Fraud: ಗ್ರಾಹಕರಿಗೆ ನೀಡಬೇಕಿದ್ದ 10 ಐಫೋನ್‌ಗಳನ್ನು ಕದ್ದು ಡಮ್ಮಿ ಪೀಸ್ ಇಟ್ಟ ಡೆಲಿವರಿ ಎಕ್ಸಿಕ್ಯೂಟಿವ್! ಆಮೇಲೇನಾಯ್ತು?

ಹರ್ಯಾಣ ರಾಜ್ಯದ ಗುರುಗ್ರಾಮ್‌ ನಗರದಲ್ಲಿ ಈ ಕೃತ್ಯ ನಡೆದಿದ್ದು, ದುಬಾರಿ ಬೆಲೆಯ ಐಫೋನ್‌ಗಳನ್ನು ಕದ್ದಿರುವ ಡೆಲಿವರಿ ಎಕ್ಸಿಕ್ಯೂಟಿವ್ ಲಲಿತ್ ಎಂಬಾತನ ವಿರುದ್ಧ ಪೊಲೀಸರು ಎಫ್‌ಐಆರ್ ದಾಖಲಿಸಿಕೊಂಡಿದ್ದಾರೆ.

ಇ-ಕಾಮರ್ಸ್‌ ಕಂಪನಿಯೊಂದು ಗ್ರಾಹಕರಿಗೆ ತಲುಪಿಸಬೇಕಿದ್ದ 10 ಐಫೋನ್‌ಗಳು ಮತ್ತು ಏರ್‌ಪಾಡ್‌ಗಳನ್ನು ಡೆಲಿವರಿ ಎಕ್ಸಿಕ್ಯೂಟಿವ್ ಆಗಿರುವ ಲಲಿತ್ ಅವರ ವಿಳಾಸಕ್ಕೆ ಕಳುಹಿಸಿದೆ.

ಅಮೆಜಾನ್‌ನ ಪಾರ್ಸೆಲ್ ಅನ್ನು ತಲುಪಿಸುವ ಮ್ಯಾಟ್ರಿಕ್ಸ್ ಫೈನಾನ್ಸ್ ಸೊಲ್ಯೂಷನ್‌ನ ಸ್ಟೇಷನ್ ಇನ್‌ಚಾರ್ಜ್ ರವಿ ಅವರು ಲಲಿತ್‌ಗೆ ಐಫೋನ್‌ಗಳನ್ನು ಕಳುಹಿಸಿದ್ದು, ಆದರೆ ವಂಚನೆ ಪ್ರಕರಣ ಬೆಳಕಿಗೆ ಬರುತ್ತಿದ್ದಂತೆ ಪೊಲೀಸರಿಗೆ ದೂರು ನೀಡಿದ್ದಾರೆ.

ಆದರೆ ಲಲಿತ್‌ ಆ ಐಫೋನ್‌ಗಳನ್ನು ಗ್ರಾಹಕರಿಗೆ ನೇರವಾಗಿ ತಲುಪಿಸುವ ಬದಲು, ಐಫೋನ್‌ಗಳನ್ನು ಕದ್ದು ಅದರೊಳಗೆ ಡಮ್ಮಿ ಐಫೋನ್‌ಗಳನ್ನು ಇಟ್ಟು ಗ್ರಾಹಕರಿಗೆ ವಂಚಿಸಲು ಮುಂದಾಗಿದ್ದಾನೆ.

ಈ ಮಧ್ಯೆ ಪಾರ್ಸೆಲ್‌ ಸ್ವೀಕರಿಸಿದ ಗ್ರಾಹಕರು ಡಮ್ಮಿ ಐಫೋನ್‌ ಕಂಡು ಅಚ್ಚರಿಗೊಳಗಾಗಿದ್ದು, ಕೂಡಲೇ ತಮ್ಮ ಆರ್ಡರ್‌ ಅನ್ನು ಕ್ಯಾನ್ಸಲ್‌ ಮಾಡಿ, ಪ್ರಾಡಕ್ಟ್‌ಅನ್ನು ವಾಪಸ್ ಕಳುಹಿಸಿದ್ದಾರೆ.

ಪುನಃ ಪ್ರಾಡಕ್ಟ್‌ ವಾಪಸ್ ಬಂದಾಗ ಅದನ್ನು ಸರಿಯಾಗಿ ಪರಿಶೀಲಿಸಿದಾಗ ಪ್ಯಾಕೇಜಿಂಗ್‌ನಲ್ಲಿ ಕೆಲವು ಬದಲಾವಣೆಗಳು ನಡೆದಿರೋದು ಕಂಡು ಬಂದಿದ್ದು, ತೆರೆದು ನೋಡಿದಾಗ ಐಫೋನ್ ಇರಲಿಲ್ಲ.

ಹೀಗಾಗಿ ಡೆಲಿವರಿ ಎಕ್ಸಿಕ್ಯೂಟಿವ್ ಆಗಿರುವ ಲಲಿತ್ ವಿರುದ್ಧ ಐಪಿಸಿ ಸೆಕ್ಷನ್ 420 (ವಂಚನೆ), 408 (ನೌಕರನಿಂದ ಕ್ರಿಮಿನಲ್ ನಂಬಿಕೆ ಉಲ್ಲಂಘನೆ) ಅಡಿಯಲ್ಲಿ ಬಿಲಾಸ್‌ಪುರ ಪೊಲೀಸ್ ಠಾಣೆಯಲ್ಲಿ ಎಫ್‌ಐಆರ್ ದಾಖಲಿಸಲಾಗಿದ್ದು, ಬಂಧನಕ್ಕೆ ಬಲೆ ಬೀಸಲಾಗಿದೆ.