Afghanistan Crisis| ಅಫ್ಘನ್​ನಲ್ಲಿ ಹಣಕಾಸಿನ ಕೊರತೆ; 100 ಬಿಲಿಯನ್ ನೋಟು ಮುದ್ರಣಕ್ಕೆ ಮುಂದಾದ ತಾಲಿಬಾನ್

ಅಫ್ಘಾನಿಸ್ತಾನವನ್ನು ತಾಲಿಬಾನ್ ಉಗ್ರರು ವಶಪಡಿಸಿಕೊಂಡ ನಂತರ ಅಫ್ಘಾನ್​ನಲ್ಲಿ ದೊಡ್ಡ ಮಟ್ಟದ ಹಣಕಾಸಿನ ಕೊರತೆ ಉಂಟಾಗಿದೆ. ಅಫ್ಘಾನ್​ನಲ್ಲಿ ಹಣದ ಓಡಾಟ ಕಡಿಮೆಯಾಗಿರುವ ಪರಿಣಾಮ ಎಲ್ಲಾ ವಸ್ತುಗಳ ಬೆಲೆಯೂ ಗಗನಕ್ಕೇರಿದೆ. ಹೀಗಾಗಿ ಅಫ್ಘಾನಿಸ್ತಾನ ಬ್ಯಾಂಕ್ (ಸೆಂಟ್ರಲ್ ಬ್ಯಾಂಕ್ ಆಫ್ ಅಫ್ಘಾನಿಸ್ತಾನ) ದೇಶದ ಹಣದ ಚಲಾವಣೆಗೆ ಹೊಸ ನೋಟುಗಳನ್ನು ಮುದ್ರಿಸಲು ಮುಂದಾಗಿದೆ.

ಮಾಹಿತಿಯ ಪ್ರಕಾರ ಕೇಂದ್ರೀಯ ಬ್ಯಾಂಕ್ ಅಧಿಕಾರಿಗಳಿಗೆ ಮಂಗಳವಾರ ಅಫ್ಘಾನ್ ಸಂಸತ್ತು 100 ಬಿಲಿಯನ್ ಅಫ್ಘಾನಿಸ್ (US $ 20 ಮಿಲಿಯನ್) ನೋಟು ಮುದ್ರಿಸಲು ಅನುಮತಿ ನೀಡಿದೆ ಎಂದು ತಿಳಿದುಬಂದಿದೆ.

ಸೆಂಟ್ರಲ್ ಬ್ಯಾಂಕಿನ ಅಧಿಕಾರಿಗಳ ಪ್ರಕಾರ, ಹೊಸ ನೋಟುಗಳು ಹೆಚ್ಚಿನ ಭದ್ರತಾ ಗುರುತುಗಳನ್ನು ಹೊಂದಿದ್ದು, ನಕಲಿ ನೋಟುಗಳ ಚಲಾವಣೆಗೆ ತಡೆ ಹಾಕಲು ಈ ಕ್ರಮ ತೆಗೆದುಕೊಳ್ಳಲಾಗಿದೆ ಎನ್ನಲಾಗುತ್ತಿದೆ.

"ನಾವು ನೋಟುಗಳನ್ನು ಭಾಗಶಃ ಮುದ್ರಿಸಿದ್ದೇವೆ ಮತ್ತು ಉಳಿದವು ಮುದ್ರಣದಲ್ಲಿದೆ. ಆದರೆ ಇದರರ್ಥ ನಾವು ಅಫ್ಘಾನಿಸ್ತಾನದ ಹಣದ ಚಲಾವಣೆಗೆ ಹೊಸ ನೋಟುಗಳನ್ನು ಸೇರಿಸುತ್ತಿದ್ದೇವೆ ಎಂದು ಅರ್ಥವಲ್ಲ" ಎಂದು ಅಫ್ಘಾನ್ ಸೆಂಟ್ರಲ್ ಬ್ಯಾಂಕ್ ಮುಖ್ಯಸ್ಥ ನೂರುಲ್ಲಾ ಡೆಲವಾರಿ ಹೇಳಿದ್ದಾರೆ.

ಮೊಹಮ್ಮದ್ ದೌದ್ ಖಾನ್ ಕಾಲದಲ್ಲಿ ರಷ್ಯಾದ ಕಂಪನಿ ಮುದ್ರಿಸಿದ ಅಫ್ಘಾನಿ ಬ್ಯಾಂಕ್ ನೋಟುಗಳನ್ನು ಈಗ ಬ್ರಿಟಿಷ್ ಕಂಪನಿ ಮುದ್ರಿಸಿದೆ. ಹೊಸ (100 ಬಿಲಿಯನ್) ನೋಟುಗಳ ಅಂದಾಜು ಮೊತ್ತ 20 ಮಿಲಿಯನ್ ಯುಎಸ್ ಡಾಲರ್ ಎಂದು ಹೇಳಲಾಗಿದೆ.

ಅಫ್ಘಾನಿ ಬ್ಯಾಂಕ್​ ನೋಟುಗಳನ್ನು ಪ್ರತಿ ಐದು ವರ್ಷಗಳಿಗೊಮ್ಮೆ ಮುದ್ರಿಸಲಾಗುತ್ತದೆ. ಹಿಂದೆ ನೋಟುಗಳು ವೇಗವಾಗಿ ಹಳೆಯದಾಗಿದ್ದವು ಆದರೆ ಈಗ ಅವು ಎಂಟು ವರ್ಷಗಳವರೆಗೆ ಬಾಳಿಕೆ ಬರುತ್ತವೆ ಎಂದು ಅಧಿಕಾರಿಗಳು ಹೇಳಿದ್ದಾರೆ.