Godman Nithyanandaನ ಕೈಲಾಸ ದೇಶದಿಂದ ಅಮೆರಿಕಾದ 30 ನಗರಗಳೊಂದಿಗೆ ‘ಸಿಸ್ಟರ್ ಸಿಟಿ’ ಹಗರಣ!

ಈ ಒಪ್ಪಂದವನ್ನು ‘ಸಿಸ್ಟರ್ ಸಿಟಿ’ ಎಂದು ಕರೆಯಲಾಗಿದ್ದು, ಅಮೆರಿಕದ ರಿಚ್ಮಂಡ್, ವರ್ಜೀನಿಯಾ, ಡೇಟನ್, ಒಹಿಯೊ, ಬುಯೆನಾ ಪಾರ್ಕ್, ಫ್ಲೋರಿಡಾ ಮುಂತಾದ ನಗರಾಡಳಿತಗಳು, ಕೈಲಾಸ ರಾಷ್ಟ್ರದೊಂದಿಗೆ ಒಪ್ಪಂದ ಮಾಡಿಕೊಂಡು, ತಾವೂ ಕೈಲಾಸದ ಭಾಗವಾಗಿರುವುದಾಗಿ, ಉಪನಗರಗಳ ಮಾದರಿಯಲ್ಲಿ ಇರುವುದಾಗಿ ಘೋಷಿಸಿಕೊಂಡಿವೆ.

ಈ ಬೆಳವಣಿಗೆಯ ಬಗ್ಗೆ ಅಮೆರಿಕದ ಫಾಕ್ಸ್ ನ್ಯೂಸ್ ಸಂಸ್ಥೆಯು ತನಿಖಾ ವರದಿಯೊಂದನ್ನು ಸಿದ್ಧಪಡಿಸಿದ್ದು, ಅದರಲ್ಲಿ ನಿತ್ಯಾನಂದ ಎಂಬ ನಕಲಿ ಗುರುವೊಬ್ಬ, ವಾಸ್ತವದಲ್ಲಿ ಅಸ್ತಿತ್ವವೇ ಇಲ್ಲದಂಥ, ಕೇವಲ ಮನಸ್ಸಿನಲ್ಲಿ ಕಲ್ಪಿಸಿಕೊಳ್ಳಬಹುದಾದ ದೇಶವೊಂದನ್ನು ಸೃಷ್ಟಿಸಿದ್ದಾನೆ ಎಂದು ಆರೋಪಿಸಲಾಗಿದೆ.

ಅಲ್ಲದೇ, ತನ್ನ ನಕಲಿ ರಾಷ್ಟ್ರಕ್ಕೆ ಕೈಲಾಸ ಎಂಬ ಹೆಸರನ್ನೂ ಇಟ್ಟಿದ್ದಾನೆ. ಆ ದೇಶದ್ದೇ ಆದ ಕರೆನ್ಸಿ, ಪಾಸ್ ಪೋರ್ಟ್, ರಾಷ್ಟ್ರ ಲಾಂಛನ ಎಲ್ಲವೂ ಇರುವುದಾಗಿ ಘೋಷಿಸಿಕೊಂಡಿದ್ದಾರೆ. ಇಂಥ ಫೇಕ್ ಗುರುವಿನ, ನಕಲಿ ದೇಶದ ಜೊತೆಗೆ ಅಮೆರಿಕದ ಈ ಮಹಾನಗರಗಳು ಒಪ್ಪಂದ ಮಾಡಿಕೊಂಡಿರುವುದು ಹಾಸ್ಯಾಸ್ಪದ ಹಾಗೂ ಇದು ತನಿಖೆಗೆ ಅರ್ಹವಾದ ವಿಚಾರ ಎಂದು ಹೇಳಿದೆ.

