Ayodhya Ram Mandir: ರಾಮಮಂದಿರ ಉದ್ಘಾಟನೆಗೆ ಡೇಟ್ ಫಿಕ್ಸ್! ಅಯೋಧ್ಯೆಯಲ್ಲಿ ಭಕ್ತರು ಶ್ರೀರಾಮನ ದರ್ಶನ ಪಡೆಯುವುದು ಯಾವಾಗ?

ಅಯೋಧ್ಯೆಯಲ್ಲಿ ನಿರ್ಮಾಣವಾಗುತ್ತಿರುವ ಶ್ರೀರಾಮ ಮಂದಿರವನ್ನು 2024ರ ಜನವರಿಯಲ್ಲಿ ತೆರೆಯಲಾಗುತ್ತದೆ ಎಂದು ಕೇಂದ್ರ ಗೃಹ ಸಚಿವ ಅಮಿತ್ ಶಾ ಈ ಹಿಂದೆ ತಿಳಿಸಿದ್ದರು. ಇದೀಗ ಶ್ರೀರಾಮ ಜನ್ಮಭೂಮಿ ತೀರ್ಥ ಕ್ಷೇತ್ರ ಟ್ರಸ್ಟ್ ಕೂಡ ಜನವರಿಯಲ್ಲಿ ವಿಶ್ವ ವಿಖ್ಯಾತ ರಾಮ ಮಂದಿರದ ಉದ್ಘಾಟನೆಯಾಗಲಿದೆ ಎಂದು ಖಚಿತಪಡಿಸಿದೆ.

ನವೆಂಬರ್ 9, 2019 ರಾಮ್ ನಗರಿ ಅಯೋಧ್ಯೆಗೆ ಅತ್ಯಂತ ಪ್ರಮುಖ ದಿನವಾಗಿತ್ತು. ಆ ದಿನ ಇಡೀ ಜಗತ್ತಿನ ಕಣ್ಣುಗಳು ಧಾರ್ಮಿಕ ನಗರಿ ಅಯೋಧ್ಯೆಯತ್ತ ನೆಟ್ಟಿದ್ದವು. ದೀರ್ಘಕಾಲದ ರಾಮಮಂದಿರ ಮತ್ತು ಬಾಬರಿ ಮಸೀದಿ ವಿವಾದದ ಬಗ್ಗೆ ಸುಪ್ರೀಂ ಕೋರ್ಟ್ ತನ್ನ ತೀರ್ಪನ್ನು ನೀಡಿತ್ತು. ಆ ದಿನ, ಸುಪ್ರೀಂ ಕೋರ್ಟ್‌ನ ತೀರ್ಪು ರಾಮ ಮಂದಿರದ ಪರವಾಗಿ ಬಂದಿತು ಮತ್ತು ನಂತರ ಅಯೋಧ್ಯೆಯಲ್ಲಿ ಭವ್ಯವಾದ ರಾಮಮಂದಿರದ ನಿರ್ಮಾಣ ಕಾರ್ಯವು ತ್ವರಿತ ಗತಿಯಲ್ಲಿ ಪ್ರಾರಂಭವಾಗಿತ್ತು.

ಈಗ ದೇವಾಲಯವು ತನ್ನ ಅದ್ಭುತ ಆಕಾರವನ್ನು ಪಡೆಯುತ್ತಿದೆ. ಶ್ರೀರಾಮ ಕೆಲವೇ ತಿಂಗಳುಗಳಲ್ಲಿ ಗರ್ಭಗುಡಿಯನ್ನ ಅಲಂಕರಿಸಲಿದ್ದಾನೆ. ಇದಕ್ಕಾಗಿ ಶ್ರೀರಾಮ ಜನ್ಮಭೂಮಿ ತೀರ್ಥ ಕ್ಷೇತ್ರ ಟ್ರಸ್ಟ್ ಯುದ್ಧೋಪಾದಿಯಲ್ಲಿ ಶ್ರೀರಾಮನ ಬದುಕನ್ನು ಅನಾವರಣಗೊಳಿಸಲು ಸಿದ್ಧತೆ ಆರಂಭಿಸಿದೆ.

ಭಗವಾನ್ ಶ್ರೀರಾಮನ ದೇವಾಲಯವು ರೂಪುಗೊಳ್ಳುತ್ತಿದ್ದಂತೆ, ಕೋಟ್ಯಂತರ ರಾಮಭಕ್ತರಲ್ಲಿಯೂ ಉತ್ಸಾಹ ಕಂಡುಬರುತ್ತಿದೆ. 2024 ರ ಜನವರಿಯಲ್ಲಿ ಭಗವಾನ್ ರಾಮನು ತನ್ನ ಮಹಾ ಗರ್ಭಗುಡಿಯಲ್ಲಿ ಕುಳಿತುಕೊಳ್ಳುವುದನ್ನು ಕೋಟ್ಯಂತರ ಭಕ್ತರು ಕಣ್ತುಂಬಿಕೊಳ್ಳಬಹುದಾಗಿದೆ.

