ಅಂದು ಕ್ಲೀನರ್​ ಆಗಿ ಕೆಲಸ ಮಾಡಿದ್ದ ವ್ಯಕ್ತಿ, ಇಂದು ವಿಶ್ವದ ನಂಬರ್-1 ಶ್ರೀಮಂತ..!

ವಿಶ್ವದ ಅತಿದೊಡ್ಡ ಇ-ಕಾಮರ್ಸ್​ ಕಂಪೆನಿ ಅಮೇಜಾನ್.ಕಾಮ್ ಯಾರಿಗೆ ತಾನೆ ಗೊತ್ತಿಲ್ಲ ಹೇಳಿ. ತನ್ನ ಆನ್​ಲೈನ್ ವ್ಯವಹಾರಗಳ ಮೂಲಕ ವಿಶ್ವ ನಂಬರ್​ ಒನ್​ ಶ್ರೀಮಂತ ಸ್ಥಾನಕ್ಕೇರಿದ ಜೆಫ್ ಬೆಜೊಸ್ ಇದರ ಮಾಲೀಕ. ಶ್ರೀಮಂತಿಕೆಗೆ ಸಾಟಿಯಿಲ್ಲದ ಸರದಾರನಾಗಿ ಮೆರೆಯುತ್ತಿದ್ದ ಮೈಕ್ರೋಸಾಫ್ಟ್​ ಕಂಪೆನಿಯ ಒಡೆಯ ಬಿಲ್​​ ಗೇಟ್ಸ್​ರನ್ನು ಹಿಂದಿಕ್ಕಿ ಜೆಫ್​ ಈಗ ಶ್ರೀಮಂತಿಕೆಯಲ್ಲಿ ಮೊದಲ ಸ್ಥಾನ ಅಲಂಕರಿಸಿದ್ದಾರೆ. ಸದ್ಯದ ಅಮೆಜಾನ್​ ಷೇರು ಮಾರುಕಟ್ಟೆ ಬಂಡವಾಳ  797 ಮಿಲಿಯನ್ ಡಾಲರ್ ಮೀರಿ ನಿಂತಿದೆ. ಆದರೆ ಇದೇ ಜೆಫ್ ಬೆಜೊಸ್ ಹಿಂದೊಮ್ಮೆ ಒಂದು ಹೊತ್ತಿನ ಊಟಕ್ಕಾಗಿ ಪರದಾಡಿದ್ದರು ಎಂದರೆ ನಾವು ನಂಬಲೇಬೇಕು.

ಎಲ್ಲರೂ ಆಟವಾಡುವ ಹರೆಯದಲ್ಲಿ ಜೆಫ್​ ಕೆಲಸಕ್ಕೆ ಸೇರಿದ್ದರು. ತನ್ನ 16ನೇ ವಯಸ್ಸಿನಲ್ಲಿ ಮೆಕ್​ ಡೊನಾಲ್ಡ್ಸ್​ನಲ್ಲಿ ಕೆಲಸಗಿಟ್ಟಿಸಿದ ಜೆಫ್​ ಬೆಜೊಸ್, ಅಲ್ಲಿ ನೆಲದ ಮೇಲೆ ಚೆಲ್ಲಲಾಗುತ್ತಿದ್ದ ಕ್ಯಾಚೆಪ್​ಗಳನ್ನು ಕ್ಲೀನ್ ಮಾಡುವ ಕ್ಲೀನರ್​ ಬಾಯ್​ ಆಗಿ ಕೆಲಸ ಮಾಡುತ್ತಿದ್ದರು. ಅಂತಹದೊಂದು ಕೆಲಸ ಮಾಡಲು ನಿಜಕ್ಕೂ ಜೆಫ್​ಗೆ ಇಷ್ಟವಿರಲಿಲ್ಲ. ಆದರೆ ಕುಟುಂಬ ಪರಿಸ್ಥಿತಿ ಹಾಗೇ ಇತ್ತು. ಬಾಲ್ಯದಲ್ಲಿ ತಾತನೊಂದಿಗೆ ವಾಸಿಸುತ್ತಿದ್ದ ಅವರು ವಿದ್ಯಾಭ್ಯಾಸದೊಂದಿಗೆ ಕೆಲಸ ಮಾಡುವುದು ಅನಿವಾರ್ಯವಾಗಿತ್ತು. ಅದರಲ್ಲೂ ರಜಾದಿನಗಳು ಬಂತೆಂದರೆ ಮೆಕ್​ ಡೊನಾಲ್ಡ್ಸ್​ನಲ್ಲಿ ಜೆಫ್​ ಪೂರ್ಣ ಪ್ರಮಾಣದ ಕೆಲಸಗಾರ.