ಈ ತನಿಖಾ ವರದಿಯು ಪ್ರಕಟಗೊಳ್ಳುತ್ತಲೇ, ನ್ಯೂ ಜೆರ್ಸಿ ನಗರವು ಕೈಲಾಸ ರಾಷ್ಟ್ರದೊಂದಿಗೆ ತಾನು ಮಾಡಿಕೊಂಡಿದ್ದ ಸಿಸ್ಟರ್- ಸಿಟಿ ಒಪ್ಪಂದವನ್ನು ರದ್ದುಗೊಳಿಸಿದೆ. ನೇವಾರ್ಕ್ ನಲ್ಲಿ ಇದೇ ಜ. 12ರಂದು ನಡೆದಿದ್ದ ಸಮಾರಂಭದಲ್ಲಿ ನ್ಯೂ ಜೆರ್ಸಿ ನಗರ ಪಾಲಿಕೆಯ ಅಧಿಕಾರಿಗಳು ಕೈಲಾಸ ರಾಷ್ಟ್ರದೊಂದಿಗೆ ಒಪ್ಪಂದಕ್ಕೆ ಸಹಿ ಹಾಕಿದ್ದರು. ಇನ್ನುಳಿದ ನಗರಗಳು ಕೈಲಾಸ ರಾಷ್ಟ್ರದೊಂದಿಗೆ ಒಪ್ಪಂದ ಮಾಡಿಕೊಂಡಿರುವುದನ್ನು ಒಪ್ಪಿಕೊಂಡಿವೆ.

ನಾರ್ತ್ ಕರೊಲಿನಾ ನಗರವು, ತಾನು ಕೈಲಾಸ ರಾಷ್ಟ್ರದೊಂದಿಗೆ ಮಾಡಿಕೊಂಡಿರುವ ಒಪ್ಪಂದದ ಬಗ್ಗೆ ಪ್ರತಿಕ್ರಿಯೆ ನೀಡಿದ್ದು, ಇದು ಕೈಲಾಸ ರಾಷ್ಟ್ರದ ಪ್ರತಿನಿಧಿಗಳು ಮಾಡಿಕೊಂಡ ಮನವಿಯ ಮೇರೆಗೆ ನಾವು ಮಾಡಿಕೊಂಡಿರುವ ಒಡಂಬಡಿಕೆ ಎಂದು ಹೇಳಬಹುದು. ಆದರೆ, ಇದಕ್ಕಿನ್ನೂ ಅನುಮೋದನೆ ಸಿಕ್ಕಿಲ್ಲ ಎಂದು ಹೇಳಿದೆ.

ಫಾಕ್ಸ್ ನ್ಯೂಸ್ ವರದಿಯ ಪ್ರಕಾರ, ನಾರ್ತ್ ಕರೊಲಿನಾ ನಗರದ ಅಧಿಕಾರಿಗಳು ಹೇಳಿರುವ ಈ ಹೇಳಿಕೆಯ ಬಗ್ಗೆ ತೀವ್ರ ಆಕ್ಷೇಪ ವ್ಯಕ್ತಪಡಿಸಿದೆ. ನಾವು ಇಂಥ ರಾಷ್ಟ್ರದವರು ಎಂದು ಯಾರು ಬಂದರೂ ಅವರೊಂದಿಗೆ ಒಪ್ಪಂದ ಮಾಡಿಕೊಳ್ಳಲಾಗುತ್ತದೆಯೇ? ಕನಿಷ್ಟ ಗೂಗಲ್‌ನಲ್ಲಿ ಇಂಥ ರಾಷ್ಟವಿದೆಯೇ ಎಂದು ಸರ್ಚ್ ಕೊಟ್ಟಾದರೂ ಒಮ್ಮೆ ಅವಲೋಕನ ಮಾಡಲು ಆಗುವುದಿಲ್ಲವೇ ಎಂದು ಫಾಕ್ಸ್ ನ್ಯೂಸ್ ಹೇಳಿದೆ.

ಇತ್ತೀಚೆಗೆ ವಿಶ್ವದ ಎಲ್ಲಾ ರಾಷ್ಟ್ರಗಳಲ್ಲಿ ಮಹಿಳೆಯರ ಮೇಲಿನ ದೌರ್ಜನ್ಯಗಳನ್ನು ನಿಲ್ಲಿಸುವ ಸಲುವಾಗಿ ವಿಶ್ವಸಂಸ್ಥೆಯಲ್ಲಿ ನಡೆದಿದ್ದ ಪಾಶ್ಚಿಮಾತ್ಯ ರಾಷ್ಟ್ರಗಳ ಸಮ್ಮೇಳನವೊಂದರಲ್ಲಿ ಸ್ವಾಮಿ ನಿತ್ಯಾನಂದನ ಶಿಷ್ಯೆಯರು ಭಾಗವಹಿಸಿದ್ದಾರೆಂದು ತಿಳಿದು ಬಂದಿತ್ತು.