Tirumala: ಮೇ-ಜೂನ್​​ ತಿಂಗಳಲ್ಲಿ ತಿರುಪತಿಗೆ ಹೋಗಬೇಕು ಎಂದುಕೊಂಡಿರುವ ಭಕ್ತರಿಗೆ TTDಯಿಂದ ಶುಭ ಸುದ್ದಿ!

ತಿರುಮಲ ಶ್ರೀ ವೆಂಕಟೇಶ್ವರ ಸ್ವಾಮಿ ದರ್ಶನಕ್ಕೆ ಪ್ರತಿ ದಿನ ಸಾವಿರಾರು ಭಕ್ತರು ಆಗಮಿಸುತ್ತಾರೆ. ಯಾವುದೇ ಟಿಕೆಟ್​ ತೆಗೆದುಕೊಳ್ಳದೆ ದೇವರ ದರ್ಶನಕ್ಕೆ ಹೋದರೆ ಗಂಟೆ ಗಂಟೆ ಕಾಲ ಕಾಯಬೇಕಾಗುತ್ತದೆ. (ಸಾಂದರ್ಭಿಕ ಚಿತ್ರ)

ಟೈಮ್​ ಸ್ಲಾಟ್​ ಟಿಕೆಟ್​​, ದಿವ್ಯಾ ದರ್ಶನ ಟಿಕೆಟ್​​ ತೆಗೆದುಕೊಂಡು ಬಂದರು ದೇವರ ದರ್ಶನಕ್ಕೆ ಹೆಚ್ಚಿನ ಸಮಯ ಬೇಕಾಗುತ್ತದೆ. ಆದ್ದರಿಂದ ಹಲವು ಭಕ್ತರು ದೇವರ ದರ್ಶನ ಪಡೆಯಲು 300 ರೂಪಾಯಿಯ ಟಿಕೆಟ್​ ಪಡೆದುಕೊಳ್ಳುತ್ತಾರೆ.

ಸಾಮಾನ್ಯವಾಗಿ ಒಂದು ತಿಂಗಳಿಗೆ ಸಂಬಂಧಿಸಿದ 300 ರೂಪಾಯಿ ಟಿಕೆಟ್​ಗಳನ್ನು ಒಂದು ವಾರದ ಮುನ್ನ ಆನ್​ಲೈನ್​ನಲ್ಲಿ ಬಿಡುಗಡೆ ಮಾಡುತ್ತಾರೆ. ಮೇ ತಿಂಗಳ ಟಿಕೆಟ್​​ಗಳನ್ನು ಕೂಡ ಏಪ್ರಿಲ್ ತಿಂಗಳ ಕೊನೆಯ ವಾರದಲ್ಲಿ ಬಿಡುಗಡೆ ಮಾಡುತ್ತಿದ್ದಾರೆ. ಆದರೆ ಈ ಬಾರಿ ಮೇ ತಿಂಗಳು ಮಾತ್ರವಲ್ಲದೇ ಜೂನ್​ ತಿಂಗಳ ಟಿಕೆಟ್​ಗಳನ್ನು ಕೂಡ ಒಟ್ಟಿಗೆ ಬಿಡುಗಡೆ ಮಾಡುತ್ತಿದ್ದಾರೆ.

ಮೇ-ಜೂನ್​​ ತಿಂಗಳಿಗೆ ಸಂಬಂಧಿಸಿದ 300 ರೂಪಾಯಿ ಪ್ರತ್ಯೇಕ ದರ್ಶನ ಟಿಕೆಟ್​​ಗಳನ್ನು ಏಪ್ರಿಲ್​ 25ರ ಬೆಳಗ್ಗೆ 10 ಗಂಟೆಗೆ ಆನ್​ಲೈನ್​​ನಲ್ಲಿ ಬಿಡುಗಡೆ ಮಾಡುತ್ತಾರೆ. tirupatibalaji.ap.gov.in ವೆಬ್​​ಸೈಟ್​ ಅಥವಾ tt devasthanams ಆ್ಯಪ್​ನಲ್ಲಿ ನಿಮ್ಮ ವಿವರಗಳನ್ನು ನಮೂದಿಸಿ ಟಿಕೆಟ್​ ಬುಕ್​ ಮಾಡಿಕೊಳ್ಳಬಹುದು.

