Cyber Crime: ವರ್ಕ್​ ಫ್ರಮ್ ಹೋಮ್​ ಉದ್ಯೋಗದ ಆಫರ್​, ಆನ್​ಲೈನ್​ನಲ್ಲಿ ಬಂದ ಲಿಂಕ್​ ಕ್ಲಿಕ್ ಮಾಡಿದ್ದಕ್ಕೆ 9 ಲಕ್ಷ ಮಾಯ!

ಭಾರತದಲ್ಲಿ ಪ್ರತಿದಿನವೂ ಸೈಬರ್ ವಂಚನೆಯ ಹೊಸ ರೂಪಗಳು ದಾಖಲಾಗುತ್ತಿವೆ. ಉದ್ಯೋಗ, ಆಫರ್​ಗಳು ಮತ್ತು ಬ್ಯಾಂಕ್ ಸೇವೆಗಳ ಹೆಸರಿನಲ್ಲಿ ಸಂತ್ರಸ್ತರ ಖಾತೆಯಲ್ಲಿರುವ ಹಣವನ್ನು ದೋಚುತ್ತಿದ್ದಾರೆ. ಇತ್ತೀಚೆಗೆ ದೆಹಲಿಯ ವ್ಯಕ್ತಿಯೊಬ್ಬರು ಫೇಕ್​ ಲಿಂಕ್ ಕ್ಲಿಕ್ ಮಾಡಿ 9 ಲಕ್ಷ ರೂ. ಕಳೆದುಕೊಂಡಿದ್ದಾರೆ. ಸೈಬರ್ ವಂಚಕರು ಸಾಮಾಜಿಕ ಜಾಲತಾಣಗಳಲ್ಲಿ ವರ್ಕ್​ ಫ್ರಮ್​ ಹೋಮ್​ ಉದ್ಯೋಗದ ಆಫರ್ ಹೆಸರಿನಲ್ಲಿ ಮೋಸ ಮಾಡಿದ್ದಾರೆ.

ಎಎನ್‌ಐ ವರದಿ ಪ್ರಕಾರ, ದೆಹಲಿಯ ಪಿತಾಂಪುರದ ಹರಿನ್ ಬನ್ಸಾಲ್  ಎಂಬುವವರ ಸಾಮಾಜಿಕ ಜಾಲತಾಣ ಉಪಯೋಗಿಸುತ್ತಿದ್ದಾಗ 'ವರ್ಕ್​ ಫ್ರಮ್​ ಹೋಮ್​ ದೊಡ್ಡ ಮೊತ್ತದ ಹಣವನ್ನು ಸಂಪಾದಿಸಬಹುದು' ಎಂಬ ಪೋಸ್ಟ್ ಅನ್ನು ನೋಡಿದ್ದಾರೆ. ಬನ್ಸಾಲ್ ಪೋಸ್ಟ್ ಅನ್ನು ಕ್ಲಿಕ್ ಮಾಡಿದಾಗ, ಒಬ್ಬ ವ್ಯಕ್ತಿಯ ವ್ಯಾಟ್ಸಪ್ ಸಂಖ್ಯೆ ಕಾಣಿಸಿದೆ. ಆ ಅಪರಿಚಿತ ವ್ಯಕ್ತಿ ವೆಬ್‌ಸೈಟ್‌ನಲ್ಲಿ ನೋಂದಾಯಿಸಿಕೊಳ್ಳಲು ಲಿಂಕ್  ಕಳುಹಿಸಿದ್ದಾರೆ.

ವರ್ಕ್​ ಫ್ರಮ್​ ಹೋಮ್​ ಭಾಗವಾಗಿ ಆತನಿಗೆ ಕೊಟ್ಟಿರುವ ಕೆಲಸವನ್ನು ಪೂರ್ಣಗೊಳಿಸಲು ವೆಬ್‌ಸೈಟ್ ಸೂಚಿಸಿದೆ. ಈ ಕೆಲಸದ ಹಣವನ್ನು ಪಡೆಯಲು ನಿರ್ದಿಷ್ಟ ಮೊತ್ತವನ್ನು ಠೇವಣಿ ಮಾಡಬೇಕು ಮತ್ತು ಕಮಿಷನ್ ಜೊತೆಗೆ ಮೊತ್ತವನ್ನು ವಾಪಸ್​ ತೆಗೆದುಕೊಳ್ಳಬಹುದು ಎಂದು ವೆಬ್‌ಸೈಟ್ ತೋರಿಸಿದೆ. ಹೀಗಾಗಿ ಸಂತ್ರಸ್ತ  ಹಣವನ್ನು  ಕಟ್ಟಿದ್ದು, ತಕ್ಷಣವೇ ಕಮಿಷನ್‌ನೊಂದಿಗೆ ಹಣವನ್ನು ಖಾತೆಗೆ ಬಂದಿದೆ. ಸುಲಭದಲ್ಲಿ ಹಣ ಸಿಕ್ಕಿದ್ದರಿಂದ ಅವರ ಆತ್ಮವಿಶ್ವಾಸ ಹೆಚ್ಚಾಗಿದೆ.

