Crime News: ಮಿಲಿಯನೇರ್ ಎಂದು ನಂಬಿಸಿ ಒಂಟಿ ಮಹಿಳೆಯರಿಗೆ ಮಂಕುಬೂದಿ ಎರಚುತ್ತಿದ್ದ ಆಸಾಮಿ ಅಂದರ್

ಒಂಟಿ ಯುವತಿಯರನ್ನು ಟಾರ್ಗೆಟ್ ಮಾಡಿ ತಾನೊಬ್ಬ ಮಿಲಿಯನೇರ್ ಎಂದು ನಂಬಿಸುತ್ತಿದ್ದ ಆರೋಪಿಯೋರ್ವನನ್ನು ಪೊಲೀಸರು ಬಂಧಿಸಿದ್ದಾರೆ.

ವಿಜಯವಾಡದ ಕೃಷ್ಣಲಂಕಾ ಪೊಲೀಸರು ಗುರುವಾರ 30 ಮಹಿಳೆಯರಿಗೆ ವಂಚಿಸಿದ ಹಾರ್ಡ್ಕೋರ್ ಅಂತಾರಾಜ್ಯ ಕ್ರಿಮಿನಲ್ ಚೇವೂರಿ ಚಂದ್ರ ಅಲಿಯಾಸ್ ವೆಂಡೆಟಿ ಚಂದ್ರ (50) ನನ್ನು ಬಂಧಿಸಿದ್ದಾರೆ.

ಈ ಆರೋಪಿ ಮಹಿಳೆಯರ ಕಣ್ಣಿಗೆ ಮಂಕುಬೂದಿ ಎರಚಿ ಅವರಿಂದ ಚಿನ್ನದ ಉಂಗುರಗಳಂತಹ ದುಬಾರಿ ಉಡುಗೊರೆಗಳನ್ನು ಪಡೆಯುತ್ತಿದ್ದನಂತೆ.

ಪ್ರೀತಿಯ ನೆಪದಲ್ಲಿ ಮಹಿಳೆಯನ್ನು ಲಾಡ್ಜ್​ಗೆ ಕರೆದೊಯ್ದು ನಿದ್ರೆ ಮಾತ್ರೆ ಬೆರೆಸಿದ ಆಹಾರವನ್ನು ಬಡಿಸುತ್ತಿದ್ದ ಎಂದು ಹೇಳಲಾಗಿದೆ.

ಸಂತ್ರಸ್ತ ಮಹಿಳೆಯರು ಪ್ರಜ್ಞಾಹೀನ ಸ್ಥಿತಿಯಲ್ಲಿ ಇರುವಾಗ ಮಹಿಳೆಯ ಆಭರಣ ಮತ್ತು ಹಣವನ್ನು ಕದ್ದು ಸ್ಥಳದಿಂದ ನಾಪತ್ತೆಯಾಗುತ್ತಿದ್ದ ಎಂದು ಪೊಲೀಸರು ಆರೋಪ ಪಟ್ಟಿಯಲ್ಲಿ ಉಲ್ಲೇಖಿಸಿದ್ದಾರೆ.

ಆರೋಪಿಯಿಂದ 97.5 ಗ್ರಾಂ ತೂಕದ ಚಿನ್ನಾಭರಣಗಳನ್ನು ಪೊಲೀಸರು ವಶಪಡಿಸಿಕೊಂಡಿದ್ದಾರೆ ಎಂದು ಉಪ ಪೊಲೀಸ್ ಆಯುಕ್ತ - ಡಿಸಿಪಿ ವಿಶಾಲ್ ಗುನ್ನಿ ತಿಳಿಸಿದ್ದಾರೆ.

ಲಬ್ಬಿಪೇಟೆಯ ಕಮಾಂಡ್ ಕಂಟ್ರೋಲ್ ಕೇಂದ್ರದಲ್ಲಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಡಿಸಿಪಿ ಪ್ರಕರಣದ ವಿವರ ನೀಡಿದರು.

ಡಿಸಿಪಿ ಪ್ರಕಾರ, ಆಂಧ್ರಪ್ರದೇಶದ ನೆಲ್ಲೂರು ಜಿಲ್ಲೆಯ ಕೋಟಾ ಮಂಡಲ್ ಮೂಲದ ಚೇವೂರಿ ಚಂದ್ರ (50) ತನ್ನ ಬಾಲ್ಯದಿಂದಲೂ ತನ್ನ ಹೆತ್ತವರನ್ನು ತೊರೆದು ಒಂಟಿಯಾಗಿ ವಾಸಿಸಲು ಪ್ರಾರಂಭಿಸಿದ್ದಾನೆ.

ಗುಡೂರಿನಲ್ಲಿ ಕೆಲಕಾಲ ಕೆಲಸ ಮಾಡಿ ನಂತರ ತಿರುಪತಿಗೆ ಹೋಗಿ ನೆಲೆಸಿದ್ದ. ಬಸ್ ನಿಲ್ದಾಣದ ಸುತ್ತಮುತ್ತಲಿನ ಪ್ರದೇಶಗಳಲ್ಲಿ ಸಂಚರಿಸಲು ಆರಂಭಿಸಿದ ಆತ ಒಂಟಿ ಯುವತಿಯರೊಂದಿಗೆ ಸ್ನೇಹ ಬೆಳೆಸಿದ್ದ.

ಚಿತ್ತೂರು, ತಿರುಪತಿ, ನೆಲ್ಲೂರು, ಗುಂಟೂರು, ವಿಜಯವಾಡ, ಚೆನ್ನೈ ಮತ್ತು ಎಲೂರು ನಗರಗಳಲ್ಲಿ 30ಕ್ಕೂ ಹೆಚ್ಚು ಮಹಿಳೆಯರಿಗೆ ವಂಚಿಸಿದ್ದ ಎಂದು ಪೊಲೀಸರು ತಿಳಿಸಿದ್ದಾರೆ.