Consumer Court: ಸಿನಿಮಾ ನೋಡುವ ವೇಳೆ ಮಹಿಳೆಗೆ ಕಚ್ಚಿದ ಇಲಿ! ಥಿಯೇಟರ್​ ಮಾಲೀಕನಿಗೆ ಬಿತ್ತು 60 ಸಾವಿರ ದಂಡ

ಸಿನಿಮಾ ನೋಡುವ ವೇಳೆ 50 ವರ್ಷದ ಮಹಿಳೆಗೆ ಇಲಿ ಕಚ್ಚಿದ್ದಕ್ಕೆ, ಗ್ರಾಹಕರ ಕೋರ್ಟ್​ ಸಂತ್ರಸ್ತ ಮಹಿಳೆಗೆ 60,000 ಪರಿಹಾರ ನೀಡುವಂತೆ ಗುವಾಹಟಿಯ ಸಿನಿಮಾ ಹಾಲ್‌ ಮಾಲೀಕರಿಗೆ  ಆದೇಶಿಸಿದೆ.

ಐದು ವರ್ಷಗಳ ಹಿಂದೆ ಸಿನಿಮಾ ಹಾಲ್​ನಲ್ಲಿ  ಸಿನಿಮಾ ನೋಡುತ್ತಿದ್ದ ವೇಳೆ ಮಹಿಳೆಯೊಬ್ಬರಿಗೆ ಇಲಿ ಕಚ್ಚಿತ್ತು. ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ಗ್ರಾಹಕರ ಆಯೋಗ ಪರಿಹಾರ ಧನವಾಗಿ ಮಹಿಳೆಗೆ ಒಟ್ಟು 67 ಸಾವಿರ ನೀಡುವಂತೆ ಚಿತ್ರಮಂದಿರಕ್ಕೆ ಸೂಚಿಸಿದೆ. ಅಕ್ಟೋಬರ್ 20, 2018 ರಂದು, ಮಹಿಳೆ ತಮ್ಮ ಕುಟುಂಬಸ್ಥರೊಂದಿಗೆ ಜಿಲ್ಲೆಯ ಭಂಗಾಗರ್ ಪ್ರದೇಶದ ಗಲೇರಿಯಾ ಥಿಯೇಟರ್‌ನಲ್ಲಿ ಸಿನಿಮಾ ವೀಕ್ಷಿಸಲು 9 ಗಂಟೆ ಶೋಗೆ ಹೋಗಿದ್ದರು. ಸಿನಿಮಾ ಇಂಟರ್ವಲ್ ವೇಳೆ ಮಹಿಳೆ ಅವರ ಕಾಲಿಗೆ ಇಲಿ ಕಚ್ಚಿದೆ. ತಕ್ಷ ಅವರು ನೋಡಿದಾಗ ಕಾಲಲ್ಲಿ ರಕ್ತ ಸುರಿಯತೊಡಗಿದೆ.

ತಕ್ಷಣ ಸಂತ್ರಸ್ತೆ ಅವರು ಸಿನಿಮಾ ಹಾಲ್​ನಿಂದ ಹೊರಗೆ ಬಂದು, ಸಿನಿಮಾ ಹಾಲ್​ ಆಡಳಿತ ಮಂಡಳಿಗೆ ವಿಷಯ ತಿಳಿಸಿದ್ದಾರೆ. ಆದರೆ ಇದನ್ನು ಚಿತ್ರಮಂದಿರದ ಆಡಳಿತ ಮಂಡಳಿ ಗಂಭೀರವಾಗಿ ಪರಿಗಣಿಸಿಲ್ಲ. ಜೊತೆಗೆ ಸಂತ್ರಸ್ತೆಗೆ ಯಾವುದೇ ಪ್ರಥಮ ಚಿಕಿತ್ಸೆ ನೀಡದೆ ನಿರ್ಲಕ್ಷ್ಯ ವಹಿಸಿದ್ದಾರೆ. ಹಾಗಾಗಿ ಅನಿತಾ ನ್ಯಾಯಕ್ಕಾಗಿ ಗ್ರಾಹಕ ಆಯೋಗಕ್ಕೆ ದೂರು ಸಲ್ಲಿಸಿದ್ದಾರೆ.

