China Corona Virus: ಚೀನಾದಲ್ಲಿ ಪ್ರತಿದಿನ 5 ಸಾವಿರ ಸಾವು, ಶವ ಸಂಸ್ಕಾರಕ್ಕೂ 'ಹೆಣ'ಗಾಟ! ಆಸ್ಪತ್ರೆಯಲ್ಲಿ ಬೆಡ್ ಸಿಗದೇ ರೋಗಿಗಳ ಪರದಾಟ!

ಚೀನಾದಲ್ಲಿ ಕೊರೊನಾ ತನ್ನ ಆರ್ಭಟ ಶುರು ಮಾಡಿದ್ದು, ಸಾಕಷ್ಟು ಮಂದಿ ಸಾವು-ಬದುಕಿನ ಮಧ್ಯೆ ಹೋರಾಟ ನಡೆಸುತ್ತಿದ್ದಾರೆ. ಅದರಲ್ಲಿಯೂ ಹೆಚ್ಚಾಗಿ ಹಿರಿಯರು ಸೋಂಕಿಗೆ ಒಳಗಾಗುತ್ತಿದ್ದಾರೆ. ಚೀನಾದ ಪ್ರಮುಖ ನಗರಗಳಲ್ಲಿನ ಆಸ್ಪತ್ರೆಗಳ ವಾರ್ಡ್‌ಗಳಲ್ಲಿ ಜನ ಚಿಕಿತ್ಸೆಗಾಗಿ ಕ್ಯೂ ನಿಲ್ಲುತ್ತಿದ್ದಾರೆ. ಚೀನಾದ್ಯಂತ ಕೊರೊನಾ ಹಬ್ಬಿದ್ದು, ಸಾಮೂಹಿಕವಾಗಿ ಕೊರೊನಾ ಪರೀಕ್ಷೆಯನ್ನು ಕಡ್ಡಾಯವಾಗಿ ನಡೆಸುವುದು ಕಷ್ಟ ಎಂದು ಅಧಿಕಾರಿಗಳು ಹೇಳಿದ್ದಾರೆ.

ಪ್ರತಿಯೊಂದು ಬೆಡ್​ಗಳ ನಡುವೆ ಒಂದು ರಾಶಿ ವೆಂಟಿಲೇಟರ್​ಗಳನ್ನು ಅಳವಡಿಸಲಾಗಿದ್ದು, ಕೋವಿಡ್ -19 ನಿಂದ ವೃದ್ಧರು ಆಸ್ಪತ್ರೆಯ ತುರ್ತು ವಿಭಾಗದಲ್ಲಿ ಸ್ಟ್ರೆಚರ್ ಮೇಲೆ ನರಳಾಡುತ್ತಿದ್ದಾರೆ. ಚಾಂಗ್‌ಕಿಂಗ್ ಮೆಡಿಕಲ್ ಯೂನಿವರ್ಸಿಟಿ ಫಸ್ಟ್ ಅಫಿಲಿಯೇಟ್ ಆಸ್ಪತ್ರೆಯ ವೈದ್ಯರೊಬ್ಬರು, ದಿನಕ್ಕೆ 10 ಕ್ಕೂ ಹೆಚ್ಚು ಮಂದಿಯನ್ನು ಆಸ್ಪತ್ರೆಗೆ ಕರೆದೊಯ್ದು ಚಿಕಿತ್ಸೆ ನೀಡಲಾಗುತ್ತಿದೆ. ಅವರಲ್ಲಿ ಶೇ 80 ರಿಂದ 90ರಷ್ಟು ಕೊರೊನಾ ಸೋಂಕಿಗೆ ಜನ ಒಳಗಾಗಿರುತ್ತಾರೆ. ಅವರಲ್ಲಿ ಹೆಚ್ಚಿನವರು ವಯಸ್ಸಾದವರೇ ಆಗಿದ್ದಾರೆ ಎಂದು ತಿಳಿಸಿದ್ದಾರೆ.

ಚಿಕಿತ್ಸೆಗಾಗಿ ವಯಸ್ಸಾದವರು ಸುಮಾರು ಅರ್ಧಗಂಟೆಗೂ ಹೆಚ್ಚು ಕಾಲ ಆಸ್ಪತ್ರೆಗಳಲ್ಲಿ ಕಾಯುತ್ತಿದ್ದಾರೆ. ದಿನನಿತ್ಯ ಚೀನಾದಲ್ಲಿ ಹತ್ತು ಸಾವಿರ ಕೇಸ್ ವರದಿಯಾಗುತ್ತಿದ್ದು, 5,000 ಸಾವುಗಳು ವರದಿಯಾಗುತ್ತಿದೆ. ಅಲ್ಲದೇ ಶವಸಂಸ್ಕಾರ ನಡೆಸಲೂ ಜಾಗವಿಲ್ಲದೇ ಸ್ಮಶಾನಗಳಲ್ಲಿ ಹೆಣಗಳನ್ನು ದಮನ ಮಾಡಲು ಕ್ಯೂ ನಿಲ್ಲಬೇಕಾದ ಪರಿಸ್ಥಿತಿ ಎದುರಾಗಿದೆ. ಇಷ್ಟು ದಿನ ಸುಮ್ಮನೆ ಇದ್ದ ಚೀನಾ ಇದೀಗ ಮೊದಲ ಬಾರಿಗೆ ವಿದೇಶಿ ಲಸಿಕೆಯ ಖರೀದಿಗೆ ಮುಂದಾಗಿದೆ.

