Charishma Kaliyanda: ಆಸ್ಟ್ರೇಲಿಯಾ ಸಂಸದೆಯಾದ ಕೊಡಗಿನ ನಾರಿ; ವಿದೇಶದಲ್ಲೂ ಮರೆಯಲಿಲ್ಲ ಸ್ವದೇಶಿ ಸಂಸ್ಕೃತಿ

ಹೌದು. ಚರಿಶ್ಮಾ ಕಳಿಯಾಂಡ ಅವರು ಮೂಲತಃ ಕೊಡಗಿನವರು. ಆಸ್ಟ್ರೇಲಿಯಾಕ್ಕೆ ಉದ್ಯೋಗದ ಕಾರಣಕ್ಕೆ ಕೆಲ ವರ್ಷಗಳ ಹಿಂದೆ ಹೋಗಿ ಅಲ್ಲಿನ ಪ್ರಜೆಯಾಗಿ ಸದಸ್ಯತ್ವವನ್ನು ಪಡೆದಿದ್ದ ಅವರು ಇದೀಗ ಆಸ್ಟ್ರೇಲಿಯಾದ ಸಂಸದರಾಗಿಯೂ ಆಯ್ಕೆಯಾಗಿದ್ದಾರೆ.

ಕನ್ನಡತಿಯೊಬ್ಬರು ವಿದೇಶದಲ್ಲಿ ಸಂಸತ್‌ ಸದಸ್ಯೆಯಾಗಿ ಆಯ್ಕೆಯಾಗಿರೋದು ಹೆಮ್ಮೆಯ ಖುಷಿಯಾದರೆ ಸದ್ಯ ಚರಿಶ್ಮಾ ಕಳಿಯಾಂಡ ಅವರು ಇದೇ ವೇಳೆ ಮತ್ತೊಂದು ವಿಚಾರಕ್ಕೂ ಸುದ್ದಿಯಾಗಿದ್ದಾರೆ.

ಹೌದು.. ಚರಿಶ್ಮಾ ಅವರು ಆಸ್ಟ್ರೇಲಿಯಾ ಸಂಸತ್‌ ಸದಸ್ಯರಾಗಿ ಪ್ರಮಾಣ ವಚನ ಸ್ವೀಕಾರ ಮಾಡುವ ವೇಳೆ ತನ್ನ ಹುಟ್ಟೂರು ಕೊಡಗಿನ ಸಾಂಪ್ರದಾಯಿಕ ಉಡುಗೆಯನ್ನು ತೊಟ್ಟು ಬಂದಿರೋದು ಸಾಕಷ್ಟು ಸುದ್ದಿಯಾಗಿದೆ.

ಮೂಲತಃ ಮಡಿಕೇರಿ ತಾಲೂಕಿನ ನಾಪೋಕ್ಲು ಗ್ರಾಮದ ಕಲಿಯಂಡ ಚರಿಷ್ಮಾ ಆಸ್ಟ್ರೇಲಿಯಾದ ಲಿವರ್ ಪೂಲ್ ಕ್ಷೇತ್ರದಿಂದ ಸ್ಪರ್ಧಿಸಿ ಸಂಸತ್ ಸದಸ್ಯೆಯಾಗಿ ಆಯ್ಕೆಯಾಗಿದ್ದಾರೆ.

ಕೊಡಗಿನ ಸಾಂಪ್ರದಾಯಿಕ ಉಡುಗೆಯನ್ನು ಧರಿಸಿ ಪ್ರಮಾಣ ವಚನ ಸ್ವೀಕಾರ ಮಾಡಿರೋದು ಇದೀಗ ಕೊಡಗಿನ ಪ್ರಜೆಗಳಲ್ಲಿ ಖುಷಿ ತರಿಸಿದೆ.

ಚರಿಶ್ಮಾ ಕಳಿಯಾಂಡ ಅವರು ಕೊಡಗಿನ ಶೈಲಿಯ ಸೀರೆ ಧರಿಸಿ ಪ್ರಮಾಣ ವಚನಕ್ಕೆ ಸಂಸತ್‌ಗೆ ಬಂದು ಸಹಿ ಹಾಕುತ್ತಿರುವ ಫೋಟೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.

ಸಂಸತ್‌ ಸದಸ್ಯರಾದ ನಂತರ ನಿನ್ನೆ ಸಾಮಾಜಿಕ ಜಾಲತಾಣದಲ್ಲಿ ಒಂದು ಪೋಸ್ಟ್‌ ಮಾಡಿರುವ ಚರಿಶ್ಮಾ, ‘ನಿನ್ನೆ ನಾನು 58ನೇ ಸಂಸತ್ತಿನ ಮೊದಲ ಪ್ರಶ್ನೋತ್ತರ ಅವಧಿಯಲ್ಲಿ ನನ್ನ ಮೊದಲ ಪ್ರಶ್ನೆಯನ್ನು ಕೇಳಿದೆ’ ಎಂದಿದ್ದಾರೆ.

ಅಲ್ಲದೇ ‘ಯಾವುದೇ ಸರ್ಕಾರಿ ಸಂಸ್ಥೆಗಳ ಖಾಸಗೀಕರಣವು ಜನ ಸಮುದಾಯದ ಮೇಲೆ ಪರಿಣಾಮ ಬೀರುತ್ತದೆ. ಖಾಸಗೀಕರಣ ನಮ್ಮ ರಾಜ್ಯದ (ಎನ್‌ಎಸ್‌ಡಬ್ಲ್ಯೂ) ಹಿತಾಸಕ್ತಿಗೆ ಒಳ್ಳೆಯದಲ್ಲ’ ಎಂದು ಸಂಸತ್‌ನಲ್ಲಿ ಖಾಸಗೀಕರಣ ವಿರುದ್ಧ ಚರಿಶ್ಮಾ ಮಾತನಾಡಿದ್ದಾರೆ.

‘ಖಾಸಗೀಕರಣವನ್ನು ತಕ್ಷಣವೇ ನಿಲ್ಲಿಸುವ ನನ್ನ ಭರವಸೆಯನ್ನು ಉಳಿಸಿಕೊಳ್ಳುವ ನಿಟ್ಟಿನಲ್ಲಿ ಸರ್ಕಾರ ಯಾವ ರೀತಿಯ ಕ್ರಮ ಕೈಗೊಳ್ಳುತ್ತಿದೆ ಎಂದು ಪ್ರಧಾನಮಂತ್ರಿಯವರನ್ನು ಕೇಳಿದೆ’ ಎಂದು ಚರಿಶ್ಮಾ ಪೋಸ್ಟ್ ಮಾಡಿದ್ದಾರೆ.