CAIT Protest: ನಿಷೇಧಿತ ರಾಸಾಯನಿಕ, ಡ್ರಗ್ಸ್​ ಮಾರಾಟ; ಅಮೆಜಾನ್​ ವಿರುದ್ಧ ದೇಶಾದ್ಯಂತ ಸಿಎಐಟಿ ಪ್ರತಿಭಟನೆ

ತನ್ನ​​ ಇ-ಕಾಮರ್ಸ್ ಪೋರ್ಟಲ್‌ನಲ್ಲಿ ಅಕ್ರಮ ವಸ್ತುಗಳನ್ನು ಮಾರಾಟ ಮಾಡಲಾಗುತ್ತಿದೆ ಎಂದು ಆರೋಪಿಸಿ ಅಮೆಜಾನ್ ವಿರುದ್ಧ CAIT ದೇಶಾದ್ಯಂತ ಸುಮಾರು 500 ಜಿಲ್ಲೆಗಳಲ್ಲಿ ಪ್ರತಿಭಟನೆ ನಡೆಸಿತು.

ನಿಷಿದ್ಧ ವಸ್ತುಗಳ ಮಾರಾಟಕ್ಕೆ ವೇದಿಕೆಯಾಗಿರುವ ಅಮೆಜಾನ್ ಮತ್ತು ಅದರ ಅಧಿಕಾರಿಗಳ ವಿರುದ್ಧ ದೇಶದ್ರೋಹದ ಪ್ರಕರಣ ದಾಖಲಿಸಬೇಕು ಎಂದು ಇದೇ ವೇಳೆ ಸಿಎಐಟಿ ಒತ್ತಾಯಿಸಿದೆ.

ಅಮೆಜಾನ್​ನಲ್ಲಿ ಗಾಂಜಾ ಮಾರಾಟ ಮಾಡಲಾಗುತ್ತಿತ್ತು ಎಂಬ ಗಂಭೀರ ಆರೋಪವೊಂದು ಈ ಹಿಂದೆ ಕೇಳಿಬಂದಿತ್ತು. ಭಾರತದಲ್ಲಿ ನಿಷೇಧವಿರುವ ವಸ್ತುಗಳು ಅಮೇಜಾನ್​ನಲ್ಲಿ ಸುಲಭವಾಗಿ ಸಿಗುತ್ತದೆ ಎಂಬ ಆರೋಪವನ್​ನು ಮಧ್ಯಪ್ರದೇಶ ಪೊಲೀಸರು ಪತ್ತೆ ಹಚ್ಚಿದ್ದರು.

ಇದರ ಜೊತೆಗೆ ಪುಲ್ವಾಮಾ ಬಾಂಬ್​ ದಾಳಿಯಲ್ಲಿ ಬಳಕೆಯಾದ ನಿಷೇಧಿತ ಸುಧಾರಿತ ಸ್ಫೋಟಕ ಸಾಧನಗಳನ್ನು ತಯಾರಿಸಲು ಬಳಸುವ ರಾಸಾಯನಿಕಗಳನ್ನು ಇದೇ ಅಮೇಜಾನ್ ​ಮೂಲಕವೇ ಭಯೋತ್ಪಾದಕರು ಪಡೆದುಕೊಂಡಿದ್ದರು ಎಂದು ಅಖಿಲ ಭಾರತ ವ್ಯಾಪಾರಿಗಳ ಒಕ್ಕೂಟ ಆರೋಪಿಸಿದೆ.

ಇನ್ನು ಜವಳಿ ಮತ್ತು ಪಾದರಕ್ಷೆ ಮೇಲೆ ಸರಕು ಮತ್ತು ಸೇವಾ ತೆರಿಗೆ ದರವನ್ನು ಶೇ. 5ರಿಂದ ಶೇ 10ರವರೆಗೆ ಏರಿಕೆ ಮಾಡಿರುವ ನಿರ್ಧಾರವನ್ನು ಇದೇ ವೇಳೆ ಸಿಎಐಟಿ ವಿರೋಧಿಸಿತು

ಝಾನ್ಸಿ, ಪ್ರಯಾಗ್​ ರಾಜ್​, ವಾರಾಣಸಿ, ಭೋಪಾಲ್​, ಲಕ್ನೋ, ಇಂದೋರ್​ ಕಾನ್ಪುರ್​ ಗ್ವಾಲಿಯರ್​ ಸೇರಿದಂತೆ ದೇಶದ ವಿವಿಧ ಜಿಲ್ಲೆಗಳಲ್ಲಿ ಸಿಎಐಟಿ ಸದಸ್ಯರು ಪ್ರತಿಭಟನೆ ನಡೆಸಿದರು