African Swine Fever: ಕೊರೊನಾ ಟೆನ್ಷನ್ ನಡುವೆ ಮತ್ತೊಂದು ಆತಂಕ; ಬಂಡೀಪುರದಲ್ಲಿ ಆಫ್ರಿಕನ್ ಹಂದಿ ಜ್ವರ ಭೀತಿ

ಒಂದು ತಿಂಗಳ ಹಿಂದೆಯಷ್ಟೇ ಬಂಡೀಪುರ ಹುಲಿ ಸಂರಕ್ಷಿತ ಪ್ರದೇಶದಲ್ಲಿ ಐದು ಕಾಡುಹಂದಿಗಳು ಆಫ್ರಿಕನ್ ಹಂದಿ ಜ್ವರಕ್ಕೆ ಬಲಿಯಾಗಿದ್ದವು. ಇದೀಗ ನೆರೆಯ ತಮಿಳುನಾಡಿನ ಮುದುಮಲೈ ಹುಲಿ ಸಂರಕ್ಷಿತ ಪ್ರದೇಶದಲ್ಲಿನ ಹಂದಿಗಳಿಗೂ ಈ ರೋಗ ಹರಡಿವೆ ಎಂಬ ಸುದ್ದಿ ವರದಿಯಾಗಿದೆ ಎಂದು ಬಂಡೀಪುರದ ಅಧಿಕಾರಿಗಳು ತಿಳಿಸಿದ್ದಾರೆ.

ಕಾಡಿನಲ್ಲಿ ಹರಡುತ್ತಿರುವ ಈ ರೋಗವನ್ನು ನಿಯಂತ್ರಿಸುವ ಸಲುವಾಗಿ ಯಾರನ್ನೂ ಕೂಡ ಅರಣ್ಯದೊಳಗೆ ಬಿಡಲಾಗುತ್ತಿಲ್ಲ. ನಾವು ಬಹಳ ಜಾಗರೂಕರಾಗಿದ್ದೇವೆ ಮತ್ತು ಪ್ರತಿಯೊಂದು ಕಾಡುಹಂದಿಗಳು ಸಾವನ್ನಪ್ಪಿರುವುದನ್ನು ದಾಖಲೆ ಮಾಡಲಾಗಿದೆ. ಅಲ್ಲದೇ ಹಂದಿಗಳ ಸಾವಿಗೆ ಕಾರಣವೇನು ಎಂಬುವುದನ್ನು ಪತ್ತೆ ಹಚ್ಚಲಾಗುತ್ತಿದೆ ಎಂದು ಬಂಡೀಪುರದ ಅಧಿಕಾರಿಗಳು ತಿಳಿಸಿದ್ದಾರೆ.

ಬಂಡೀಪುರದಲ್ಲಿ ಅತೀ ಹೆಚ್ಚು ಕಾಡು ಹಂದಿಗಳನ್ನು ಹೊಂದಿರುವುದಕ್ಕೆ ನಾವು ಹೆಮ್ಮೆ ಪಡುತ್ತೇವೆ. ಬಂಡೀಪುರದಲ್ಲಿ ನಿಯೋಜನೆಗೊಂಡಿರುವ ಅರಣ್ಯ ರಕ್ಷಕರಿಗೆ ಪ್ರತಿ ಕಾಡುಹಂದಿ ಸಾವಿನ ಬಗ್ಗೆ ತಮ್ಮ ಹಿರಿಯ ಅಧಿಕಾರಿಗಳಿಗೆ ವರದಿ ನೀಡುವಂತೆ ಸೂಚಿಸಲಾಗಿದೆ ಎಂದು ಹೇಳಿದ್ದಾರೆ.

ಆದರೆ ಇಲ್ಲಿಯವರೆಗೆ ಮುದುಮಲೈನಲ್ಲಿ ಯಾವುದೇ ಕಾಡುಹಂದಿ ಸಾವನ್ನಪ್ಪಿರುವುದರ ಬಗ್ಗೆ ದಾಖಲೆ ಇಲ್ಲ. ಮುದುಮಲೈ ಮತ್ತು ಬಂಡೀಪುರ ಅರಣ್ಯಗಳ ನಡುವೆ ಪ್ರಾಣಿಗಳು ಸ್ವಚ್ಛಂದವಾಗಿ ಸಂಚರಿಸುವುದರಿಂದ ಅಕ್ಕಪಕ್ಕದ ಮೀಸಲು ಪ್ರದೇಶದಲ್ಲಿರುವ ಹಂದಿಗಳಿಗೆ ಸಾಂಕ್ರಾಮಿಕ ರೋಗ ಹರಡುವ ಸಾಧ್ಯತೆಯಿದೆ ಎಂದು ಆತಂಕ ವ್ಯಕ್ತಪಡಿಸಿದ್ದಾರೆ.