ಅಂತಿಮವಾಗಿ ಅವರು ಸುಮಾರು ರೂ. 9,32,000 ಠೇವಣಿ ಮಾಡಿದ್ದಾರೆ. ಆದರೆ ಈ ವೇಳೆ ತಮ್ಮ ಹಣವನ್ನು ಹಿಂಪಡೆಯಲು ಸಾಧ್ಯವಾಗಲಿಲ್ಲ. ಆಗ ತಾನು ಮೋಸ ಹೋಗಿರುವುದನ್ನು ಅರಿತ ಸಂತ್ರಸ್ತ ಪೊಲೀಸರ ಮೊರೆ ಹೋಗಿದ್ದಾರೆ. ದೆಹಲಿ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ಆರಂಭಿಸಿದ್ದಾರೆ. ಈ ಪ್ರಕರಣದಲ್ಲಿ ಅಂಕಿತ್ (30) ಮತ್ತು ಸುಧೀರ್ ಕುಮಾರ್ (45) ಎಂಬ ಇಬ್ಬರನ್ನು ಪೊಲೀಸರು ಬಂಧಿಸಿದ್ದಾರೆ.

ಉದ್ಯೋಗ ಅಥವಾ ಪಾರ್ಟ್​ ಟೈಮ್​ ಜಾಬ್​ ಅವಕಾಶದ ನೆಪದಲ್ಲಿ ಮೋಸಗಾರರು ಜನರನ್ನು ವಂಚಿಸುತ್ತಿದ್ದಾರೆ. ಈ ಹಿಂದೆ ಸೋಷಿಯಲ್ ಮೀಡಿಯಾದಲ್ಲಿ ನೋಡಿದ ಜಾಬ್ ಪೋಸ್ಟ್ ಗಳನ್ನು ಕ್ಲಿಕ್ಕಿಸಿ ಹಣ ಕಳೆದುಕೊಂಡವರು ಸಾಕಷ್ಟು ಮಂದಿ ಇದ್ದಾರೆ. ವಂಚಕರು ತಮ್ಮ ಹಣಕಾಸಿನ ಉದ್ದೇಶಗಳಿಗಾಗಿ ಆನ್‌ಲೈನ್‌ನಲ್ಲಿರುವ ಜನರನ್ನು ಗುರಿಯಾಗಿಸಿಕೊಂಡಿದ್ದಾರೆ.

ಈ ವಂಚಕರು ಸಾಮಾಜಿಕ ಜಾಲತಾಣದ ಮೂಲಕ ಜನರನ್ನು ಬಲೆಗೆ ಬೀಳಿಸಿಕೊಳ್ಳುತ್ತಾರೆ ಮತ್ತು ನಂತರ WhatsApp ಮತ್ತು ಟೆಲಿಗ್ರಾಮ್ ಮೂಲಕ ಸಂಪರ್ಕಿಸುತ್ತಾರೆ. ಮೊದಲಿಗೆ ಕೆಲಸವನ್ನು ನಿಯೋಜಿಸಿದಂತೆ, ಕೆಲಸ ಮಾಡುತ್ತಿರುವಂತೆ ಮತ್ತು ಹಣ ಸಂಪಾದಿಸುತ್ತಿರುವಂತೆ ಅವರು ನಂಬುತ್ತಾರೆ. ನಂತರ ಹಣ ಹಿಂಪಡೆಯಲು ಒಂದಿಷ್ಟು ಮೊತ್ತ ಡೆಪಾಸಿಟ್​ ಮಾಡಬೇಕು ಎಂದು ನಂಬಿಸುತ್ತಾರೆ. ಇವರ ಮಾತನ್ನು ನಂಬಿ ಸಂತ್ರಸ್ತರು ಹಣವನ್ನು ಠೇವಣಿ ಮಾಡತ್ತಾರೆ. ಮೊದಲು ಕಮಿಷನ್ ಸೇರಿ ನಿರ್ದಿಷ್ಟ ಅವಧಿಗೆ ಹಣವನ್ನು ನೀಡಲಾಗುತ್ತದೆ. ಇದನ್ನು ನಂಬಿದವರು ದೊಡ್ಡ ಮೊತ್ತದ ಹಣವನ್ನು ಠೇವಣಿ ಮಾಡಿದ ನಂತರ ಆ ವೆಬ್​ಸೈಟ್​ ಮಾಯವಾಗುತ್ತದೆ.

ಹಾಗಾಗಿ ಇಂತಹ ಆನ್‌ಲೈನ್ ಜಾಹೀರಾತುಗಳಿಂದ ಜನರು ಆದಷ್ಟು ದೂರವಿರಬೇಕು. ಉದ್ಯೋಗಕ್ಕಾಗಿ ಹಣ ಕೇಳುವವರನ್ನು ನಂಬಬಾರದು, ಅಪರಿಚಿತರೊಂದಿಗೆ ಯಾವುದೇ ವಿವರಗಳನ್ನು ಹಂಚಿಕೊಳ್ಳಬಾರದು, ಅಲ್ಲದೆ ಇಂತಹ ನಕಲಿ ವೆಬ್‌ಸೈಟ್‌ಗಳನ್ನು ಗುರುತಿಸುವ ಕುರಿತು ಜಾಗೃತಿ ಮೂಡಿಸಬೇಕು.