Temple: ಈ ಊರಿನಲ್ಲಿದೆ ನಾಯಿಯ ದೇವಾಲಯ, ಹೊಸದಾಗಿ ಮದ್ವೆ ಆದವರೂ 'ಮಹಾರಾಣಿ' ಆಶೀರ್ವಾದ ಪಡೆಯಲೇಬೇಕಂತೆ!

ಉತ್ತರ ಪ್ರದೇಶದ ಝಾನ್ಸಿ ಜಿಲ್ಲೆಯಲ್ಲಿ ವಿಶೇಷ ಬೇಡಿಕೆ ಹುಟ್ಟಿಕೊಂಡಿದೆ. ಝಾನ್ಸಿಯ ಮೌರಾನಿಪುರ ಪ್ರದೇಶದಲ್ಲಿ ಜೈ ಕುಟಿಯಾ ಮಹಾರಾಣಿ ತಾಯಿಯ ದೊಡ್ಡ ದೇವಾಲಯವನ್ನು ನಿರ್ಮಿಸಲು ಜನರು ಒತ್ತಾಯಿಸುತ್ತಿದ್ದಾರೆ.

ಈ ದೇವಾಲಯವು ನಂಬಿಕೆಯ ಕೇಂದ್ರವಾಗಿದೆ ಎಂದು ಜನರು ನಂಬುತ್ತಾರೆ. ಆದ್ದರಿಂದ ಈ ದೇವಾಲಯವನ್ನು ಭವ್ಯವಾದ ರೂಪ ನೀಡುವ ಮೂಲಕ ಇತರ ಪ್ರದೇಶಗಳ ಜನರು ಸಹ ಇಲ್ಲಿಗೆ ಬಂದು ಮಹಾರಾಣಿಯ ಆಶೀರ್ವಾದ ಪಡೆಯುವಂತೆ ಮಾಡಬೇಕೆಂದು ಸ್ಥಳೀಯರ ಒತ್ತಾಯವಾಗಿದೆ.

ಈ ದೇವಾಲಯವು ಬಹಳ ಪುರಾತನವಾದದ್ದು, ಐದು ವರ್ಷಗಳ ಹಿಂದೆ ಗ್ರಾಮಸ್ಥರು ದೇಣಿಗೆ ಸಂಗ್ರಹಿಸಿ ದೇವಾಲಯದ ಸುತ್ತಲೂ ವೇದಿಕೆಯನ್ನು ನಿರ್ಮಿಸಿಕೊಂಡಿದ್ದಾರೆ. ಈಗ ಈ ದೇವಸ್ಥಾನವನ್ನು ಅದ್ಧೂರಿಯಾಗಿ ನಿರ್ಮಾಣ ಮಾಡುವ ಅಗತ್ಯವಿದೆ. ಆಡಳಿತ ವರ್ಗ ದೇವಾಲಯ ನಿರ್ಮಾಣಕ್ಕೆ ಒಪ್ಪಿಗೆ ನೀಡಿದರೆ ಗ್ರಾಮಸ್ಥರೂ ಸಹಕರಿಸುತ್ತೇವೆಂದು ತಿಳಿಸಿದ್ದಾರೆ.

ಮೌರಾನಿಪುರದಲ್ಲಿ ನಿರ್ಮಿಸಲಾದ ಕುಟಿಯಾ ಮಹಾರಾಣಿ ದೇವಾಲಯವು ಬಹಳ ಪುರಾತನವಾಗಿದೆ. ರೇವನ್ ಮತ್ತು ಕಾಕ್ವಾರ ಗ್ರಾಮಗಳ ಗಡಿಯಲ್ಲಿ ನಾಯಿಯೊಂದು ವಾಸವಾಗಿತ್ತು ಎನ್ನಲಾಗಿದೆ. ಒಮ್ಮೆ ಎರಡು ಹಳ್ಳಿಗಳಲ್ಲಿ ಭೋಜನಕೂಟ ನಡೆಯುತ್ತಿತ್ತು. ಆದರೆ ಎರಡು ಹಳ್ಳಿಗಳಲ್ಲಿ ನಾಯಿಗೆ ಆಹಾರ ಸಿಗಲಿಲ್ಲ. ಹಾಗಾಗಿ ಅದು ಹಸಿವಿನಿಂದ ಸತ್ತಿತು. ಇದರಿಂದ ಗ್ರಾಮಸ್ಥರು ತೀವ್ರ ದುಃಖಕ್ಕೆ ಒಳಗಾಗಿದ್ದರು.

ನಾಯಿಯ ಸಾವನ್ನು ಕಂಡು ಎರಡೂ ಗ್ರಾಮಗಳ ಜನರು ತೀವ್ರ  ನೋವನ್ನು ವ್ಯಕ್ತಪಡಿಸಿ, ಬಳಿಕ ಎರಡು ಗ್ರಾಮಗಳ ಗಡಿಯಲ್ಲಿ ನಾಯಿಯನ್ನು ಸಮಾಧಿ ಮಾಡಲಾಯಿತು. ಸಮಾದಿ ಮಾಡಿದ ಜಾಗದಲ್ಲೇ ಈಗ ಈ ದೇವಾಲಯ ಇದೆ.

ಹಾಗಾಗಿ ಆ ನಾಯಿಯ ನೆನಪಿಗಾಗಿ ಗ್ರಾಮದ ಜನರು ಕುಟಿಯಾ ಮಹಾರಾಣಿ ದೇವಸ್ಥಾನವನ್ನು ನಿರ್ಮಿಸಿದರು. ಅದರ ನಂತರ, ಗ್ರಾಮದಲ್ಲಿ ಯಾವುದೇ ವಿಶೇಷ ಸಮಾರಂಭ ನಡೆದರೂ ಅಂದು ತಯಾರಿಸುವ ಆಹಾರದ ಒಂದು ಭಾಗವನ್ನು ಮಹಾರಾಣಿಗೆ ತೆಗೆದಿಡುವ ಸಂಪ್ರದಾಯ  ಪ್ರಾರಂಭವಾಯಿತು.

ಇದಲ್ಲದೆ, ಎರಡು ಗ್ರಾಮಗಳಿಗೆ ಹೊಸ ಸೊಸೆ ಬಂದಾಗ, ಮಹಾರಾಣಿ ಅಮ್ಮನವರ ದೇವಸ್ಥಾನಕ್ಕೆ ಕರೆದುಕೊಂಡು ಬಂದು ತೆಂಗಿನಕಾಯಿ ಹೊಡೆದು ಪೂಜೆ ಮಾಡಿಸಿ, ಆಶೀರ್ವಾದ ಪಡೆಯುವುದು ರೂಢಿಯಲ್ಲಿದೆ. ಇಲ್ಲಿ ಪೂಜೆ ಸಲ್ಲಿಸಿದ ನಂತರವಷ್ಟೇ ಅತ್ತೆ ಮನೆಗೆ ಹೋಗುತ್ತಾರೆ ಎಂದು ತಿಳಿದುಬಂದಿದೆ.