ಶ್ರೀ ರಾಮ ಜನ್ಮಭೂಮಿ ತೀರ್ಥ ಕ್ಷೇತ್ರ ಟ್ರಸ್ಟ್‌ನ ಖಜಾಂಚಿ ಗೋವಿಂದ್ ದೇವ್ ಗಿರಿ ಅವರ ಪ್ರಕಾರ, ಜನವರಿ 15 ರಿಂದ ಜನವರಿ 25 ರ ನಡುವಿನ ಶುಭ ಸಮಯದಲ್ಲಿ ಭಗವಾನ್ ಶ್ರೀರಾಮನು ತನ್ನ ಗರ್ಭಗುಡಿಯಲ್ಲಿ ಅಲಂಕೃತನಾಗುತ್ತಾನೆ. ಆದರೆ, ತೀರ್ಥ ಕ್ಷೇತ್ರ ಟ್ರಸ್ಟ್ ಇನ್ನೂ ನಿಖರವಾದ ದಿನಾಂಕವನ್ನು ಪ್ರಕಟಿಸಿಲ್ಲ.

ಈಗಾಗಲೇ ಅಯೋಧ್ಯೆ ಪ್ರವಾಸಿತಾಣವಂತಾಗಿದ್ದು, ಸಾವಿರಾರು ಭಕ್ತರು ಆಗಮಿಸಿ ದೇವಾಲಯದ ನಿರ್ಮಾಣ ಕಾರ್ಯಕ್ರಮವನ್ನು ಕಣ್ತುಂಬಿಕೊಳ್ಳುತ್ತಿದ್ದಾರೆ. ರಾಮಭಕ್ತೆ ಅಂಜಲಿ ಎಂಬುವವರು, ಮಾಧ್ಯಮದೊಂದಿಗೆ ಮಾತನಾಡಿ ರಾಮಲಲ್ಲಾನನ್ನು ನೋಡುವುದು ತುಂಬಾ ಸಂತೋಷವಾಗಿದೆ. ಅಯೋಧ್ಯೆಯ ನೋಟ ಅದ್ಭುತವಾಗಿದೆ. ಅಂತಹ ದೃಷ್ಟಿಕೋನವು ಬೇರೆ ಕಡೆ ಸಿಗುತ್ತದೆ ಎಂದು ನಾವು ಭಾವಿಸುವುದಿಲ್ಲ. ಹಲವು ವರ್ಷಗಳ ನಂತರ ಅಯೋಧ್ಯೆಯಲ್ಲಿ ದೇಗುಲ ನಿರ್ಮಾಣವಾಗುತ್ತಿದ್ದು, ಜನರಲ್ಲಿ ಉತ್ಸಾಹ ಮೂಡಿದೆ ಎಂದು ತಿಳಿಸಿದ್ದಾರೆ.

ಅಯೋಧ್ಯೆ ಮಾತ್ರವಲ್ಲದೆ ಪ್ರಪಂಚದಾದ್ಯಂತ ಜನರು ಉತ್ಸುಕರಾಗಿದ್ದಾರೆ. ಶ್ರೀರಾಮನು ಇಡೀ ಜಗತ್ತಿಗೆ ಸೇರಿದವನು. ಇದಕ್ಕಾಗಿ ಅನೇಕ ಜನರು ತಮ್ಮ ಪ್ರಾಣವನ್ನು ತ್ಯಾಗ ಮಾಡಿದ್ದಾರೆ, ಆದರೆ ಭವ್ಯವಾದ ಮತ್ತು ದೈವಿಕ ದೇವಾಲಯದಲ್ಲಿ ರಾಮಲಲ್ಲಾ ಕುಳಿತಿರುವುದನ್ನು ನೋಡುವ ಭಾಗ್ಯ ಅವರಿಗೆ ಸಿಗಲಿಲ್ಲ. ಖಂಡಿತವಾಗಿಯೂ ನಾವೆಲ್ಲರೂ ಅದೃಷ್ಟವಂತರು ಎಂದು ಆಯೋಧ್ಯೆಯ ಸರಯೂ ಆರತಿ ಸ್ಥಳದ ಅಧ್ಯಕ್ಷ ಶಶಿಕಾಂತ್ ದಾಸ್ ತಿಳಿಸಿದ್ದಾರೆ.