ಕೆಲಸಕ್ಕೆ ಸೇರಿದ ಮೊದಲ ದಿನವೇ ಜೆಫ್​ ರನ್ನು ಕ್ಲೀನಿಂಗ್​ಗೆ ಹಾಕಿದ್ದು, ಅವರಿಗೆ ತುಂಬಾ ಬೇಸರ ತರಿಸಿತ್ತು. ಅಂದು ಆ ನೋವನ್ನು ನುಂಗಿದ್ದ ಜೆಫ್ ಮನಸ್ಸಿನಲ್ಲೇ ದೃಢ ನಿರ್ಧಾರವನ್ನು ಕೈಗೊಂಡಿದ್ದರು. ಆ ಕನಸೇ ಇಂದು ವಿಶ್ವ ಇ-ಕಾಮರ್ಸ್​​ನ ರಾಜನಾಗಿ ಜೆಫ್​ ಬೆಜೊಸ್​ರನ್ನು ತಂದು ನಿಲ್ಲಿಸಿದೆ.​

ಅದಾಗಲೇ ಬಿಸಿನೆಸ್​ನ ಹಾಗು ಹೋಗುಗಳ ಬಗ್ಗೆ ತಿಳಿದಿದ್ದ ಜೆಫ್​ ನಂತರ ಕಂಪ್ಯೂಟರ್​ ಇಂಜಿನಿಯರಿಂಗ್  ಪದವಿ ಪಡೆದರು. ಅಲ್ಲದೆ ಬ್ಯಾಂಕರ್ಸ್​ ಟ್ರಸ್ಟ್​ ಎಂಬ ಖಾಸಗಿ ಕಂಪೆನಿಯೊಂದರಲ್ಲಿ ಉದ್ಯೋಗಕ್ಕೆ ಸೇರಿದ ಅವರು ತನ್ನ ಕೆಲಸದಲ್ಲೇ ಅನೇಕ ಹೊಸ ಅನುಭವಗಳನ್ನು ಪಡೆದುಕೊಂಡರು. ಕಲಿಕೆಯ ತುಡಿತದಲ್ಲಿರುವಾಗಲೇ ಜೆಫ್​ಗೆ ಅದೊಂದು ದಿನ ಕಂಪೆನಿಯ ವತಿಯಿಂದ ಅಮೆರಿಕಕ್ಕೆ ಭೇಟಿ ನೀಡುವ ಅವಕಾಶ ದೊರೆಯಿತು. ಅಲ್ಲಿ ಅನೇಕ ಜನರನ್ನು ಭೇಟಿಯಾಗಿದ್ದ ಜೆಫ್ ವಿಶ್ವದ ಬೆಳವಣಿಗೆಗಳ ಬಗ್ಗೆ ಚರ್ಚಿಸಿದ್ದರು. ಈ ಸಂದರ್ಭದಲ್ಲಿ ನಗರದ ಜನರು ಶಾಪಿಂಗ್​ ವೇಳೆ ಉಂಟಾಗುತ್ತಿರುವ ಸಮಸ್ಯೆಗಳನ್ನು ಅವರು ಕೇಳಿಸಿಕೊಂಡಿದ್ದರು. ಆ ವಿಷಯಗಳನ್ನೆಲ್ಲಾ ಜೆಫ್​ ಮನಸ್ಸಲ್ಲಿ ಅಚ್ಚಾಕಿಸಿಕೊಂಡಿದ್ದರು. ಇದಕ್ಕೆ ಪರಿಹಾರವನ್ನು ಕಂಡುಕೊಳ್ಳಲು ಅವರು ಯೋಚಿಸಿದರು. ಇದೇ ವೇಳೆ ಇಂಟರ್​ನೆಟ್​ ಬಳಕೆದಾರರು ಕೂಡ ಹೆಚ್ಚಾಗುತ್ತಿತ್ತು. ಇದರಿಂದ ಭವಿಷ್ಯವು ಇಂಟರ್​ನೆಟ್​ನ್ನು ಅವಲಂಭಿಸಿರಲಿದೆ. ಇದಕ್ಕಾಗಿ ಇ-ಮಾರ್ಕೆಟಿಂಗ್ ಕಂಪೆನಿಯ ಅವಶ್ಯಕತೆಯಿದೆ ಎಂಬುದನ್ನು ಅವರು ಮನಗಂಡರು.

