Assam Flood: ನೆರೆಯಿಂದ ಜನಜೀವನ ಅಸ್ತವ್ಯಸ್ತ! ರೈಲ್ವೇ ಹಳಿಯಲ್ಲಿ ಬದುಕುತ್ತಿವೆ 500 ಕುಟುಂಬ

ಅಸ್ಸಾಂನಲ್ಲಿ ಪ್ರವಾಹದಿಂದಾಗಿ ಲಕ್ಷಾಂತರ ಜನರು ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಕಳೆದ ಕೆಲವು ದಿನಗಳಿಂದ ಎಡೆಬಿಡದೆ ಸುರಿಯುತ್ತಿರುವ ಮಳೆಯಿಂದಾಗಿ ರಾಜ್ಯದಲ್ಲಿ ಪ್ರವಾಹ ಮತ್ತು ಭೂಕುಸಿತ ಆರಂಭವಾಗಿದೆ.

ಜನರನ್ನು ಸುರಕ್ಷಿತ ಸ್ಥಳಕ್ಕೆ ತಲುಪಿಸಲು ಸರ್ಕಾರ ಪ್ರಯತ್ನಿಸುತ್ತಿದೆ. ಇಲ್ಲಿಯವರೆಗೆ 14 ಮಂದಿ ಪ್ರಾಣ ಕಳೆದುಕೊಂಡಿದ್ದಾರೆ. ಜನರನ್ನು ಪರಿಹಾರ ಶಿಬಿರಗಳಿಗೆ ಕರೆದೊಯ್ಯಲಾಗುತ್ತಿದೆ.

ಜಮುನಾಮುಖ ಜಿಲ್ಲೆಯ ಎರಡು ಗ್ರಾಮಗಳ ಸುಮಾರು 500 ಕುಟುಂಬಗಳು ರೈಲು ಮಾರ್ಗದಲ್ಲಿ ರಾತ್ರಿ ಕಳೆಯಬೇಕಾದ ಅನಿವಾರ್ಯತೆ ಎದುರಾಗಿದೆ. ಅದು ಪ್ರದೇಶದ ಅತಿ ಎತ್ತರದ ಸ್ಥಳವಾಗಿದೆ. ಈ ಭಾಗದ ರೈಲು ಮಾರ್ಗ ಇನ್ನೂ ಜಲಾವೃತಗೊಂಡಿಲ್ಲ.

ಅಸ್ಸಾಂನಲ್ಲಿ ಪರಿಸ್ಥಿತಿ ಇನ್ನೂ ಚಿಂತಾಜನಕವಾಗಿದೆ. ಸತತ ಮಳೆಯಿಂದ 29 ಜಿಲ್ಲೆಗಳ 2565 ಗ್ರಾಮಗಳ 6 ಲಕ್ಷಕ್ಕೂ ಹೆಚ್ಚು ಜನರು ಸಂಕಷ್ಟಕ್ಕೆ ಸಿಲುಕಿದ್ದಾರೆ.

ಚಾಂಗ್ಜುರೈ ಮತ್ತು ಪಾಟಿಯಾ ಪಥರ್ ಗ್ರಾಮಗಳ ನಿವಾಸಿಗಳು ಈ ವರ್ಷದ ಪ್ರವಾಹದಲ್ಲಿ ಬಹುತೇಕ ಎಲ್ಲವನ್ನೂ ಕಳೆದುಕೊಂಡಿದ್ದಾರೆ.

ಕಳೆದ ಕೆಲವು ದಿನಗಳಿಂದ ಜನರು ರೈಲ್ವೆ ಹಳಿಗಳ ಮೇಲೆ ತಾತ್ಕಾಲಿಕ ಟೆಂಟ್‌ಗಳಲ್ಲಿ ವಾಸಿಸುತ್ತಿದ್ದಾರೆ.

ಅಸ್ಸಾಂನ 29 ಜಿಲ್ಲೆಗಳಲ್ಲಿ ಸುಮಾರು 8.12 ಲಕ್ಷ ಜನರು ಪ್ರವಾಹಕ್ಕೆ ಸಿಲುಕಿದ್ದಾರೆ. ನಾಗಾಂವ್‌ನಲ್ಲಿ 3.38 ಲಕ್ಷಕ್ಕೂ ಹೆಚ್ಚು ಜನರು, ಕಚಾರ್‌ನಲ್ಲಿ 1.6 ಲಕ್ಷ, ಹೊಜಾಯ್‌ನಲ್ಲಿ 1.11 ಲಕ್ಷ ಮತ್ತು ದಾರಂಗ್‌ನಲ್ಲಿ 52,609 ಜನರು ಬಾಧಿತರಾಗಿದ್ದಾರೆ. ರಾಜ್ಯ ಸರ್ಕಾರದ ಪ್ರಕಾರ, ಒಟ್ಟು 60,038 ಹೆಕ್ಟೇರ್ ಕೃಷಿಯೋಗ್ಯ ಭೂಮಿ ಮತ್ತು 2,251 ಹಳ್ಳಿಗಳು ಇನ್ನೂ ಜಲಾವೃತವಾಗಿವೆ.