Rahul Gandhi: ಯೋಗಿಯಂತೆ ತಿರುಗಾಡುತ್ತಿರುವ ರಾಹುಲ್ ಗಾಂಧಿ; ನಿಜಕ್ಕೂ ಇದರ ಹಿಂದಿನ ಸತ್ಯವೇನಿರಬಹುದು?

ಯಾರೇ ಆದರೂ ಕೂಡ ಜನರ ಬಳಿ ಹೋಗಿ ಮಾತನಾಡಿದಾಗ ಹೊಸ, ಹೊಸ ವಿಚಾರಗಳು ತಿಳಿದುಕೊಳ್ಳುತ್ತಾರೆ. ನಿಜವಾದ ಜೀವನ ಏನು ಎಂದು ಅರಿತುಕೊಳ್ಳುತ್ತಾರೆ. ಏಕೆಂದರೆ ಜನರ ಕಷ್ಟಗಳನ್ನು ನೋಡುತ್ತಾರೆ. ಹೀಗಾಗಿ ಅವರ ಬಾಹ್ಯ ಆಸಕ್ತಿಗಳನ್ನು ಕಳೆದುಕೊಳ್ಳುತ್ತಾರೆ. ತತ್ತ್ವಶಾಸ್ತ್ರವನ್ನು ಕಲಿತ ನಂತರ ಅವರು ತಪಸ್ವಿ ಜೀವನದ ಬಗ್ಗೆ ಆಸಕ್ತಿ ಹೊಂದುತ್ತಾರಂತೆ. ಹಾಗೆಯೇ ಸದ್ಯ ಕಾಂಗ್ರೆಸ್ ಸಂಸದ ರಾಹುಲ್ ಗಾಂಧಿ ಅವರ ಸ್ಥಿತಿಯೂ ಆಗಿದೆ.

ಭಾರತ್ ಜೋಡೋ ಯಾತ್ರೆಗೂ ಮುನ್ನ ರಾಹುಲ್ ಗಾಂಧಿ ಗಡ್ಡ ಬಿಟ್ಟಿರಲಿಲ್ಲ. ಈ ಯಾತ್ರೆ ಕೈಗೊಂಡ ನಂತರ ಗಡ್ಡ ಬಿಡಲು ಆರಂಭಿಸಿದ್ದಾರೆ. ಅಲ್ಲದೇ ಅವರ ಬಗ್ಗೆ ಕೂಡ ಯೋಚಿಸುವುದನ್ನು ನಿಲ್ಲಿಸಿದ್ದಾರೆ. ಹೊರ ಸೌಂದರ್ಯಕ್ಕೆ ಗುಡ್ ಬೈ ಹೇಳಿ, ವಿವಿಧ ರಾಜ್ಯಗಳಲ್ಲಿ ಸಂಚರಿಸುತ್ತಿದ್ದಾರೆ. ಎಲ್ಲ ಸಮುದಾಯದ ಜನರನ್ನು ಭೇಟಿ ಮಾಡಿ ಸಾಗುತ್ತಿದ್ದಾರೆ. ಇದೇ ರೀತಿ ಭಾನುವಾರ ಸಂಜೆ ಧರ್ಮನಗರಿಯ ಕುರುಕ್ಷೇತ್ರ ತಲುಪಿದ ರಾಹುಲ್ ಗಾಂಧಿ ಅವರು, ಕುರುಕ್ಷೇತ್ರದ ಬ್ರಹ್ಮ ಸರೋವರದಲ್ಲಿ ತಮ್ಮ ಹರಕೆಯನ್ನು ತೀರಿಸಿದರು. ಈ ವೇಳೆ ಸನ್ಯಾಸಿಯ ಅವತಾರದಲ್ಲಿ ಕಾಣಿಸಿಕೊಂಡಿದ್ದಾರೆ.

ಇದೇ ಸಮಯದಲ್ಲಿ ಆರತಿ ಮಾಡುತ್ತಿರುವ ಫೋಟೋವನ್ನು ರಾಹುಲ್ ಗಾಂಧಿ ತಮ್ಮ ಟ್ವಿಟ್ಟರ್ ಖಾತೆಯಲ್ಲಿ ಹಂಚಿಕೊಂಡಿದ್ದಾರೆ.

ಫೋಟೋ ಜೊತೆಗೆ ಶೀರ್ಷಿಕೆಯಲ್ಲಿ ರಾಹುಲ್ ಗಾಂಧಿ, "ಇಂದು ನನಗೆ ಕುರುಕ್ಷೇತ್ರದಲ್ಲಿ ಬ್ರಹ್ಮ ಸರೋವರಕ್ಕೆ ಆರತಿ ಮಾಡುವ ಅವಕಾಶ ಸಿಕ್ಕಿತು ಎಂದು ಬರೆದುಕೊಂಡಿದ್ದಾರೆ.

ಭಾರತದ ಅಭಿವೃದ್ಧಿಯನ್ನು ಗಮನದಲ್ಲಿಟ್ಟು ಕೊಂಡು ಈ ಕಲ್ಪನಾತೀತ ಸುಂದರ ಸ್ಥಳಕ್ಕೆ ನಮಸ್ಕರಿಸಿದೆ ಎಂದು ಕೂಡ ಕ್ಯಾಪ್ಷನ್ನಲ್ಲಿ ಬರೆದುಕೊಂಡಿದ್ದರು.

ಸದ್ಯ ರಾಹುಲ್ ಆರತಿ ಮಾಡುತ್ತಿರುವ ಫೋಟೋಗಳು ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗುತ್ತಿವೆ. ಕುರುಕ್ಷೇತ್ರದ ಬ್ರಹ್ಮ ಸರೋವರದ ಮೇಲೆ ರಾಹುಲ್ ಗಾಂಧಿ ತಪಸ್ವಿಯಂತೆ ಕಾಣಿಸಿಕೊಂಡಿರುವುದು ಇದೀಗ ಚರ್ಚೆಗೆ ಗ್ರಾಸವಾಗಿದೆ.

ಪೌರಾಣಿಕವಾಗಿ ಪ್ರಮುಖವಾದ ಬ್ರಹ್ಮ ಸರೋವರಂ ಬ್ರಹ್ಮಾಂಡವನ್ನು ಸೃಷ್ಟಿಸಿದ ಬ್ರಹ್ಮನ ಮುಖ್ಯ ದೇವಾಲಯ ಎಂದು ಭಾವಿಸಲಾಗಿದೆ. ಇದನ್ನು ಆದಿ ಸರೋವರಂ ಅಂತಲೂ ಕೂಡ ಕರೆಯುತ್ತಾರೆ.