ಚೀನಾ ಮಂಗಳವಾರ 3,101 ಹೊಸ ರೋಗಲಕ್ಷಣದ ಕೋವಿಡ್ ಸೋಂಕುಗಳನ್ನು ವರದಿ ಮಾಡಿದೆ ಅದರಲ್ಲಿ 3,049 ಸ್ಥಳೀಯವಾಗಿ ವರದಿಯಾದ ಪ್ರಕರಣಗಳು. ಇದರೊಂದಿಗೆ, ರೋಗಲಕ್ಷಣಗಳೊಂದಿಗೆ ದೃಢಪಡಿಸಿದ ಒಟ್ಟು ಪ್ರಕರಣಗಳ ಸಂಖ್ಯೆ 386,276 ಕ್ಕೆ ತಲುಪಿದೆ.

ಮತ್ತೊಂದೆಡೆ ಚೀನಾದಲ್ಲಿ ಐಸಿಯುಗಳು ಭರ್ತಿಯಾಗುತ್ತಿದ್ದು, ಇಡೀ ವಿಶ್ವವನ್ನೇ ಮತ್ತೊಮ್ಮೆ ಆತಂಕಕ್ಕೆ ತಳ್ಳಿದೆ. ಚೀನಾದ ಕೊವಿಡ್ ಪರಿಸ್ಥಿತಿ ಬಗ್ಗೆ ಮಾಹಿತಿ ಸಂಗ್ರಹಿಸಿದ್ದು, ಅಗತ್ಯ ಕ್ರಮ ಕೈಗೊಳ್ಳಲು ಚೀನಾಕ್ಕೆ ವಿಶ್ವ ಆರೋಗ್ಯ ಸಂಸ್ಥೆ ಸೂಚನೆ ನೀಡಿದೆ.

ಇತ್ತೀಚೆಗಷ್ಟೇ ಚೀನಾದಲ್ಲಿ ಕೋವಿಡ್ ಉಲ್ಬಣಗೊಂಡಿದ್ದು ರೋಗಗಳಿಗೆ ನೆಲದಲ್ಲಿ ಸಿಪಿಆರ್ ನೀಡುತ್ತಿರುವ ಮತ್ತು ಬಿಡುವಿಲ್ಲದೆ ಕೆಲಸ ಮಾಡಿದ ಪರಿಣಾಮ ಡಾಕ್ಟರ್ ಕುಸಿದು ಬಿದ್ದಿರುವ ವೀಡಿಯೋವೊಂದು ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿತ್ತು.

ನಿನ್ನೆ ಚೀನಾದಲ್ಲಿ  5,994 ಕೊರೊನಾ ಪ್ರಕರಣಗಳು ಪತ್ತೆಯಾಗಿದ್ದು, ಕಳೆದ 7 ದಿನಗಳಲ್ಲಿ ಸರಾಸರಿ  2,650 ಕೇಸ್ ವರದಿಯಾಗಿದೆ. ಅದರಲ್ಲಿಯೂ ಅತೀ ಹೆಚ್ಚು ವೇಗವಾಗಿ ಹರಡುತ್ತಿರುವ BF .7 ಒಮಿಕ್ರಾನ್ ಉಪತಳಿ ಹೆಚ್ಚಳವಾಗುತ್ತಿದೆ. ಇದರೊಂದಿಗೆ BA.5.2 ಒಮಿಕ್ರಾನ್ ಉಪತಳಿ ಕೂಡಾ ಅಪಾಯಕಾರಿಯಾಗಿದೆ.

ಚೀನಾದಲ್ಲಿ BF .7 ಒಮಿಕ್ರಾನ್ ಸೋಂಕು ಒಬ್ಬರಿಂದ ಕನಿಷ್ಠ 18 ಜನಕ್ಕೆ ಹರಡುತ್ತದೆ. ವೈರಸ್​ನ ಸಂತಾನೋತ್ಪತ್ತಿ ವೇಗ ಹೆಚ್ಚಾಗಿದ್ದು, ಸೋಂಕಿತರಲ್ಲಿ ರೋಗ ಲಕ್ಷಣಗಳೇ ಕಾಣಿಸುವುದಿಲ್ಲ. ಸೋಂಕು ಕಾಣಿಸದ ಕಾರಣ ಜನರು ಓಡಾಟ ನಡೆಸಿದ್ದರಿಂದ ಚೀನಾದಲ್ಲಿ ಕೊರೊನಾ ಏರಿಕೆ ಕಂಡಿದೆ. ಅಲ್ಲದೇ ಬೂಸ್ಟರ್​ ಡೋಸ್ ಪಡೆದವರಿಗೂ ಕೊರೊನಾ ಸೋಂಕು ತಗುಲಿದೆ.