ATM Baba: ಎಟಿಎಂ ದರೋಡೆ ಮಾಡೋದಕ್ಕೆ ಟ್ರೈನಿಂಗ್, 15 ನಿಮಿಷದಲ್ಲೇ ಕಳ್ಳತನ ತರಬೇತಿ! ನಿರುದ್ಯೋಗಿಗಳೇ ಈತನ ಟಾರ್ಗೆಟ್

ಹಲವು ಯುವಕರಿಗೆ ದರೋಡೆ ಕಲೆಯಲ್ಲಿ ತರಬೇತಿ ನೀಡಿ ಕಳ್ಳತನ ಮಾಡುವುದನ್ನೇ ಉದ್ಯೋಗವಾಗಿ ಆರಿಸಿಕೊಳ್ಳಲು ನೆರವಾಗುತ್ತಿದ್ದ ಬಿಹಾರ ಬಾಬಾ ಬಂಧನ ಪ್ರಕರಣ ದೇಶಾದ್ಯಂತ ಸಂಚಲನ ಮೂಡಿಸಿದೆ. ಬಿಹಾರದ ಛಾಪ್ರಾ ಪಟ್ಟಣದಲ್ಲಿ ನಿರುದ್ಯೋಗಿ ಯುವಕರಿಗೆ ಕೇವಲ 15 ನಿಮಿಷಗಳಲ್ಲಿ ಎಟಿಎಂ ಒಡೆಯುವುದು ಹೇಗೆಂದು ಕಲಿಯಲು ಎಟಿಎಂ ಬಾಬಾ ತರಬೇತಿ ನೀಡುತ್ತಿದ್ದ ಎಂದು ತಿಳಿದುಬಂದಿದೆ.

ಇತ್ತೀಚೆಗೆ ಉತ್ತರ ಪ್ರದೇಶದ ಲಕ್ನೋದಲ್ಲಿ ನಡೆದ ಎಟಿಎಂ ದರೋಡೆಯಲ್ಲಿ ಪತ್ತೆಯಾದ ಹಲವಾರು ಶಂಕಿತರನ್ನು ಪೊಲೀಸರು ವಿಚಾರಣೆ ನಡೆಸಿದ್ದಾರೆ. ಆ ವೇಳೆ ಈ ಸುಧೀರ್ ಮಿಶ್ರಾ ಹೆಸರು ಕೇಳಿ ಬಂದಿದೆ. ಪೊಲೀಸರ ಪ್ರಕಾರ, ಬಿಹಾರದ ಛಾಪ್ರಾ ನಿವಾಸಿ ಸುಧೀರ್ ಮಿಶ್ರಾ ಎಟಿಎಂ ಬಾಬಾ ಎಂಬ ಹೆಸರಿನಿಂದ ಪರಿಚಿತರಾಗಿದ್ದಾರೆ. ನಿರುದ್ಯೋಗಿ ಯುವಕರನ್ನು ತನ್ನ ಗ್ಯಾಂಗ್‌ಗೆ ಸೇರಿಸಿಕೊಂಡು ಎಟಿಎಂ ಒಡೆಯುವ ತರಬೇತಿ ನೀಡುತ್ತಿದ್ದ ಎನ್ನಲಾಗಿದೆ.

ಇತ್ತೀಚೆಗೆ ಲಕ್ನೋದಲ್ಲಿ ಆರೋಪಿಗಳು ಎಸ್​ಬಿಐ ಎಟಿಎಂ ಮಷಿನ್ ಒಡೆದು ಕೇವಲ 16 ನಿಮಿಷದಲ್ಲಿ 39.58 ಲಕ್ಷ ರೂಪಾಯಿಯನ್ನು ಕಳ್ಳತನ ಮಾಡಿರುವುದು ಬೆಳಕಿಗೆ ಬಂದಿತ್ತು. ಈ ಪ್ರಕರಣದಲ್ಲಿ ಮಿಶ್ರಾ ಅಲಿಯಾಸ್ ಎಟಿಎಂ ಬಾಬಾ ಸಂಪೂರ್ಣ ಕಳ್ಳತನವನ್ನು ಮಾಸ್ಟರ್ ಪ್ಲಾನರ್ ಆಗಿದ್ದ ಎಂಬುದು ತನಿಖೆ ವೇಳೆ ತಿಳಿದುಬಂದಿದೆ.

ನಾಲ್ವರು ದುಷ್ಕರ್ಮಿಗಳ ಗುಂಪು ಲಕ್ನೋದ ಸುಲ್ತಾನ್‌ಪುರ ರಸ್ತೆ ಪ್ರದೇಶದಲ್ಲಿ ಎಟಿಎಂ ಮಿಷನ್ ಅನ್ನು ಯಶಸ್ವಿಯಾಗಿ ದರೋಡೆ ಮಾಡಿತ್ತು. ಅಪರಾಧ ವಿಭಾಗದ ಜಂಟಿ ಪೊಲೀಸ್ ಕಮಿಷನರ್ ನೀಲಾಬ್ಜಾ ಚೌಧರಿ ಅವರು ತನಿಖೆ ನಡೆಸಿದ್ದು, ಸುಧೀರ್ ಮಿಶ್ರಾ ತನ್ನ ಆತ್ಮೀಯ ಸ್ನೇಹಿತ ನೀರಜ್ ಮಿಶ್ರಾನ ಮುಂದಾಳತ್ವದಲ್ಲಿ ಕಳ್ಳತನ ಮಾಡಿಸಿರುವುದು ಪತ್ತೆಯಾಗಿದೆ.

