'ಹ್ಯಾಪಿ ಬರ್ತ್​ ಡೇ ಬಾಸ್': ಭೂಗತ ಪಾತಕಿ ದಾವೂದ್​ ಇಬ್ರಾಹಿಂಗೆ ಓಪನ್ ವಿಶಸ್ ತಿಳಿಸಿದ ಭೂಪ..!

ಭೂಗತ ಜಗತ್ತಿನ ಅನಾಭಿಷಕ್ತ ದೊರೆ ಕುಖ್ಯಾತ ಪಾತಕಿ ದಾವೂದ್ ಇಬ್ರಾಹಿಂಗೆ ವಿಶಸ್ ತಿಳಿಸಿ ಸೋಷಿಯಲ್ ಮೀಡಿಯಾದಲ್ಲಿ ಪೋಸ್ಟ್​ ಮಾಡಲು ಯಾರಾದರೂ ಧೈರ್ಯ ತೋರುವರೇ? ಅಂತಹದೊಂದು ಘಟನೆ ಗುರುವಾರ ನಡೆದಿದೆ.

ಫೇಸ್‌ಬುಕ್‌ನಲ್ಲಿ ಶೇರಾ ಚಿಕ್ನಾ ಎಂಬ ಬಳಕೆದಾರ ದಾವೂದ್ ಅವರ ಫೋಟೊ ಮತ್ತು ಕೇಕ್ ಚಿತ್ರವನ್ನು ಅಪ್​ಲೋಡ್ ಮಾಡಿ ಹುಟ್ಟುಹಬ್ಬದ ಶುಭಾಶಯ ತಿಳಿಸಿದ್ದಾರೆ. ಅದು ಕೂಡ ಜನ್ಮದಿನದ ಶುಭಾಶಯಗಳು ಬಾಸ್ ಎಂಬ ಟ್ಯಾಗ್​ಲೈನ್​ನೊಂದಿಗೆ.

ಶೇರ್ ಚಿಕ್ನಾ ಹೆಸರಿನ ಅಕೌಂಟ್​ ಮೂಲಕ ಮಾಡಲಾದ ವಿವಾದಾತ್ಮಕ ಪೋಸ್ಟ್​ ವೈರಲ್ ಆಗುತ್ತಿದ್ದಂತೆ ಅನೇಕರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಅಲ್ಲದೆ ಪೋಸ್ಟ್​ ಲಿಂಕ್​ನ್ನು ಪೊಲೀಸರಿಗೆ ಟ್ಯಾಗ್ ಮಾಡಿ ಕಠಿಣ ಕ್ರಮ ಕೈಗೊಳ್ಳುವಂತೆ ಆಗ್ರಹಿಸಿದ್ದಾರೆ. ಈ ವಿಷಯ ಪೊಲೀಸರಿಗೆ ಮುಟ್ಟುತ್ತಿದ್ದಂತೆ ಪೋಸ್ಟ್​ನ್ನು ಅಳಿಸಿ ಹಾಕಲಾಗಿದೆ.

ಈ ಬಗ್ಗೆ ಮಾತನಾಡಿರುವ ಮುಂಬೈನ ಡೋಂಗ್ರಿ ಠಾಣೆಯ ಹಿರಿಯ ಇನ್ಸ್‌ಪೆಕ್ಟರ್ ಸಂದೀಪ್ ಬಾಗ್ದಿಕರ್, 'ನಾವು ಸಾಮಾಜಿಕ ಮಾಧ್ಯಮದಲ್ಲಿ ಅಪ್‌ಲೋಡ್ ಮಾಡಿದ ಪೋಸ್ಟ್‌ ಬಗ್ಗೆ ತನಿಖೆ ನಡೆಸುತ್ತಿದ್ದೇವೆ. ಇದೊಂದು ಪ್ರೈವೇಟ್ ಪಾರ್ಟಿಯಲ್ಲಿ ತೆಗೆದ ಚಿತ್ರ ಎಂಬುದು ತಿಳಿದು ಬಂದಿದೆ. ಇದು ಎಲ್ಲಿ ನಡೆದಿರುವುದು ಎಂಬುದನ್ನು ಪರಿಶೀಲಿಸಿ ಸಂಬಂಧಪಟ್ಟವರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಲಿದ್ದೇವೆ ಎಂದು ತಿಳಿಸಿದ್ದಾರೆ.

ಮೋಸ್ಟ್ ವಾಂಟೆಡ್ ಕ್ರಿಮಿನಲ್ ದಾವೂದ್ ಇಬ್ರಾಹಿಂ ಡಿಸೆಂಬರ್  26 ರಂದು 64ನೇ ವರ್ಷಕ್ಕೆ ಕಾಲಿಟ್ಟಿದ್ದರು. ಇದರ ನಿಮಿತ್ತ ಮಾಡಲಾದ ಪಾರ್ಟಿಯ ಫೋಟೋಗಳು ಮುಂಬೈನಿಂದಲೇ ಅಪ್​ಲೋಡ್ ಮಾಡಿರುವುದು ತಿಳಿದು ಬಂದಿದೆ. ಈ ಫೋಟೋಗಳು ಇದೀಗ ವಾಟ್ಸ್​ಆ್ಯಪ್, ಫೇಸ್​ಬುಕ್​ನಲ್ಲಿ ಹರಿದಾಡುತ್ತಿದೆ.

80ರಲ್ಲಿ ದಾವೂದ್ ಎಂಬ ಪುಡಿ ರೌಡಿಯಾಗಿದ್ದ ದಾವೂದ್ ಆ ಬಳಿಕ ಮಾದಕ ದ್ರವ್ಯ ಮತ್ತು ಶಸ್ತ್ರಾಸ್ತ್ರ ಕಳ್ಳಸಾಗಣೆ, ನಕಲಿ ಭಾರತೀಯ ಕರೆನ್ಸಿ ನೋಟುಗಳ ಕಳ್ಳಸಾಗಣೆ ಮೂಲಕ ಸಂಪೂರ್ಣ ಮುಂಬೈ ಅಂಡರ್​ವರ್ಲ್ಡ್​ನ್ನು ತನ್ನ ತೆಕ್ಕೆಗೆ ತೆಗೆದುಕೊಂಡಿದ್ದನು. 1993ರ ಮುಂಬೈ ಸರಣಿ ಸ್ಫೋಟಗಳ ಮಾಸ್ಟರ್ ಮೈಂಡ್ ಆಗಿದ್ದ ದಾವೂದ್ ಆ ಬಳಿಕ ಭಾರತವನ್ನು ತೊರೆದಿದ್ದನು.

ಸದ್ಯ ದಾವೂದ್ ಪಾಕಿಸ್ತಾನದಲ್ಲಿ ಅವಿತುಕೊಂಡಿದ್ದಾನೆ ಎಂದು ಹೇಳಲಾಗುತ್ತಿದೆ. ಅಲ್ಲಿಂದಲೇ ಈಗಲೂ ಮುಂಬೈ ಸೇರಿದಂತೆ ಮಹಾನಗರಿಗಳ ವ್ಯವಹಾರಗಳನ್ನು ನಿಯಂತ್ರಿಸುತ್ತಿದ್ದಾನೆ ಎಂದು ಎನ್ನಲಾಗುತ್ತಿದೆ.