ಬಲೆಗೆ ಬಿದ್ದ ಸೈಬರ್ ಕಳ್ಳರು: 17 ಯುವತಿಯರ ಬಳಿ 1275 ಸಿಮ್ ಕಾರ್ಡ್..!

ಬ್ಯಾಂಕ್ ಖಾತೆದಾರರಿಗೆ ಕರೆ ಮಾಡಿ ಡೆಬಿಟ್-ಕ್ರೆಡಿಟ್​ ಕಾರ್ಡ್​ ಒಟಿಪಿ ಸಂಖ್ಯೆಯನ್ನು ಪಡೆಯುತ್ತಿದ್ದ ಬೃಹತ್ ವಂಚಕರ ತಂಡವನ್ನು ಅಹಮದಾಬಾದ್ ಕ್ರೈಂ ಪೊಲೀಸರು ಬಂಧಿಸಿದ್ದಾರೆ.

ಈ ವಂಚನೆಗಾಗಿ ಕಾಲ್​ ಸೆಂಟರ್​ವೊಂದನ್ನು ನಡೆಸುತ್ತಿದ್ದ ಮ್ಯಾನೇಜರ್​ ಸೇರಿದಂತೆ ಹದಿನೇಳು ಯುವತಿಯರನ್ನು ಪೊಲೀಸರು ವಶಕ್ಕೆ ತೆಗೆದುಕೊಂಡಿದ್ದಾರೆ.

ದಾಳಿ ವೇಳೆ 326 ಕ್ರೆಡಿಟ್ ಕಾರ್ಡ್ ಮತ್ತು 336 ಡೆಬಿಟ್ ಕಾರ್ಡ್​ ಸೇರಿದಂತೆ ಇದೇ ಮೊದಲ ಬಾರಿಗೆ ಪೇಟಿಎಂ ಕಾರ್ಡ್​ಗಳು ಸಿಕ್ಕಿರುವುದಾಗಿ ಪೊಲೀಸರು ತಿಳಿಸಿದ್ದಾರೆ.

ಕೆಲ ವರ್ಷಗಳ ಹಿಂದೆ ಅಹಮದಾಬಾದ್​ನ ಸಾಫ್ಟ್​ವೇರ್ ಇಂಜಿನಿಯರ್ ಒಬ್ಬರ ಕಾರ್ಡ್​ ಒಟಿಪಿ ಪಡೆದುಕೊಂಡು ಸುಮಾರು 8 ಲಕ್ಷ ರೂ. ವಂಚಿಸಲಾಗಿತ್ತು. ಈ ಜಾಲವನ್ನು ಬೆನ್ನು ಹತ್ತಿದ್ದ ಪೊಲೀಸರಿಗೆ ಸೈಬರ್ ಕಳ್ಳರ ದೊಡ್ಡ ಗ್ಯಾಂಗ್ ಸಿಕ್ಕಿ ಬಿದ್ದಿದೆ.

 ಖಾತೆದಾರರಿಗೆ ಬ್ಯಾಂಕಿನಿಂದ ಕರೆ ಮಾಡುತ್ತಿರುವುದಾಗಿ ತಿಳಿಸುತ್ತಿದ್ದ ಈ ಯುವತಿಯರ ಗುಂಪು, ಬಳಿಕ ಡೆಬಿಟ್ ಮತ್ತು ಕ್ರೆಡಿಟ್ ಕಾರ್ಡ್​ನ ಸಂಪೂರ್ಣ ಮಾಹಿತಿಯನ್ನು ಪಡೆಯುತ್ತಿದ್ದರು. ಅಲ್ಲದೆ ಗ್ರಾಹಕನು ನೀಡುವ ಮಾಹಿತಿಯನ್ನು ಬಳಸಿ ಖಾತೆದಾರರನ ಅಕೌಂಟ್​ಗೆ ಕನ್ನ ಹಾಕಲಾಗುತ್ತಿತ್ತು.

ಈ ದಾಳಿ ವೇಳೆ ಬರೋಬ್ಬರಿ 1275 ಸಿಮ್ ಕಾರ್ಡ್​ಗಳನ್ನು ವಶ ಪಡಿಸಿಕೊಳ್ಳಲಾಗಿದ್ದು, ಸಿಮ್​ಗಳನ್ನು ಬದಲಾಯಿಸುತ್ತಾ ವಂಚನೆ ನಡೆಸಲಾಗುತ್ತಿತ್ತು ಎನ್ನಲಾಗಿದೆ.

ಈ ಆರೋಪಿಗಳನ್ನು ವಿಚಾರಣೆಗೆ ಒಳಪಡಿಸಿದಾಗ ಎಲ್ಲರಿಗೂ ಒಂದು ವಾರಗಳ  ಕಾಲ ತರಬೇತಿ ಒದಗಿಸಿದ್ದು, ತಿಂಗಳಿಗೆ 20 ರಿಂದ 25 ಸಾವಿರ ವೇತನ ನೀಡಲಾಗುತ್ತಿದೆ  ಎಂದು ತಿಳಿಸಿದ್ದಾರೆ. ಪ್ರತಿನಿತ್ಯ ಕರ್ನಾಟಕ ಸೇರಿದಂತೆ 15 ಕ್ಕೂ ಹೆಚ್ಚಿನ ರಾಜ್ಯಗಳ ಬ್ಯಾಂಕ್ ಖಾತೆದಾರರಿಗೆ ಕರೆ ಮಾಡುವ ಈ ತಂಡವು ಲಕ್ಷಾಂತರ ರೂಪಾಯಿಗಳನ್ನು ವಂಚಿಸಿದ್ದಾರೆ ಎಂದು ಪ್ರಾಥಮಿಕ ತನಿಖೆಯಿಂದ ತಿಳಿದು ಬಂದಿದೆ.

ಈ ಕಾಲ್​ ಸೆಂಟರ್​ನಲ್ಲಿ ಆಕ್ಸಿಸ್ ಬ್ಯಾಂಕಿಗೆ ಸಂಬಂಧಿಸಿದ ಡೇಟಾಗಳು ಕೂಡ ಸಿಕ್ಕಿದ್ದು, ಇದರ ಹಿಂದೆ ದೊಡ್ಡ ಜಾಲ ಇರುವುದಾಗಿ ಸೈಬರ್ ಕ್ರೈಮ್ ಅಧಿಕಾರಿಗಳು ತಿಳಿಸಿದ್ದಾರೆ. ಇಲ್ಲಿ ಸಿಕ್ಕಿರುವ ಲ್ಯಾಪ್​ಟಾಪ್​ ಮತ್ತು ಕಾರ್ಡ್​ಗಳನ್ನು ಪರೀಕ್ಷಿಸಲಾಗುತ್ತಿದೆ. ಅಶು ಮತ್ತು ಅಜರ್ ಎಂಬ ಇಬ್ಬರು ಈ ಯುವತಿಯರಿಗೆ ಡೇಟಾಗಳನ್ನು ಕಳುಹಿಸುತ್ತಿದ್ದರು ಎನ್ನಲಾಗಿದೆ. ಇದೀಗ ಪೊಲೀಸರು ಈ ಇಬ್ಬರು ವಂಚಕರ ಪತ್ತೆಗಾಗಿ ಬಲೆ ಬೀಸಿದ್ದು, ಆರೋಪಿಗಳ ಬಂಧನದ ನಂತರ ಸೈಬರ್ ಕಳ್ಳರ ಮತ್ತಷ್ಟು ಮಾಹಿತಿ ಹೊರ ಬೀಳುವ ಸಾಧ್ಯಯಿದೆ.