ಸ್ವತಃ ಮಹಿಳೆ ಆಸ್ಪತ್ರೆಗೆ ಹೋಗಿದ್ದು, ಆಕೆಯನ್ನು ಎರಡು ಗಂಟೆಗಳ ಕಾಲ ನಿಗಾದಲ್ಲಿ ಇರಿಸಲಾಯಿತು, ಏಕೆಂದರೆ ವೈದ್ಯರು ಆರಂಭದಲ್ಲಿ ಅವರಿಗೆ ಕಚ್ಚಿರುವುದು ಏನು ಎಂಬುದು ಖಚಿತವಾಗಿಲ್ಲ. ನಂತರ ಆಕೆಗೆ ಇಲಿ ಕಡಿತಕ್ಕೆ ಚಿಕಿತ್ಸೆ ನೀಡಲಾಗಿದೆ ಎಂದು ಮಹಿಳೆ ವಕೀಲೆ ಅನಿತಾ ವರ್ಮಾ ತಿಳಿಸಿದ್ದಾರೆ. ಸಂತ್ರಸ್ತೆ ತನ್ನ ವೈದ್ಯಕೀಯ ಚಿಕಿತ್ಸೆಯ ವೆಚ್ಚ ಮತ್ತು ತಾವು ಅನುಭವಿಸಿದ ಮಾನಸಿಕ ವೇದನೆ, ನೋವು ಮತ್ತು ಸಂಕಟಕ್ಕಾಗಿ 6 ಲಕ್ಷ ರೂಪಾಯಿ ಪರಿಹಾರವನ್ನು ಕೋರಿ ಗ್ರಾಹಕರ ನ್ಯಾಯಾಲಯದ ಮೊರೆ ಹೋಗಿದ್ದರು.

ಆದರೆ ಗಲೇರಿಯಾ ಚಿತ್ರಮಂದಿರವು ಮಹಿಳೆಯ ಆರೋಪಗಳನ್ನು ವಿರೋಧಿಸಿತ್ತು. ಸಿನಿಮಾ ಆವರಣದೊಳಗೆ ಆಡಳಿತ ಮಂಡಳಿ ಸರಿಯಾದ ನೈರ್ಮಲ್ಯವನ್ನು ನಿರ್ವಹಿಸುತ್ತದೆ. ಅಲ್ಲದೆ ಮಹಿಳೆಗೆ ಅಂದು ಪ್ರಥಮ ಚಿಕಿತ್ಸೆ ನೀಡುವುದಕ್ಕೆ ಬಂದಾಗ ಆಕೆ ನಿರಾಕರಿಸಿದರು ಎಂದು ಹೇಳಿತ್ತು. ಗಲೇರಿಯಾ ಸಿನಿಮಾ ದೂರನ್ನು ತಿರಸ್ಕರಿಸುವಂತೆ ನ್ಯಾಯಾಲಯವನ್ನು ಒತ್ತಾಯಿಸಿ, 15,000 ರೂಪಾಯಿಗಳ ಕೋರ್ಟ್​ ವೆಚ್ಚವನ್ನು ಕೋರಿತ್ತು.

ಈ ಪ್ರಕರಣವನ್ನು ವಿಚಾರಣೆ ನಡೆಸಿದ ಜಿಲ್ಲಾ ಗ್ರಾಹಕ ವ್ಯಾಜ್ಯಗಳ ಪರಿಹಾರ ಆಯೋಗ, ಗಲೇರಿಯಾ ಚಿತ್ರಮಂದಿರದ ಅಧಿಕಾರಿಗಳಿಗೆ ಮಹಿಳೆಯ ವೈದ್ಯಕೀಯ ವೆಚ್ಚ , ಮಾನಸಿಕ ನೋವುಂಟು ಮಾಡಿದ ವೆಚ್ಚವಾಗಿ ಒಟ್ಟು 67,282 ರೂಪಾಯಿ ಪಾವತಿಸುವಂತೆ ಸೂಚಿಸಿದೆ.

ಮಹಿಳೆಗೆ ಮಾನಸಿಕ ವೇದನೆಗೆ ಪರಿಹಾರವಾಗಿ 40,000 ರೂಪಾಯಿ, ನೋವು ಮತ್ತು ಸಂಕಟಕ್ಕೆ ಪರಿಹಾರವಾಗಿ 20,000 ರೂಪಾಯಿ ಹಾಗೂ ವೈದ್ಯಕೀಯ ಬಿಲ್ 2,282 ಮರುಪಾವತಿ ಮತ್ತು ಕೋರ್ಟ್​ ವೆಚ್ಚವನ್ನು ಸರಿದೂಗಿಸಲು 5,000 ರೂಪಾಯಿ ಸೇರಿ ಒಟ್ಟು 67 ಸಾವಿರ ರೂಪಾಯಿ ಪರಿಹಾರದ ಮೊತ್ತವನ್ನು 45 ದಿನಗಳಲ್ಲಿ ಪಾವತಿಸುವಂತೆ ಆದೇಶಿಸಲಾಗಿದೆ.