Beer Bus: ಮದ್ಯಪ್ರಿಯರಿಗೆ ಗುಡ್​ ನ್ಯೂಸ್! ಈ ಬಸ್​ನಲ್ಲಿ ಪ್ರಯಾಣಿಸಿದರೆ 120 ನಿಮಿಷಗಳ ಕಾಲ ಅನ್​ಲಿಮಿಟೆಡ್​ ಬಿಯರ್​ ಫ್ರೀ!

ಬೇಸಿಗೆಯಲ್ಲಿ ಬೀಚ್​ಗಳಂತರಹ ಸ್ಥಳಗಳಿಗೆ ಪ್ರವಾಸಿಗರ ಸಂಖ್ಯೆ ಹೆಚ್ಚಿರುತ್ತದೆ. ಇದೇ ಕಾರಣದಿಂದ ಹಲವಾರು ರಾಜ್ಯಗಳಲ್ಲಿ ಪ್ರವಾಸೋದ್ಯಮವನ್ನು ಉತ್ತೇಜಿಸಲು ವಿಶೇಷ ಸೌಲಭ್ಯಗಳನ್ನುಅಲ್ಲಿನ ಸರ್ಕಾರಗಳು ಘೋಷಿಸುತ್ತಿವೆ.

ಕೇಂದ್ರಾಡಳಿತ ಪ್ರದೇಶ ಪುದುಚೇರಿ ಕೂಡ ದೇಶದ ಪ್ರವಾಸಿತಾಣಗಳಲ್ಲಿ ಒಂದಾಗಿದೆ. ಪುದುಚೇರಿ ಹೆಚ್ಚು ಯುವಕರನ್ನು ಆಕರ್ಷಿಸುವ ಪ್ರವಾಸಿ ತಾಣವಾಗಿರುವುದರಿಂದ  ಕ್ಯಾಟಮರನ್ ಬ್ರೂಯಿಂಗ್ ಕಂಪನಿ (Catamaran Brewing Company) ಮದ್ಯ ಸೇವಿಸುವವರನ್ನು ಆಕರ್ಷಿಸಲು ಬಿಯರ್‌ ಬಸ್‌ ಪರಿಚಯಿಸಲು ನಿರ್ಧರಿಸಿದೆ.

ಪ್ರಸ್ತುತ ಈ ಸೇವೆ ಚೆನ್ನೈ ಟು ಪುದುಚೇರಿಗೆ ಮಾತ್ರ ಒದಗಿಸಲಾಗುತ್ತಿದೆ. ವಾರಾಂತ್ಯದಲ್ಲಿ ಚೆನ್ನೈನಿಂದ ಪುದುಚೇರಿಗೆ ಒಂದು ದಿನದ ಪ್ಯಾಕೇಜ್ ಟ್ರಿಪ್​ ಆಗಿದೆ. ಕ್ಯಾಟಮರನ್ ಬ್ರೂಯಿಂಗ್ ಕಂಪನಿ ಏಪ್ರಿಲ್​ 22ರಂದು ಹಾಪ್ ಆನ್ ಬ್ರೀವರಿ ಟೂರ್‌ ಬಸ್ ಅಥವಾ ಬಿಯರ್ ಬಸ್ ಅನ್ನು ಪರಿಚಯಿಸಲು ಸಿದ್ಧವಾಗಿದೆ. ಇದು ವಾರಾಂತ್ಯದಲ್ಲಿ ಚೆನ್ನೈನಿಂದ ಪುದುಚೇರಿಗೆ ಒಂದು ದಿನದ ಪ್ಯಾಕೇಜ್ ಆಗಿದೆ.

ಕಂಪನಿಯು ತಮ್ಮ ಮೈಕ್ರೊ ಬ್ರೂವರಿ ಬಿಯರ್ ರುಚಿಯೊಂದಿಗೆ  ಪ್ರವಾಸದ ಸೌಲಭ್ಯವನ್ನು ಒದಗಿಸುತ್ತದೆ. ಈ ವೇಳೆ 120 ನಿಮಿಷಗಳ ಅನ್​ಲಿಮಿಟೆಡ್​ ಬಿಯರ್‌ ಸೇವೆ ಮತ್ತು ರುಚಿಕರವಾದ ಮೂರು ಬಗೆಯ ಊಟವನ್ನು​ ಒದಗಿಸುತ್ತದೆ ಎಂದು ಕಂಪನಿಯ ಪಾಲುದಾರ ರಂಗರಾಜು ನಾರಾಯಣಸಾಮಿ ಹೇಳಿದ್ದಾರೆ.