ಅಲ್ಲದೇ ಈ ಬಗ್ಗೆ ಪ್ರತಿಕ್ರಿಯಿಸಿರುವ ಬಂಡೀಪುರ ಹುಲಿ ಸಂರಕ್ಷಿತ ಪ್ರದೇಶದ ನಿರ್ದೇಶಕ ಪಿ ರಮೇಶ್ ಕುಮಾರ್, ಒಂದು ತಿಂಗಳ ಹಿಂದೆ ಸಾವನ್ನಪ್ಪಿದ ಐದು ಕಾಡುಹಂದಿಗಳಿಗೆ ನಡೆಸಿದ ಪರೀಕ್ಷೆಯಲ್ಲಿ ಅವು ಆಫ್ರಿಕನ್ ಹಂದಿ ಜ್ವರದಿಂದ ಬಳಲುದ್ದವು ಎಂಬ ವಿಚಾರ ದೃಢವಾಗಿದೆ.

ಮಂಗಲ ಮತ್ತು ಅದರ ಸಮೀಪದ ಪ್ರದೇಶದ ಸುತ್ತಮುತ್ತಲಿನ ಗ್ರಾಮಗಳಲ್ಲಿ ಈ ಸಾವುಗಳು ವರದಿಯಾಗಿವೆ. ಅಂದಿನಿಂದ ನಾವು ಎಲ್ಲಾ ಅಗತ್ಯ ಮುನ್ನೆಚ್ಚರಿಕೆ ಕ್ರಮಗಳನ್ನು ತೆಗೆದುಕೊಂಡಿದ್ದೇವೆ. ಯಾರು ಗಾಬರಿಯಾಗುವ ಅಗತ್ಯವಿಲ್ಲ. ಈ ರೋಗವು ಇತರ ಕಾಡು ಪ್ರಾಣಿಗಳಿಗೆ ಅಥವಾ ಮನುಷ್ಯರಿಗೆ ಹರಡುವುದಿಲ್ಲ" ಎಂದು ತಿಳಿಸಿದ್ದಾರೆ.

ಆಫ್ರಿಕಾ ಹಂದಿ ಜ್ವರವು ಕಾಡುಹಂದಿಗಳ ಮೇಲೆ ಪರಿಣಾಮ ಬೀರುವ ವೈರಲ್ ಜ್ವರವಾಗಿದೆ. ಇದೊಂದು ಸಾಂಕ್ರಾಮಿಕ ರೋಗವಾಗಿದ್ದು, ಸಾವಿನ ಅಪಾಯವನ್ನು ಗಮನಾರ್ಹವಾಗಿ ಹೆಚ್ಚಿಸುತ್ತದೆ. 1990ರ ದಶಕದ ಆರಂಭದಲ್ಲಿ ಆಫ್ರಿಕಾದಲ್ಲಿ ಮೊದಲು ಪತ್ತೆಯಾದ ಈ ರೋಗವು ಜನರ ಮೇಲೆ ಪರಿಣಾಮ ಬೀರುವುದಿಲ್ಲ ಎನ್ನಲಾಗಿತ್ತು. ಆದರೆ ಇದು ಹಂದಿಮಾಂಸ ಉತ್ಪನ್ನಗಳ ಉತ್ಪಾದನೆ ಮತ್ತು ಪೀಡಿತ ದೇಶಗಳಿಂದ ಅವುಗಳ ಸಂಗ್ರಹಣೆಯ ಮೇಲೆ ಪರಿಣಾಮ ಬೀರಬಹುದು. ಇಲ್ಲಿಯವರೆಗೆ, ಆಫ್ರಿಕನ್ ಹಂದಿ ಜ್ವರಕ್ಕೆ ಯಾವುದೇ ಪರಿಣಾಮಕಾರಿ ಲಸಿಕೆ ಅಥವಾ ಚಿಕಿತ್ಸೆಯು ಲಭ್ಯವಿಲ್ಲ, ಮತ್ತು ರೋಗದ ಪ್ರಸರಣವನ್ನು ನಿಯಂತ್ರಿಸಲು ಸಹ ಸಂಕೀರ್ಣವಾಗಿದೆ. ತಜ್ಞರು ಚಲನೆಯ ನಿರ್ಬಂಧದ ಪ್ರಾಮುಖ್ಯತೆಯನ್ನು ಒತ್ತಿಹೇಳುತ್ತಾರೆ.