸ್ಲಿಪ್​ ಬರದಿದ್ದರೆ, ನೀವು ಹೇಳಿಕೆಯ ಮೂಲಕ ದೂರು ನೀಡಬಹುದು. ಈ ದೂರನ್ನು ಪರಿಶೀಲಿಸಿ ಬ್ಯಾಂಕ್  ನಿಮ್ಮ ಹಣವನ್ನು ಹಿಂತಿರುಗಿಸಲಿದೆ.

ಭಾರತೀಯ ರಿಸರ್ವ್​ ಬ್ಯಾಂಕ್​ ಮಾರ್ಗದರ್ಶಿ ಸೂತ್ರಗಳ ಪ್ರಕಾರ, ಈ ರೀತಿಯ ತೊಂದರೆಯಿಂದ ಹಣ ಪಡೆಯಲು ಸಾಧ್ಯವಾಗದಿದ್ದರೆ, ಬ್ಯಾಂಕ್ ಖಾತೆದಾರರಿಗೆ  1 ವಾರದೊಳಗೆ ಹಣ ಮರು ಪಾವತಿಸಬೇಕಾಗುತ್ತದೆ. ಒಂದು ವಾರದಲ್ಲಿ ಹಣ ಹಿಂತಿರುಗಿಸದಿದ್ದರೆ  ಬ್ಯಾಂಕ್ ದೂರುದಾರನಿಗೆ ಪ್ರತಿದಿನಕ್ಕೆ 100 ರೂ. ದಂಡದೊಂದಿಗೆ ಸಂಪೂರ್ಣ ದುಡ್ಡು ಪಾವತಿಸಬೇಕು ಎಂದು ತಿಳಿಸಿದೆ.

ಬ್ಯಾಂಕುಗಳು ತಮ್ಮದೇ ಎಟಿಎಂನಿಂದ ಇಂತಹ ತೊಂದರೆ ಉಂಟಾದರೆ ಖಾತೆದಾರರಿಗೆ  24 ಗಂಟೆಯೊಳಗೆ ಹಣವನ್ನು ಹಿಂತಿರುಗಿಸುತ್ತದೆ. ಆದರೆ ಬೇರೊಂದು ಬ್ಯಾಂಕಿನ ಎಟಿಎಂ ಯಂತ್ರದಿಂದ ಹಣ ಪಡೆಯಲಾಗದೇ, ನಿಮ್ಮ ಅಕೌಂಟ್​ನಿಂದ ಹಣ ಕಡಿತವಾಗಿದ್ದರೆ ತೊಂದರೆ ಅನುಭವಿಸಬಹುದು. ಏಕೆಂದರೆ ಇಲ್ಲಿ ಎಟಿಎಂ ಬೇರೆಯಾಗಿರುವುದರಿಂದ ಕೆಲ ಬ್ಯಾಂಕುಗಳು ಮರು ಪಾವತಿ ನಿರಾಕರಿಸಬಹುದು.

ಇದೇ ವೇಳೆ ಬ್ಯಾಂಕುಗಳು ಎಟಿಎಂ ಸಿಸಿ ಟಿವಿ ಕ್ಯಾಮೆರಾದಲ್ಲಿ ಪರಿಶೀಲನೆ ನಡೆಸುತ್ತದೆ. ಇದರಲ್ಲಿ ಹಣ ಸ್ವೀಕಾರವಾಗಿಲ್ಲ ಎಂದು ದೃಢಪಟ್ಟರೆ ಯಾವುದೇ ಬ್ಯಾಂಕು ಆಗಿದ್ದರೂ ನಿಮ್ಮ ದುಡ್ಡನ್ನು ಹಿಂತಿರುಗಿಸಬಹುದು.

ಎಟಿಎಂನಿಂದ ಇಂತಹ ಸಮಸ್ಯೆಯಾದರೆ ಮೊದಲು ನೀವು ನಿಮ್ಮ ಖಾತೆಯ ಬ್ಯಾಂಕ್​ ಶಾಖೆಯನ್ನು ಸಂಪರ್ಕಿಸಿ. ಬ್ಯಾಂಕಿಗೆ ರಜೆಯಿದ್ದರೆ ಅಥವಾ ಬ್ಯಾಂಕ್​ ಬಂದ್​ ಆಗಿದ್ದರೆ ಕಸ್ಟಮರ್​ ಕೇರ್​ಗೆ ಕರೆ ಮಾಡಿ ದೂರು ನೀಡಿ. ಇದರಿಂದ ಹಣವನ್ನು ಶೀಘ್ರದಲ್ಲೇ ಮರಳಿ ಪಡೆಯಬಹುದು.