ಎಟಿಎಂ ಒಡೆಯುವ ಜವಾಬ್ದಾರಿಯನ್ನು ಎಟಿಎಂ ಬಾಬಾ ತನ್ನ ಆತ್ಮೀಯ ಸ್ನೇಹಿತ ನೀರಜ್ ಮಿಶ್ರಾ ಅವರಿಗೆ ವಹಿಸಿದ್ದ. ನೀರಜ್ ಇತರ 3 ಜನರೊಂದಿಗೆ ಲಕ್ನೋದ ಅರ್ಜುನ್‌ಗಂಜ್ ಖುರ್ದಾಹಿ ಬಜಾರ್ ಸುಲ್ತಾನ್‌ಪುರ ರಸ್ತೆಯಲ್ಲಿರುವ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾಕ್ಕೆ ನುಗ್ಗಿದ್ದಾರೆ. ಎಟಿಎಂಗೆ ಟಾರ್ಗೆಟ್ ಮಾಡಿ ಹಾನಿ ಮಾಡಿ ಎಟಿಎಂನಲ್ಲಿದ್ದ ಹಣ ಕಳ್ಳತನ ಮಾಡಿದ್ದಾರೆ.

ಎಟಿಎಂ ದರೋಡೆಗೆ ಮುನ್ನ ಇಬ್ಬರು ಆರೋಪಿಗಳಾದ ದೇವಶ್ ಪಾಂಡೆ ಮತ್ತು ವಿಜಯ್ ಪಾಂಡೆ ಈ ಪ್ರದೇಶದಲ್ಲಿ ಕಣ್ಗಾವಲಾಗಿದ್ದರು. ಎಟಿಎಂ ಕತ್ತರಿಸಲು ಹರಿಯಾಣದ ಮೇವಾತ್‌ನಿಂದ ನಾಲ್ವರು ದರೋಡೆಕೋರರನ್ನು ಕರೆಸಲಾಗಿತ್ತು ಎಂದು ಪೊಲೀಸ್ ತನಿಖೆಯಿಂದ ತಿಳಿದುಬಂದಿದೆ. ಎಟಿಎಂ ದರೋಡೆಯ ಸಮಯದಲ್ಲಿ ಎಟಿಎಂ ಬಾಬಾ ಬಿಹಾರದಲ್ಲಿದ್ದುಕೊಂಡೆ ಮೊಬೈಲ್ ಫೋನ್ ಮೂಲಕ ಇತರ ಶಂಕಿತರೊಂದಿಗೆ ನಿರಂತರವಾಗಿ ಸೂಚನೆ ನೀಡುತ್ತಿದ್ದ ಎಂದು ತಿಳಿದುಬಂದಿದೆ.

ಎಟಿಎಂ ಯಂತ್ರವನ್ನು ಕತ್ತರಿಸಲು ಕಳ್ಳರು ಮೂರು ಗ್ಯಾಸ್ ಪೈಪ್, ಸಿಲಿಂಡರ್ ರೆಗ್ಯುಲೇಟರ್, ಗ್ಯಾಸ್ ಮೀಟರ್, ಆರು ಆ್ಯಕ್ಷನ್​ ಬ್ಲೇಡ್, ಎರಡು ಕಟಿಂಗ್ ಪ್ಲೈಯರ್ ಮತ್ತು ಸುತ್ತಿಗೆ ಬಳಸಿದ್ದಾರೆ. ಆರೋಪಿಗಳಿಗೆ ಎಟಿಎಂ ಬಾಬಾ ಸುಧೀರ್ ಮಿಶ್ರಾ ಕಳ್ಳತನ ಮಾಡಲು ತರಬೇತಿ ನೀಡಿದ್ದ. ಎಟಿಎಂ ಯಂತ್ರದಲ್ಲಿರುವ ಸಿಸಿಟಿವಿ ಕ್ಯಾಮೆರಾಗೆ ಸಿಕ್ಕಿಬೀಳುವುದನ್ನು ತಪ್ಪಿಸಿಕೊಳ್ಳಲು ಮುಖಕ್ಕೆ ಇಂಕು ಹಾಕಿಕೊಳ್ಳುವುದು. ಎಟಿಎಂ ಹೊರಗೆ ಇಬ್ಬರನ್ನು ನಿಲ್ಲಿಸಿ ಯಾರಾದರೂ ಬರುತ್ತಾರಾ ಎನ್ನುವುದನ್ನು ಗಮನಿಸುವುದು, ನಂತರ ಕೇವಲ 15-16 ನಿಮಿಷದಲ್ಲಿ ಆರೋಪಿಗಳು ಎಟಿಎಂ ಒಡೆದು ಹಣವನ್ನು ತರುವುದರ ಬಗ್ಗೆ ಸಂಪೂರ್ಣ ತರಬೇತಿ ನೀಡಿದ್ದ ಎಂದು ತಿಳಿದುಬಂದಿದೆ. ಕಳ್ಳರಿಂದ 9 ಲಕ್ಷವನ್ನು ವಶಪಡಿಸಿಕೊಳ್ಳಲಾಗಿದೆ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.