ಇದೇ ವೇಳೆ ಪ್ರವಾಸಿಗರನ್ನು ಅವರ ಆಯ್ಕೆಯ ಆಧಾರದ ಮೇಲೆ ಕೇಂದ್ರಾಡಳಿತ ಪ್ರದೇಶದ ಒಂದು ಅಥವಾ ಎರಡು ಜನಪ್ರಿಯ ಸ್ಥಳಗಳಿಗೆ ಕರೆದೊಯ್ಯಲಾಗುತ್ತದೆ ಎಂದು ಅವರು ತಿಳಿಸಿದ್ದಾರೆ.

ಈ ಬಿಯರ್​ ಬಸ್ ಶನಿವಾರ ಮತ್ತು ಭಾನುವಾರ ಮಾತ್ರ ಕಾರ್ಯನಿರ್ವಹಿಸಲಿದೆ. 35ರಿಂದ 40 ಪ್ರವಾಸಿಗರ ಗುಂಪನ್ನು ಚೆನ್ನೈನ ಒಂದು ಪಾಯಿಂಟ್‌ನಿಂದ ಬೆಳಗ್ಗೆ 10.30 ಗಂಟೆಗೆ ಪಿಕಪ್ ಮಾಡಿ ಅದೇ ದಿನ ರಾತ್ರಿ 9 ಗಂಟೆಗೆ ಚೆನ್ನೈ ತಂದು ಬಿಡಲಾಗುತ್ತದೆ.

ಸರ್ಕಾರಿ ನಿಯಮಗಳು ಅನುಮತಿಸದ ಕಾರಣ ಬಸ್‌ ಪ್ರಯಾಣದ ವೇಳೆ ಬಿಯರ್ ನೀಡಲಾಗುವುದಿಲ್ಲ. ಆದರೆ ಪುದುಚೇರಿಯಲ್ಲಿರುವ ಬ್ರೀವರಿಯಲ್ಲಿ (ಬಿಯರ್​ ತಯಾರಾಗುವ ಸ್ಥಳ) ನೀಡಲಾಗುವುದು ಎಂದು ಸಂಸ್ಥೆ ಖಚಿತಪಡಿಸಿದೆ.

ಇನ್ನು ಪ್ರವಾಸಿಗರನ್ನು ಎಸಿ ವೋಲ್ವೋ ಬಸ್‌ನಲ್ಲಿ 35-40 ಪ್ರವಾಸಿಗರನ್ನು ಗುಂಪಾಗಿ ಸಾಗಿಸಲು ಕಂಪನಿಯು ಐಷಾರಾಮಿ ಬಸ್ ಆಪರೇಟರ್​ಗಳೊಂದಿಗೆ ಒಪ್ಪಂದ ಮಾಡಿಕೊಂಡಿದೆ. ಐಟಿ ವೃತ್ತಿಪರರು ಮತ್ತು ಎಂಎನ್‌ಸಿ ಉದ್ಯೋಗಿಗಳು ಕಂಪನಿಯ ಪ್ರಮುಖ ಟಾರ್ಗೆಟ್‌ ಆಗಿದೆ. ಬಿಯರ್‌ ಪ್ರೇಮಿಗಳು, ಕುಡಿಯದವರು ಹಾಗೂ ಮಕ್ಕಳೊಂದಿಗೆ ಹೋಗುವ ವಯಸ್ಕರಿಗೆ ಪ್ರತ್ಯೇಕ ದರಗಳನ್ನು ನಿಗದಿಪಡಿಸಿದೆ.

ವೀಕೆಂಡ್​ನಲ್ಲಿನ ಪ್ರತಿಕ್ರಿಯೆಯ ಆಧಾರದ ಮೇಲೆ, ರಜಾ ದಿನಗಳು ಹಾಗೂ ವಾರದ ಮಧ್ಯದ ದಿನಗಳಲ್ಲಿ ಈ ಯೋಜನೆಯನ್ನು ವಿಸ್ತರಿಸಲು ನಿರ್ಧರಿಸಲಾಗಿದೆ. ಅಲ್ಲದೆ, ಬೆಂಗಳೂರಿನಂತಹ ಇತರ ನಗರಗಳಿಂದಲೂ ಭವಿಷ್ಯದಲ್ಲಿ ಬಿಯರ್​ ಬಸ್​ ಆರಂಭಿಸುವ ಬಗ್ಗೆಯೂ ಯೋಜನೆ ಪ್ರಗತಿಯಲ್ಲಿದೆ ಎಂದು ರಂಗರಾಜು ಹೇಳಿದ್ದಾರೆ.