ಜೆಫ್​ ತನ್ನ ಕೆಲಸವನ್ನು ಬಿಟ್ಟು ಕಂಪೆನಿಯನ್ನು ಪ್ರಾರಂಭಿಸಲು ನಿರ್ಧರಿಸಿದರು. ಅದರಂತೆ ತನ್ನ ಪೋಷಕರ ಸ್ನೇಹಿತರ ಗ್ಯಾರೇಜನ್ನು ಪಡೆದರು. ಅಲ್ಲಿಯೇ ಹೊಸ ಉದ್ಯಮಕ್ಕೆ ನಾಂದಿಯಾಡಿದರು. ತಾನು ದುಡಿದಿದ್ದ ಎಲ್ಲ ಹಣವನ್ನು  ಹೊಸ ಪರೀಕ್ಷೆಗೆ  ಹೂಡಿದರು. ಕೆಲವರು ಜೆಫ್​ಗೆ ಬುದ್ಧಿವಾದ ಹೇಳುತ್ತಿದ್ದರು. ಇದ್ಯಾವುದೂ ಕೇಳುವ ಸ್ಥಿತಿಯಲ್ಲಿ ಅಂದು ಜೆಫ್​ ಇರಲಿಲ್ಲ. ಏಕೆಂದರೆ ಅವರು ಅದಾಗಲೇ ದೃಢ  ನಿರ್ಧಾರ ಮಾಡಿದ್ದರು.

ಆದರೆ ತಾನು ಬಯಸಿದಂತೆ ಕಂಪೆನಿಯನ್ನು ಪ್ರಾರಂಭಿಸಲು ಜೆಫ್​ಗೆ ಆರಂಭದಲ್ಲಿ ಸಾಧ್ಯವಾಗಿರಲಿಲ್ಲ. ಬಂಡವಾಳ ಹೂಡಲು ಹಣದ ಕೊರತೆಯುಂಟಾಯಿತು. ಈ ಸಂದರ್ಭದಲ್ಲಿ ತಾಯಿಯ ತಂದೆಯನ್ನು ಭೇಟಿಯಾಗಿ ಮನವೊಲಿಸಿದರು. ಆದರೆ ಲಕ್ಷಾಂತರ ಡಾಲರ್​ ನೀಡಲು ಅವರೂ ಕೂಡ ಹಿಂದೆ ಮುಂದೆ ನೋಡಿದರು. ಕೊನೆಗೂ ಮನವೊಲಿಸಲು ಯಶಸ್ವಿಯಾದ ಜೆಫ್ ಬೆಜೊಸ್ ಒಂದಷ್ಟು ಹಣವನ್ನು ಒಟ್ಟುಗೂಡಿಸಲು ಯಶಸ್ವಿಯಾದರು.

