Viral News: ವಿಮಾನದಲ್ಲಿ ಪುರುಷ ಸಿಬ್ಬಂದಿಗೆ ಬಲವಂತವಾಗಿ ಚುಂಬಿಸಿದ ಕುಡುಕ ಪ್ರಯಾಣಿಕ!

ಲಾಸ್ ಏಂಜಲೀಸ್‌ನಿಂದ ನ್ಯಾಶ್‌ವಿಲ್ಲೆಗೆ ಹೊರಟಿದ್ದ ಡೆಲ್ಟಾ ಏರ್‌ಲೈನ್ಸ್ ವಿಮಾನದಲ್ಲಿ ಕುಡುಕ ಪ್ರಯಾಣಿಕನೊಬ್ಬ ಪುರುಷ ಸಿಬ್ಬಂದಿಗೆ ಬಲವಂತವಾಗಿ ಚುಂಬಿಸಿದ ಘಟನೆ ವರದಿಯಾಗಿದೆ.

ವಿಮಾನದಲ್ಲಿ ಪ್ರಯಾಣಿಸುತ್ತಿದ್ದ ಡೇವಿಡ್ ಅಲನ್ ಬರ್ಕ್ ಎಂಬ 61 ವರ್ಷದ ಪ್ರಯಾಣಿಕ ಪುರುಷ ಸಿಬ್ಬಂದಿಯೊಂದಿಗೆ ಕೆಟ್ಟದಾಗಿ ವರ್ತಿಸಿದ್ದು, ಪ್ರಯಾಣದ ವೇಳೆ ಮದ್ಯಪಾನ ಮಾಡಿ ಕ್ಯಾಬಿನ್ ಸಿಬ್ಬಂದಿಯೊಬ್ಬರಿಗೆ ಬಲವಾಂತವಾಗಿ ಚುಂಬಿಸಿದ್ದಾನೆ.

ಏಪ್ರಿಲ್ 10 ರಂದು ಈ ಘಟನೆ ನಡೆದಿದ್ದು, ಆತ ವಿಮಾನದಲ್ಲಿ ಗಲಾಟೆಯೂ ಮಾಡಿದ್ದರಿಂದ ಡೆಲ್ಟಾ ಏರ್‌ಲೈನ್ಸ್ ವಿಮಾನ ನ್ಯೂ ಮೆಕ್ಸಿಕೋದ ಅಲ್ಬುಕರ್ಕ್‌ನಲ್ಲಿ ತುರ್ತು ಭೂಸ್ಪರ್ಶ ಮಾಡಿದೆ.

ಆರೋಪಿ ಡೇವಿಡ್ ಅಲನ್ ಬರ್ಕ್ ಪ್ರಥಮ ದರ್ಜೆಯ ಪ್ರಯಾಣಿಕನಾಗಿದ್ದರಿಂದ ಪ್ರಯಾಣದ ವೇಳೆ ಮದ್ಯ ಸೇವಿಸಲು ಅನುಮತಿ ನೀಡಲಾಗಿತ್ತು. ಆದರೆ, ವಿಪರೀತ ಕುಡಿಡಿದ್ದರಿಂದ ಆತನಿಗೆ ಮದ್ಯ ನೀಡಿಲ್ಲ. ಇದರಿಂದ ಕುಪಿತಗೊಂಡ ಆತ ವಿಮಾನ ಸಿಬ್ಬಂದಿಯೊಂದಿಗೆ ಅನುಚಿತವಾಗಿ ವರ್ತಿಸಿದ್ದಾನೆ ಎಂದು ತಿಳಿದು ಬಂದಿದೆ.

ಚುಂಬನಕ್ಕೂ ಮುನ್ನ ಪುರುಷ ಸಿಬ್ಬಂದಿಯನ್ನು ಹೊಗಳಿದ ಆರೋಪಿ ‘ನೀನು ಬಹಳ ಸುಂದರವಾಗಿ ಇದ್ದೀಯಾ’ ಎಂದು ಹೇಳಿ ತನ್ನತ್ತ ಎಳೆದುಕೊಂಡು ಕುತ್ತಿಗೆಗೆ ಕಿಸ್ ನೀಡಿದ್ದಾನೆ. ವಿಮಾನದ ಸಿಬ್ಬಂದಿ ವಿರೋಧಿಸಿದಾಗ ನಿಂದಿಸಲು ಶುರು ಮಾಡಿದ್ದಾನೆ ಎಂದು ಹೇಳಲಾಗಿದೆ.

ಪ್ರಯಾಣಿಕ ಬರ್ಕ್‌ ವರ್ತನೆಯನ್ನು ಕಂಡು ಗಾಬರಿಯಾದ ವಿಮಾನ ಸಿಬ್ಬಂದಿ ಡೆಲ್ಟಾ ಏರ್ಲೈನ್ಸ್ ವಿಮಾನದ ಕ್ಯಾಬಿನ್ ಹಿಂಭಾಗದಲ್ಲಿ ಅವಿತುಕೊಂಡಿದ್ದಾರೆ. ಈ ವೇಳೆ ಆರೋಪಿ ಅಲ್ಲಿದ್ದ ಆಹಾರವನ್ನು ಎಸೆದು ರಂಪಾಟ ಮಾಡಿದ್ದಲ್ಲದೇ ಕೆಲವೊಂದು ವಸ್ತುಗಳಿಗೆ ಹಾನಿ ಮಾಡಿದ್ದಾನೆ ಎಂದು ತಿಳಿದು ಬಂದಿದೆ.

ಘಟನೆ ಸಂಬಂಧ ಆರೋಪಿಯ ವಿರುದ್ಧ ಪ್ರಕರಣ ದಾಖಲಾಗಿದ್ದು, ಏಪ್ರಿಲ್ 27 ರಂದು ಹಲ್ಲೆ ಮತ್ತು ಕ್ರಿಮಿನಲ್ ಕಿಡಿಗೇಡಿತನದ ಆರೋಪದ ಮೇಲೆ ನ್ಯಾಯಾಲಯಕ್ಕೆ ಹಾಜರಾಗುವಂತೆ ಅಧಿಕಾರಿಗಳು ತಿಳಿಸಿದ್ದಾರೆ.