Most Beautiful Woman: 'ವಿಶ್ವದ ಅತ್ಯಂತ ಸುಂದರ ಮಹಿಳೆ' ನಿಧನ, ಕಾಂಟ್ರವರ್ಸಿಯಲ್ಲೇ ಸದ್ದು ಮಾಡುತ್ತಿದ್ದ ಸುಂದರಿ ಸತ್ತಿದ್ದು ಹೇಗೆ?

ವಿಶ್ವದ ಅತ್ಯಂತ ಸುಂದರ ಮಹಿಳೆ ಎಂದೇ ಖ್ಯಾತಿ ಪಡೆದಿದ್ದ ಇಟಾಲಿಯನ್ ನಟಿ ಗಿನಾ ಲೊಲೊಬ್ರಿಗಿಡಾ (95) ಸೋಮವಾರ ನಿಧನರಾದರು. ವಯೋ ಸಹಜ ಅನಾರೋಗ್ಯದಿಂದ ಬಳಲುತ್ತಿದ್ದ ಗಿನಾ ಲೊಲೊಬ್ರಿಗಿಡಾ ಸೋಮವಾರ ರೋಮ್ನಲ್ಲಿ ಕೊನೆಯುಸಿರೆಳೆದಿದ್ದಾರೆ.

ಆಕೆಯ ಮರಣವನ್ನು ಟಸ್ಕನಿಯ ಗವರ್ನರ್ ಯುಜೆನಿಯೊ ಗಿಯಾನಿ ಅಧಿಕೃತವಾಗಿ ಘೋಷಿಸಿಸಿದ್ದಾರೆ. ಇದರಿಂದಾಗಿ ಆಕೆಯ ಸಾವಿಗೆ ಹಲವು ಗಣ್ಯರು ಸಂತಾಪ ಸೂಚಿಸಿದ್ದಾರೆ. ಜಿನಾ ಅವರ ಅಂತ್ಯಕ್ರಿಯೆ ಗುರುವಾರ ಚರ್ಚ್ನಲ್ಲಿ ನಡೆಯಲಿದೆ.

ಜಿನಾ ಲೊಲೊಬ್ರಿಗಿಡಾ 1927ರ ಜುಲೈ 4ರಂದು ಇಟಲಿಯ ಸುಬಿಯಾಕೊ ನಗರದಲ್ಲಿ ಜನಿಸಿದರು ಮತ್ತು ಚಿಕ್ಕ ವಯಸ್ಸಿನಲ್ಲೇ ಇಟಾಲಿಯನ್ ಸಿನಿಮಾಗಳಲ್ಲಿ ನಟಿಸುವ ಮೂಲಕ ಜನಪ್ರಿಯರಾದರು. ಅದಾದ ನಂತರ ಹಲವು ಹಾಲಿವುಡ್ ಸಿನಿಮಾಗಳಲ್ಲಿ ಸ್ಟಾರ್ ಹೀರೋಗಳ ಜೊತೆ ನಟಿಸಿ ಬೇಗ ಸ್ಟಾರ್ ಹೀರೋಯಿನ್ ಪಟ್ಟ ಗಿಟ್ಟಿಸಿಕೊಂಡರು.

1950 ಮತ್ತು 60 ರ ದಶಕಗಳಲ್ಲಿ ಯುರೋಪಿಯನ್ ಚಿತ್ರರಂಗದ ದೊಡ್ಡ ತಾರೆಗಳಲ್ಲಿ ಜಿನಾ ಲೊಲೊಬ್ರಿಗಿಡಾ ಕೂಡ ಒಬ್ಬರಾಗಿದ್ದರು. ಅಲ್ಲದೆ, ಎಲ್ಲರೂ ಜಿನಾ ಲೊಲೊಬ್ರಿಗಿಡಾ ಅವರನ್ನು ವಿಶ್ವದ ಅತ್ಯಂತ ಸುಂದರ ಮಹಿಳೆ ಎಂದು ಕರೆಯಲಾರಂಭಿಸಿದರು. ಗಿನಾ ಲೊಲೊಬ್ರಿಗಿಡಾ ಕೂಡ ಅಮೆರಿಕನ್ ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಅವರು ತಮ್ಮ ಚಲನಚಿತ್ರ ವೃತ್ತಿಜೀವನದಲ್ಲಿ ಸುಮಾರು 33 ಅಂತರರಾಷ್ಟ್ರೀಯ ಪ್ರಶಸ್ತಿಗಳನ್ನು ಗೆದ್ದಿದ್ದಾರೆ.

ಅದರಲ್ಲೂ ಗಿನಾ ನಟಿಸಿದ ಕ್ರಾಸ್ಡ್ ಸ್ವೋರ್ಡ್ಸ್, ದಿ ಹಂಚ್ ಬ್ಯಾಕ್ ಆಫ್ ನೊಟ್ರೆ ಡೇಮ್, ಬ್ಯೂಟಿಫುಲ್ ಬಟ್ ಡೇಂಜರಸ್ ಮುಂತಾದ ಸಿನಿಮಾಗಳ ಮೂಲಕ ಪ್ರಪಂಚದಾದ್ಯಂತ ಅಭಿಮಾನಿಗಳನ್ನು ಗಳಿಸಿದರು.

ಗಿನಾ ಲೊಲೊಬ್ರಿಗಿಡಾ 20 ನೇ ವಯಸ್ಸಿನಲ್ಲಿ ಸ್ಲೊವೇನಿಯನ್ ವೈದ್ಯರನ್ನು ವಿವಾಹವಾದರು. ಆದರೆ ಗಂಡು ಮಗು ಜನಿಸಿದ ನಂತರ ಪತಿಯಿಂದ ಬೇರ್ಪಟ್ಟರು. ನಂತರ ರಾಜಕೀಯ ಪ್ರವೇಶಿಸಿ ಸೋತರು.

2006ರಲ್ಲಿ, 79 ನೇ ವಯಸ್ಸಿನಲ್ಲಿ, ಅವರು ತನಗಿಂತ 34 ವರ್ಷ ಕಿರಿಯ ಸ್ಪ್ಯಾನಿಷ್ ಮೂಲದವರನ್ನು ಮದುವೆಯಾಗುವುದಾಗಿ ಘೋಷಿಸಿದರು. ಆದರೆ ಒಂದು ವರ್ಷದ ನಂತರ ಇಬ್ಬರೂ ಬೇರ್ಪಟ್ಟರು. ಬಳಿಕ ಹಲವು ವಿವಾದಗಳಲ್ಲಿ ಸಿಲುಕಿ ಸಾರ್ವಜನಿಕ ಜೀವನದಿಂದ ದೂರ ಉಳಿದಿದ್ದರು. ಗಿನಾ ಲೊಲೊಬ್ರಿಗಿಡಾ 2018 ರಲ್ಲಿ ವಾಕ್ ಆಫ್ ಫೇಮ್ ಸ್ಟಾರ್ ಪ್ರಶಸ್ತಿಯನ್ನು ಪಡೆದಿದ್ದರು.