ಅಮೆಜಾನ್ ಕಂಪೆನಿಯನ್ನು ಆರಂಭಿಸಲಾಯಿತು. ಕೇವಲ  2 ಎರಡು ವಾರಗಳು ಕಳೆಯುವಷ್ಟರಲ್ಲಿ ಕಂಪೆನಿಯು  20 ಸಾವಿರ ಡಾಲರ್​ ಸಂಪಾದಿಸಿತು. ಇದೇ ಸಂದರ್ಭದಲ್ಲಿ 21 ನೇ ಶತಮಾನದಲ್ಲಿ ಪ್ರಬಲವಾಗಿದ್ದ ಡಾಟ್​ಕಾಂ ಎಂಬ ಆನ್​ಲೈನ್ ಕಂಪೆನಿಯು ನಷ್ಟದತ್ತ ಮುಖಮಾಡಿತು. ಇದನ್ನೂ ಕೂಡ ಬಂಡವಾಳ ಮಾಡಿಕೊಂಡ ಜೆಫ್ ಬೆಜೊಸ್ ತನ್ನ ಮಾರುಕಟ್ಟೆಯನ್ನು ವಿಸ್ತರಿಸಿದರು. ಹಾಗೆಯೇ ಡೈಪರ್ಸ್​.ಕಾಮ್​ ಎಂಬ ಕಂಪೆನಿ ಮಕ್ಕಳ ಉತ್ಪನ್ನಗಳ ಮೂಲಕ ಫೇಮಸ್ ಆಗಿತ್ತು. ಆ ಕಂಪೆನಿಯನ್ನೂ ಟಾರ್ಗೆಟ್​ ಮಾಡಿದ್ದ ಜೆಫ್, ತನ್ನ ಉತ್ಪನ್ನಗಳನ್ನು 30% ಕಡಿಮೆಗೆ ನೀಡಿದರು. ಅಲ್ಲದೆ ಗ್ರಾಹಕರಿಗೆ ಅತ್ಯುತ್ತಮ ಸೇವೆ ನೀಡುವ ಮೂಲಕ ಎಲ್ಲರನ್ನು ಅಮೆಜಾನ್​ನತ್ತ  ಸೆಳೆಯುವಲ್ಲಿ ಯಶಸ್ವಿಯಾದರು.

ಇದರ ಫಲವಾಗಿ  2001 ರ ಬಳಿಕ ಅಮೆಜಾನ್ ಎಂಬುದು ಬೃಹತ್ ಕಂಪೆನಿಯಾಗಿ ಬೆಳೆಯಿತು. ಕಂಪೆನಿಯು ಅನೇಕ ನಗರದಲ್ಲಿ ತನ್ನ ಸೇವೆಯನ್ನು ವಿಸ್ತರಿಸಿತು. ನಗರಗಳನ್ನು ದಾಟಿ ದೇಶಗಳತ್ತ ಅಮೆಜಾನ್ ಮುಖ ಮಾಡಿತು. ಇಂದು ಸಾಟಿಯಿಲ್ಲದ ಇ-ಕಾಮರ್ಸ್​ ಸಂಸ್ಥೆಯಾಗಿ ಅಮೆಜಾನ್​.ಕಾಮ್ ಬೆಳೆದು ನಿಂತಿದೆ. ಅಂದು ಮೆಕ್ ಡೊನಾಲ್ಡ್ಸ್​ ಕಂಪೆನಿಯಲ್ಲಿ ಕ್ಲೀನಿಂಗ್  ಕೆಲಸ ಮಾಡುತ್ತಿದ್ದ ಹುಡುಗ ಇಂದು ಕಂಪೆನಿಯನ್ನು ಖರೀದಿಸಬಲ್ಲ ಧನಿಕನಾಗಿ ಬೆಳೆದಿದ್ದಾರೆ. ಅದರೊಂದಿಗೆ ಇಡೀ ವಿಶ್ವದ ನಂಬರ್​ ಒನ್ ಶ್ರೀಮಂತರಾಗಿ ಇಂದು ಗುರುತಿಸಿಕೊಂಡಿದ್ದಾರೆ.