ಇನ್ನು, ದೇವರ ದರ್ಶನಕ್ಕೆ ಆಗಮಿಸುವ ಭಕ್ತರು ಉಳಿದುಕೊಳ್ಳಲು ಟಿಟಿಡಿಗೆ ಸಂಬಂಧಿಸಿದ ಬಾಡಿಗೆ ರೂಮ್​​​ಗಳು ತಿರುಪತಿ ಮತ್ತು ತಿರುಮಲದಲ್ಲಿ ಲಭ್ಯವಿದ್ದು, ಕಡಿಮೆ ದರಕ್ಕೆ ರೂಮ್​​ಗಳು ಭಕ್ತರಿಗೆ ಸಿಗುತ್ತೆ. ಉತ್ತಮ ಸೌಲಭ್ಯಗಳು ಹೊಂದಿರುವ ಕಾರಣ ಭಕ್ತರು ಕೂಡ ರೂಮ್​​ಗಳನ್ನು ಮೊದಲೇ ಬುಕ್​ ಮಾಡಿಕೊಳ್ಳುತ್ತಾರೆ. ರೂಮ್​ಗಳನ್ನು ಆನ್​​ಲೈನ್​ನಲ್ಲಿ ಬುಕ್​ ಮಾಡಿಕೊಳ್ಳಲ ಅವಕಾಶವಿದ್ದು, 300 ರೂಪಾಯಿ ಟಿಕೆಟ್​ ಬಿಡುಗಡೆ ಮಾಡಿದ ಮರುದಿನ ರೂಮ್​​ಗಳ ಬುಕಿಂಗ್​ ಆರಂಭವಾಗುತ್ತದೆ.

ಮೇ ಮತ್ತು ಜೂನ್​ ತಿಂಗಳಿಗೆ ಸಂಬಂಧಿಸಿದ ತಿರುಮಲ ವಸತಿ ಕೋಟಾವನ್ನು ಏಪ್ರಿಲ್​ 26ರ ಬೆಳಗ್ಗೆ 10 ಗಂಟೆಗೆ ಆನ್​ಲೈನ್​​ನಲ್ಲಿ ಬಿಡುಗಡೆ ಮಾಡಲಿದ್ದಾರೆ. ಇದನ್ನು ನಾವು ತಿರುಪತಿ ಅಧಿಕೃತ ವೆಬ್​ಸೈಟ್​​, ಆ್ಯಪ್​​ನಲ್ಲಿ ಬುಕ್​​ ಮಾಡಬಹುದಾಗಿದೆ. ಇವುಗಳಿಗೆ ಭಕ್ತರಿಂದ ಸದಾ ಡಿಮ್ಯಾಂಡ್​ ಹೆಚ್ಚಿರುತ್ತದೆ. ಆದ್ದರಿಂದ ಬೇಗ ಬುಕ್​ ಮಾಡಿಕೊಂದರೆ ವಸತಿ ರೂಮ್​ಗಳು ಸುಲಭವಾಗಿ ಪಡೆದುಕೊಳ್ಳಬಹುದು.

ಉಳಿದಂತೆ ಶ್ರೀ ವೆಂಕಟೇಶ್ವರ ಸ್ವಾಮಿಯ ವಿಶೇಷ ಸೇವೆಗೆ ಸಂಬಂಧಿಸಿದ ಟಿಕೆಟ್​​ಗಳನ್ನು ಏಪ್ರಿಲ್​ 24ರ ಬೆಳಗ್ಗೆ 10 ಗಂಟೆಗೆ ಬಿಡುಗಡೆ ಮಾಡಲಾಗುತ್ತದೆ. ಮೇ ಮತ್ತು ಜೂನ್​ ತಿಂಗಳಿಗೆ ಸಂಬಂಧಿಸಿದ ಕಲ್ಯಾಣೋತ್ಸವ, ಉಂಜಲ್ ಸೇವೆ, ಆರ್ಜಿತ ಬ್ರಹ್ಮೋತ್ಸವ, ಸಹಸ್ರ ದೀಪಾಲಂಕರಣ ಸೇವೆಗೆ ಸಂಬಂಧಿಸಿದ ಟಿಕೆಟ್​ಗಳು ಆನ್​​ಲೈನ್​​ನಲ್ಲಿ ಲಭ್ಯವಿರುತ್ತವೆ.